Read Karbi LUK 4 Bible Online

LUK 4 - Karbi bible

LUK 4

¹Jisu Karjong Kangthir pen pleng-setsi Jordan pen chevoilo, lapen Karjong alangliphan kejejangtang ajo padamlo

²lapen hadak alangliphan ni phlikep Diabol sat lang-lo. Halabangso arni ahut alangli thangnatta chochelo lapen la jutdetsi alangli an ingchirlo.

³Diabol alangliphan pulo, “Nangli jongsi Arnam asopo tangte, him cheplang non pura labangso a-arlong aphan punon.”

⁴Bonta Jisu alangliphan thak-lo, “Him pen lok ke monit atum reng-i-edetji, ‘lapusi tok tang-lo.’”

⁵Lapen Diabol alangliphan angsong parlu ponsi amek siripsi pirthe adang arat an alangliphan paklangpet-lo.

⁶Lapen Diabol alangliphan pulo, “Neli nangliphan la kadokave ajakong lapen adak atur do-an nangli pipo, pima lahei neli rideng hodai tang-lo, lapen neli ning kehang aling abang aphan pi un.

⁷Tangte nangli neliphan ardom lote la kadokave nangli mar cheplangpo.”

⁸Jisu thaksi alangliphan pulo, “‘Hemphu nang Arnam aphanle ardomkhrup-ra alangli phanle ingduk-chot nangji,’ lake tok tang-lo.”

⁹Lapen alangli alangliphan Jerusalem ponlo, lapen Kardom a-Hem thepi angsong achele athak parjap-lo, lapen alangliphan pulo, “Nangli jongsi Arnam a-Sopo tangte, ladak penle nangli chingthu bupnon.

¹⁰Pima nangliphan kerai pamejisi alangli apherangke atum aphan ahukum piji.

¹¹Lapen ‘nangli keng kopine kepatekungke pinjisi halatum amethang ari pen nangli rung ponphomji,’ lapusonsi toktang-lo.”

¹²Jisu thaksi alangliphan pulo, “ ‘Nang Hemphu, atheke Nang Arnam aphan asat lang nangne,’ lapusi pulo.”

¹³Asat do-an langdetsi Diabol malomso ahut an alangli dung pen damjuilo.

¹⁴Ansi Karjong ajakong pen Jisu Galili adet chevoilo, lapen alangli lam det adang chethangpet-lo.

¹⁵Lapen alangli halatum asinagog ahem hei hei arlo than bomlo lapen kadokave atum alangliphan rojolo.

¹⁶Jisu amethang kethe keding adim, atheke Najareth vang-lo, lapen kai atengsi Sabbath arni alangli Sinagog along dunlo, lapen Alangli keporheji aphan thurlo.

¹⁷Alangliphan Isaiah montri aloh pidet-lo lapen la pursi hadak labangso alam ketok long-lo,

¹⁸“Hemphu a-Karjong ne phuthak do, pima ne keduk kelak atum aphan birta keme kepachethangjisi alangli nephuthak jangthu patip-lo; phatek kebengkoi atum aphan kelophlot-ra keselok atum aphan kepachecharthujisi birta kethanji; bang aduk kanghoi kechechak atum aphan kepajokji;

¹⁹Hemphu ekangjinso aningkan alam kepachethangji, la kadokave akam aphansi alangli nephan toitang-lo.”

²⁰Alangli aloh thuisi pherangke arideng pithulo, lapen ingnilo. Sinagog along kedun atum an alangli-phansi langphrong-lo.

²¹Alangli halatum aphan pulo, “Pini nanglitum labangso ahastro alam karjuphrong pen ajok alam chekoktang-lo.”

²²Kadokave atum alangliphan haki pidunhurlo, lapen alangli ingho pen nangkebar akangjinso alam pen apot manghuphrongsi pulo, “Labangso abang ke Joseph asopolo, kalima?”

²³Ansi alangli halatum aphan pulo, “Nangmethangle chepametha daktor, pu asarlamthe pen nangtum nephan puji, lapen netum karjulong, Kapernaum along keklemtang akam an dak nangmethang adet alongta klemtha puta nangtum nephan puvekji.”

