Read Karbi LUK 9 Bible Online

LUK 9 - Karbi bible

LUK 9

¹Jisu hala bangkrehini atum aphan hangpetsi pangrumlo, lapen kadokave ahi-i atum aphuthak lapen keso hei hei kepameji ajakong pilo.

²Anke Arnam Arat alamjir kepachethangji lapen keso atum aphan kepameji aphan alangli halatum aphan toilo, lapen pulo,

³“Tovar aphan thangta ponri: chin tame, kechorek ajamborong tame, an tame, tangka tame lapen choita akele pon nangne.

⁴Nangtum kelut damji ahem aling, halabangso arongsopi pen barthuthetik ke hadak-le dobomnon.

⁵Lapen nangtum aphan kechakche arongsopi pen nangtum kebarji ahut, halatum aphan kepachere angthek ason, nangtum akeng alongle aduk cheho tekangnon!”

⁶Sangho atum nangbarlo, lapen arong arong Birta Keme pachethang-lo, lapen monit atum akeso hei heita pame ponbomlo.

⁷Herod, atheke Galili a-Govornor, la kadokave keplangbom alam an arjulong-lo; alangli abidi jutdet-lo. Thangbakma manene atum ke Jon kethi pen rengthutang-lo pusi pulo,

⁸lapen manene atum ke Elijah nangcheklang tang-lo pusi pulo, lapen akaprek atum ke hako ahut amontri inut rengthutang-lo pusi pulo.

⁹Herod pulo, “Ne Jon angphun pangthantang-lo; bonta ne lahei hei alamjir arju longbomlang, labangso abang komatma?” Lapen alangli Jisu aphan kethek longjisi bor-ibomlo.

¹⁰Ketoitang atum nangchevoithulo, lapen halatum kopi pisi klemtang-lo, lake Jisu aphan chethanlo. Lapen alangli halatum aphan ponsi, chepapreksi Bethsaida pu arongsopi damjuilo.

¹¹Bonta armu atum labangso alam arjulongsi Jisu aphi phi dunlo. Jisu halatum aphan aning arong pen chak-lo, lapen Arnam Arat alamjir ningjebomlo, lapen akeso kepame nangji atum aphan alangli pamethulo.

¹²Arni kangsam ahut sangho bangkrehini atum vangsi Jisu aphan pulo, “Latum dak adung arei arong hei hei lapen ahavar padamra kechoji amar lapen ke-iji adim kelongjile armu atum aphan toi iknon, pima dak ke kangsamri adimlo.”

¹³Bonta Jisu halatum aphan pulo, “Nangtum methang amat-le halatum aphan kopine kecho ahormu pinon.” Latum thak-lo, “Netum along him plangpho lapen lang a-ok jonni ansi dochot. Netum damra la kadokave armu aphan him nam damnangji putong nangli kepuma?”

¹⁴Pima hadak bang suripho an bak amonit do. Jisu asangho atum aphan pulo, “Bang phokep, phokep thak-ra, asong asongle halatum aphan papangni chom-chom non.”

¹⁵Sangho atum lapuson klemdet aphi,

¹⁶him plangpho lapen lang a-ok jonni Jisu ensi sining anat langsi Arnam aphan chorolo lapen ahirjume hangsi beng-lo, lapen armu atum aphan keparonjisi sangho atum arideng pilo.

¹⁷Halatum chosi ingkrang-lo, lapen halatum kepahin achet-abet hum etsi ton krehini papleng-lo.

¹⁸Arni isi Jisu inutpetsi Arnam ardombomlo, lapen asangho atum alangli long vang-lo. Jisu halatum aphan arjulo, “Ne matma, lake armu atum pisi puloma?”

¹⁹Ansi halatum thak-lo, “Nanglike Jon Baptist pusi manene atum pulo, manene atum ke Elijah, manene atum ke hako ahut amontri inut rengthutang-lo pusi kepu.”

