Read Karbi KETHAN 10 Bible Online

KETHAN 10 - Karbi bible

KETHAN 10

¹Anke HEMPHU neliphan pulo, “Aphrang asonthot arlong plangni soinon lapen lahei kethapji aphan thengpi Asinduk selamnon. Inglong arlura nelong vangnon,

²lapen nang kepaphuktang alongplang along ketok ason thot Ne tokpo, lapen nang lahei sinduk arlo thap nangji.”

³Lasi neli akasia athengpi pen pira selamlo, lapen aphrang asonthot arlong plangni soilo, lapen lahei ponsi inglong arludamlo.

⁴Anke aphrang ketok alamthe asonthotsi lahei alongplang athak HEMPHU tok-lo, atheke Hukum Kep, la inglong along nangtum kechingrumpet arni me angkang pen Alangli keningje ahut nangkepi ahukum. Neliphan HEMPHU longplang nepi lo,

⁵lapen neli chetevarsi nanghirlo. Anke HEMPHU hukum nekepi atengsi ne keselam apira arlo lahei thap-lo, halabangso arni pen lahei hadaksi doverlo.

⁶(Jaakan arat alangtuk-heihei pen Israel atum bar si Moserah anat damlo. Hadaksi Aaron thi-lo, lapen pip-lo, lapen la sopo Eleazarsi Alangli lar kurusar cholo.

⁷Hadak pen latum Gudgodah damlo, lapen ha Jotbathah damlo, la ke lang kedo adimlo.

⁸Inglong along Levi akhei amonit atum aphan Kechejok Asinduk kechepahemphuji aphan HEMPHU bat-lo, latum Alangliphan kurusar akam klempipo, lapen Alangli men pen ahirjume kepi. Lapen latum adeng nonputa lahei helo.

⁹La apotsi Levi akhei atum ke akaprek akhei atum asonsi longle longdunde; kopima latum kelong lake HEMPHU akurusar keplang apot-lo, la HEMPHU kechak ateng-lo.)

¹⁰Neli inglong along jophlikep niphlikep donang-lo, la neli kechengsi aphong keklem ahut asonlo. Puthot aphong HEMPHU neliphan ano chedenlo, lapen nangtum aphan pavirvelo pu nangchedon dunlo.

¹¹Anke Alangli nanglitum aphan kepajajisi nepadamlo, anke nanglitum longle cherailongpo, atheke, Alangli nangphusar atum aphan piji pu chechak-lo.

¹²Non, Israel arat atum, nangtum pen HEMPHU nang Arnam kopisi kehangma nangno chedennon; HEMPHU aphan archonon, lapen Alangli kepi ahukum nangkepi an klemnon. Nangning do-an pen Alangliphan chinghon non lapen ingduknon,

¹³lapen Alangli aron-heihei an kroinon. Nangtum ale aphansi pini ne nangtum aphan lahei nangpilo.

¹⁴Kangtuinei asiningta HEMPHU amarlo; pirtheta Alangli marlo, lapen la along kedo an amartalo.

¹⁵Bonta nangphusar atum aphan HEMPHU lapu-an kanghon kethe Alangli akaprek arat aphan ingvaivesi nangtum aphan ingvailo, lapen nanglitum ke Alangli kangvaitang arat atumlo.

¹⁶La apotsi, non pen HEMPHU aphan kroinon, lapen chingkinodak cheplangrinon.

¹⁷Nang Arnam HEMPHU kadokave arnam-heihei aparta themulo, lapen jakong kedo-an aparta themulo. Alangli ke thepik lapen ingtangrak, lapen Alangliphansi phere nangji. Alangli ke badu abeta dunde, lapen Alangli ke tangka chohangjoije.

¹⁸Jangreng lapen hemepi atum aphan kelang pangripet; etum angbong kedo bang adet amonit atum aphan Alangli inghon, lapen latum aphan pe-ri lapen an pi.

¹⁹La apotsi, halahei bang adet amonit atum aphan kanghon paklangnon, pima nangtumta Ijip adet along bang adet aso plang-lo.

²⁰Nang Arnam HEMPHU aphan kroinon, lapen Alangliphanle archochotnon. Alangliphan kroi-thipnon, lapen Alangli men penle seme tang chotnon.

²¹Alangliphan ro non, Alangli ke nang Arnamlo, lapen nangtum nangmek hini pen thek-long-lo, Alangli kopusonsi thedung lapen manghumeme akam nangklempilo.

²²Nangphusar atum Ijip kedam ahut, latum bang throksi kepvet. Bonta non nang Arnam HEMPHU nangtum aphan sining achiklolongso asonsi pa-ongdung-lo.