²⁴Alangli puthulo, “Ame-thang ahavar angbong ke Arnam amontri atum aphan baduta chak abang ave.

²⁵Bonta ne nangtum aphan nangpulang, ningkan kethom ra chiklo jonthrok sining ingkirthipsi det adang akhim kethe kethur ahut Israel adet Elijah a-arni ahut hemepi atum do-o, lake ahok-lo.

²⁶Bonta Sidon adet Zarephath arong inut ahemepi along apar badu alongta Elijah aphan toitedet-lo.

²⁷Lapen Elijah ahut Israel adet si-i akeso kelong atum do-o, bonta Siria adet kedo Naman aphan apar ke badu aphanta pangthirthedet-lo.”

²⁸Ansi Sinagog along alangli kethan alam karjudun atum ke jasemet aning thilo,

²⁹lapen thurpaksi alangliphan rongsopi pen doilap lap-lo. Halatum arongsopi ke inglong athaksi dolo. Lasi halatum alangliphan inglong athepai pen kevarji aphan akung an ponlo.

³⁰Bonta alangli halatum anglum lutchoksi damjuilo.

³¹Ansi Jisu Galili adet Kapernaum arongsopi nanghirtuk-lo. Kesang mate Sabbath arni alangli halatum aphan lam thanlo,

³²lapen halatum thirikhurlo, pima alam ajakong dolo.

³³Sinagog arlo kangthirthe ahi-i langno kepho abang dolo, lapen alangli ase kethe pen hangsersi pulo.

³⁴“Oh Najareth a-Jisu, nangli nelitum along kopi akam doma? Nangli nelitum aphan kepavirjisi kevang-loma? Nangli komatma, lake neli chinilo: Nanglike Arnam pen kevang Kangthir abang-lo!”

³⁵Bonta Jisu laphan ingcheksi pulo, “Dojoi! Lapen alangli long pen nangbarnon.” Hi-i alangliphan longle athak halatum angbong paklibupsi, alangliphan thangta phangnone pin pen alangli long pen nangbarlo.

³⁶Lapen rat kedo-anta manghuphrong-lo lapen chepuhurlo, “Lake kopuson alam loma? Pima alangli kelong ajakong lapen amethang ajakong pen kangthirthe ahi-i atum aphan hukum pilo, lapen halatum ingtan nang barlo.”

³⁷Lapen alangli lam det adang bithe bitha chethang-lo.

³⁸Ansi Jisu Sinagog ahem pen damsi Simon ahem lut damlo, bonta Simon anipi Jasemet aphu solo lapen halatum labangpi pen apot Jisu aphan choningrilo.

³⁹Alangli labangpi adung arjapthersi phu keso aphan ingchek-lo, lapen aphu keso hamdet-lo. Lapen labangpi hala mamat thursi halatum aphan ru-thailo.

⁴⁰Arni kechi ahut amethang methang along kedo akaprek kaprek akeso atum aphan Jisu adung vanpet-lo. Alangli abangphutin aphuthak ari batsi halatum aphan pamethulo.

⁴¹Hi-i atumta penang atum along pen nangbarsi hangjosi pulo, “Nanglike Arnam a-Sopo!” Bonta Jisu halatum aphan ingcheksi ningjeri pusi hukum sodak pilo, pima alangli ke Khristolo pu halatum chinilo.

⁴²Puthot adap the-angsi alangli monit kavedet adim damlo. Monit ake-ongpi alangliphan ridamlo lapen alangli long vang-lo lapen halatum adung pen alangliphan kepadam longledetji aphan klem bor-i-olo.

⁴³Bonta alangli halatum aphan pulo, “Akaprek kaprek arongsopi alongta ne Arnam arat a-Birta Keme than nangji, pima labangso akam aphansi nephan Arnamsi netoilo.”

⁴⁴Lapen alangli Judia adet Sinagog hei hei arlo pachethang ponbomlo.