²⁰“Bonta ne komatma? Nangtum pisi pujima?” Lapen Pitor thak-lo, “Nanglike Arnam kebattang Abang-lo.”

²¹Ansi badu aphanta thanri pusi Jisu halatum aphan sodak ahukum pilo.

²²Alangli halatum aphan pulo, “Monit asopo kesung chechak-o nangji lapen sarmar atum, Kurusar atum lapen Aron thekser atum alangliphan chakchedetji lapen alangli bang arideng thiji, bonta nithom arni alangli thurji, la kadokave plangvek nangji.”

²³Ansi alangli halatum do-an aphan pulo, “Mane abang jongsi nephi phi kedunji aning hang-lo tangte alangli amethang aphan chemathathedet-ra lapen arnivang amethang athengparpan cheponra nephi phi padunkrinang.

²⁴Pima amethang apran kecheraiji aning kehang abang aling ke la pangbodetji, bonta ne pen apot amethang apran ingbodet lote alangli ke amethang apran cheraisi pajokji.

²⁵Pima mane abang pirthe adang long-et setta amethangle ingbodette, mate asap vir-lote alangli kopi ale doma!

²⁶Mane abang jongsi ne lapen ne kethan alam pen apot therakduk lote, alangli pen apot Monit a-Sopota mo amethang adak atur pen lapen Po lapen pherangke Kangthir atum adak-atur pen kevangji ahut therakdukji.

²⁷Bonta ne nangtum aphan athikpetsi nangpulang, ladak karjapphrong atum angbong manene atum Arnam arat thek longletik ke thithedetji.”

²⁸Jisu lahei hei alam pudet pen ni nerkep anbak aphi alangli Pitor, Jon lapen Jems aphan cheponsi Arnam kardom damji aphan inglong arludamlo.

²⁹Alangli Arnam kardom ahut alangli mahang a-arje chepharlolo lapen alangli keche-um ape lokphlansi sining kebirlak ason thakthak turbong-lo.

³⁰Ansi banghini amonit alangli pen chingkilo. Latum ke Moses lapen Elijahlo.

³¹Latum adak atur pen cheklang-lo, lapen Arnam kemang akam Jerusalem along kechekokji dokdok alam hei hei atheke, Jisu kethiji alamjir hei heisi chingkilo.

³²Pitor lapen ari asangho atum amek jangklip-lo, bonta halatum amek prangdaksi alangli dak atur lapen alangli long karjapphrong banghini amonit thek long-lo.

³³Halatum alangli pen kechekak ahut Pitor Jisu aphan pulo, “Hemphu, etum dak kedo ko-an akeme! Mandu humthom ili kimlonang; nangli phan ehum, Moses aphan ehum lapen ehumke Elijah aphan.” (Alangli kopisi kepuma, lake alangli chininedet-lo.)

³⁴Bonta alangli keningje ahut inghun ethan vangsi halatum aphan binthip-lo; lapen halatum aphan inghun kebinthip ahut sangho atum pherelo.

³⁵Inghun athan pen ase vangsi pulo, “Labangso abang ke ne-Sopolo, ne kangvaitang abang-lo, alangphan arju phrongnon.”

³⁶Lapen ase jutdet aphi, halatum Jisu aphan inutpetsi thek long-lo, Sangho atum doklipsi halabangso ahut badu aphanta kethek long alam chethanthedet-lo.

³⁷Puthot arni halatum inglong pen nanghirlo, lapen armu akethepi atum Jisu pen chetong-lo.

³⁸Armu angbong pen inut amonit hangsersi pulo, “Thanbang, ne sopo aphan langtha; ne sopo po epumpet.

³⁹Ahut pen ahut hi-i alangphan nepbom lapen hangser titi. Hi-i alangphan hevengpo, angho angpip pasupo; lapen avi pachethai longletik ke alangphan o-edet ason.

⁴⁰Bangso ahi-i aphan kephlungji aphan neli nangli sangho atum aphan choningrilo, bonta alanglitum un-edet-lo.”

