Read Karbi LUK 5 Bible Online

LUK 5 - Karbi bible

LUK 5

¹Arnisi armu atum Jisu aphan petklingsi Arnam alam karjudun ahut Jisu ke Gennesaret atalo akung arjap-lo.

²Alangli talo akung telong humni thek-long-lo. Pima ok kebeng atum la otekangsi alan hei hei lang jolo.

³Lapen telong ehum, atheke Simon atelong chethapsi telong kora pen asap vektu pusi alangli Simon aphan choningrilo. Alangli ingni lunsi armu atum aphan thanlo.

⁴Lapen keningje pajutsi alangli Simon aphan pulo, “Lang karnuk krung adimle telong vek-ra ok ahur akethepi kebengji aphan nangtum alan hei hei jengtha.”

⁵Simon thaksi pulo, “Hemphu, netum jo pangthang jasemet chepaduk-lo setta thangta longledet-lo, bonta nangli hukum kroisi neli lan hei hei jengpo.”

⁶Latum la klemdetsi ok ahur akethepi beng-lo. Lapen halatum alan chingsekji dokdok-lo.

⁷Lasi atelong kaprek along kedo halatum ari asangho atum aphan angphun pakisi nang keparapdunji aphan angthek pilo. Halatum vang-lo, lapen ok thap-o apotsi la telong humnita inglim rang rung-lo.

⁸Simon Pitor la thek-longsi Jisu akeng-ri domkhrupsi pulo, “Ne dung pen damnon, Hemphu, pima neke papi amonit-lo.”

⁹Halatum kebengtang a-ok ahur akethepi apotsi Pitor lapen ari atum an thirik-olo.

¹⁰Lapen ke Zebedi asopomar, Jems lapen Jonta lapu thakthak-lo. Halatum ke Simon pen kam keklem rap rap atumlo. Lapen Jisu Simon aphan pulo, “Phere nangne, non pen apara nang monit kenep abang cheplangji.”

¹¹Lapen atelong kora vanpetsi halatum kadokave amar che-o tekang-lo lapen alangli phi phi dunlo.

¹²Lapen arni isi alangli erong arongsopi along dolo. Hadak abang bithe bitha si-i kecho, pinso amonit inut dolo. Alangli Jisu aphan thek-longsi domkrupsi alangliphan choningrisi pulo, “Hemphu, nang ning hang-lote, nang nepangthir un.”

¹³Lapen ari chephajengsi lapen abang otsi alangli pulo, “Ne ning hang-lo, ingthirnon.” Lapen hala mamat si-i alangli bang along avedet-lo.

¹⁴Lapen badu aphanta thanri, bonta damra kurusar aphan chepaklang-ra nang kepangthirjile Moses kepi aron thot halatum aphan haki kepijile athok thok damnon pusi Jisu alangliphan hukum pilo.

¹⁵Bonta Jisu lamjir chethangmuchot-lo lapen armu ake-ongpi karjuji lapen akeso pen kemedetji aphan chingrumlo.

¹⁶Bonta Jisu ke abatai batai kejejangtang ajo damjuisi hadak Arnam ardomlo.

¹⁷Lapen arni isi alangli kethan ahut Pharisi lapen aron thekser atum hadak ingniphrong-lo. Halatum Galili adet lapen Judia arong an lapen Jerusalem penta vang-lo. Lapen bang atum aphan kepameji aphan Hemphu ajakong Jisu along dolo.

¹⁸Lapen chini iktha, monit atum inut kethiklak apinso aphan ahongplang pen nangcharchongsi vanlo lapen Jisu angno kebiji aphan hem kelutji abidi rilo.

¹⁹Monit ongpik apotsi lut pon thekthedetsi halatum hem asarnung athak arlu damsi sarnung kedip a-ita tereksi atar pen abang pen monit atum angbong Jisu angno nang pasunlo.

²⁰Halatum akekroi thek longsi alangli pulo, “O monit, nang pap hei hei diya tang-lo.”

²¹Lapen aron thekser atum lapen Pharisi atum lam kechedan pangchengsi pulo, “Arnam aphan kepinrem alam kepu abang, la komatma? Arnam apar baduta pap diya un-e, kalima?”

²²Bonta Jisu halatum kechedansei alam chinilorlo lapen thaksi halatum aphan pulo, “Nangtum aning arlo kechedan-sei alam kopi?

²³‘Nangpap hei hei diya tang-lo,’ kalite ‘thurra kengkam chejortha,’ la sonni alam angbong kolo abangsi kepu kejoimuchotma?

²⁴Bonta pirthe athak pap hei hei kediyaji monit asopo ajakong do, nangtum la kechinijisi aporman nangpaklangpo.” Alangli thi-klak abang aphan pulo, “Ne nangphan nangpulang, thurra nangtarthui cheponra nanghem chedamnon.”

²⁵Lapen hala mamat halatum angno thursi alangli ke-i atar cheponsi Arnam anong pathesi ahem chedamlo.

²⁶Lapen halatum manghuphrong-lo, lapen Arnam anong pathelo, lapen thirik-hursi halatum pulo, “Pini etum manghumeme akam thek-long-lo di komarli!”

²⁷Lapen labangso aphi Jisu ingtan barlo, lapen Levi pu inut midu kerung abang aphan amaro along keching-nilun thek-longsi langding-lo. Jisu alangliphan pulo, “Ne phi phi nangdun non.”

²⁸Lapen Levi amar atar che-o-etsi, thursi alangli phi phi dunlo.

²⁹Ansi Levi amethang ahemsi Jisu aphan kecho-kejun ameipi pathikpilo. Halatum along midu kerung ake-ongpi atum lapen akaprek atumta ingni-dunlo.

³⁰Pharisi atum lapen halatum abe kedun, aron thekser atum alangli sangho atum aphan pasimuhursi pulo, “Nangtum pi apotsi la midu kerung atum lapen papi atum pen cho rap-rap jun rap-rap ma?”

³¹Jisu thaksi halatum aphan pulo, “Apran mesen atum kali, kesodet atumsi daktor nangji.

³²Dhoromi atum kali, bonta papi atum aning kecheruiji aphan kephajisi ne vang-lo.”

³³Bonta halatum alangliphan pulo, “Jon asangho atum abatai batai an humlo, lapen choningrisi Arnam ardombomlo lapen Pharisi atum asangho atumta lapu thakthak-lo, bonta nangsangho atum ke chobom lapen junbom.”

³⁴Bonta Jisu halatum aphan thak-lo, “Piso kechepangri apinso abang dotik ke nangtum piso kepangri kedun atum aphan an pahum un-e, kalima?

³⁵Bonta halatum adung pen kechepangri apinso abang aphan pon-detji, lapen halabangso ahut halatum an hum hurji, lason ahut vangji.”

³⁶Lapen halatum aphan Jisu lamlir penta pulo, “Baduta achoi kemi pen achet ingseksi achoiban bangbe, bonta la klem lote alangli akemi ingsekji lapen achet kemita peban pen chingli-tledetji.

³⁷Lapen baduta drakha ahor kemi ok-reng abong ban pen pangpenpe, kalite la klemlote drakha ahor kemi ke ok-reng abong pangbopsi amethang buphakji lapen ok-reng abongta virdetji.

³⁸Bonta drakha ahorlang kemi ke ok-reng abong kemi pensi pangpenvek nangji.

³⁹Lapen baduta drakha ahorban junversi akemi hanghe, pima ‘aban alang memu,’ pusi alangli puji.”