⁴¹Jisu thaksi pulo, “O, Nang kekroithekthe lapen kechingkino atum! Komantu an ne nangtum along do nangji langma?” Jisu halabangso amonit aphan pulo, “Nangli sopo dak-le vannon.”

⁴²Halabangso a-oso kevang ahut hi-i alangphan hevengbupsi pacherdak-lo. Jisu hi-i langno aphan ingchek-lo, lapen oso aphan pamethusi apo arideng pithulo.

⁴³Kadokave atum Arnam ajakong pen apot manghuhak-lo. Kadokave atum Jisu keklembom akam aphan kemanghuphrong ahut alangli asangho atum aphan pulo.

⁴⁴“Ne nangtum aphan nangkethanji alam arju pamenon! Pima Monit a-Sopo aphan ke monit atum arideng hodaidetji.”

⁴⁵Bonta sangho atum labangso alam kopima, lake chininedet-lo. Kechini thekthedetji aphansi halatum angno pen la patu tang-lo, lapen la athe kopima pura karjuji aphanta halatum haihedet-lo.

⁴⁶Sangho atum angbong matsi theneima pu alam kechedansei dolo.

⁴⁷Jisu halatum kematha alam chinisi, inut a-oso ensi amethang adung parjap-lo,

⁴⁸lapen halatum aphan pulo, “Ne men pen labangso a-oso aphan kechak abang ke nephanta chak-lo; lapen nephan kechak abang aling ke nephan nangketoi abang aphanta chak-lo. Pima nangtum kadokave angbong akebinei abangsi aketheneilo.”

⁴⁹Lapen Jon pulo, “Hemphu, inut amonit nangmen pen hi-i atum aphan kephlung netum thek long-lo, lapen netum alangliphan kekhangji bor-ilo, pima alangli ke netum along nangkedun abang kalilo.”

⁵⁰Jisu alangliphan lapen akaprek asangho atum aphan pulo, “Nangtum kekhangji bor-iri, pima nangtum abekethurthe abang ke nangtum abelo.”

⁵¹Alangliphan sining keponji ahut nangleji dokdoksi Jisu Jerusalem kedamji pangcheng-lo.

⁵²Alangli aphrang amethang apherangke atum aphan toilo, lapen halatum damsi Jisu aphan kesik pijisi Samaria arong lut damlo.

⁵³Bonta halatum Jisu aphan chakchedet-lo, pima alangli Jerusalem kedamji pu chinilorlo.

⁵⁴Lapen sangho atum, Jems lapen Jon, la thek longsi pulo, “Hemphu, latum aphan kepavirdetjile sining ame nang pahir lonang, lake nangning hangma?”

⁵⁵Jisu chetevarsi halatum aphan ingchek-lo.

⁵⁶Ansi Jisu lapen asangho atum arong kaprek damjuilo.

⁵⁷Alangli tovar kedambom ahut mane abang alangliphan pulo, “Nangli kedamji aling neli nangli phi phi dunkripo.”

⁵⁸Jisu alangliphan thak-lo, “Sirungta angthor do, lapen vo atumta atar do, bonta Monit a-Sopo ke aphu kebira kesangji adim ave.”

⁵⁹Alangli anut kaprek aphan pulo, “Nephi phi nangdun non.” Bonta alangli pulo, “Hemphu, aphrangke neli po aphan nepapip longtha,”

⁶⁰Jisu alangliphan thak-lo, “Kethitang atumle amethang kethitang atum aphan pachepip nang, bonta nangke bithe bitha Arnam arat alamjir pachethang damnon.”

⁶¹Anut kaprek amonit pulo, “Ne nangphi phi dunkriji Hemphu; bonta aphrangsi neli hem chedamsi neli hem asor aphan kechepadi damji ahukum neli pitha.”

⁶²Jisu alangliphan pulo, “Badutame, langnoi otdetsi aphi anat kechelang abang ke Arnam Arat aphan ale ave.”