Read Karbi KETHAN 11 Bible Online

KETHAN 11 - Karbi bible

KETHAN 11

¹Nang Arnam HEMPHU aphan chinghonnon lapen Alangli aron-heihei an kroinon.

²HEMPHU alam nangtum akethektang pen kopisi pini kecharli loma chemathanon. Laso akethektang ke nangtum, nangtum asomar atum kali. HEMPHU akethe, Alangli jakong, Alangli kangtang-kangsak,

³lapen Alangli manghumeme akam-heihei nangtum thek-long-lo. Ijip arecho lapen adet kangthim aphan Alangli kopisi keklemloma nangtum thek-long-lo.

⁴Ijip aron-armu atum aphan kopusonsi alosei lapen aron ahemkonglong penpen pavirdet-lo, nangtum thek-long-lo, pima latum aphan Talo Ke-er along lang pajang-lo.

⁵Nangtum ladak nanglele ako kejejangtang ajo nangtum apharman Alangli kopisi HEMPHU keklemloma chinilo.

⁶Dathan lapen Abiram, latum Reuben akhei Eliab aso atum aphan keklem alam chemathatha. Kadokave angno longle angho chingpudang-lo, lapen latum aphan, ahemtun, latum apehem-heihei, latum aban atum lapen kepangreng api penpen joilut-lo.

⁷Kalang-lo, nangtumsi la hei thedung akam HEMPHU keklem akam kethekdunlong atumlo.

⁸Pini nangtum aphan nangkepi aron an kroipetnon. Ansi nangtum kelutdamji alongle kecheraiji aphan Jordan Aroi hat unpo.

⁹Nang phusar atum lapen apoton atum aphan HEMPHU kepiji pu kechak, keplang lapen aho-or kedo alongle along nangtum penang ajirkeding dolongpo.

¹⁰Nangtum kecheraiji alongleke Ijip alongle ason kali, hadak nangtum aphrang dolong-lo. Hadak nangtum chili kevar ahut langkeponji aphan kam keklem chepadukpik nangji;

¹¹bonta nangtum kelut damji pu alongleke isi inglong-heihei lapen arlok-heihei, alongle, arve kejang pen kelong alang alongle.

¹²Nang Arnam HEMPHU-si laso alongle aputhak lanapo lapen ningkan arjonta langpo.

¹³Lasi, pini ne nangkepi ahukum-heihei kroinon; nang Arnam HEMPHU aphan chinghonnon, lapen nangning ajakong do-an pen Alangliphan ingduknon.

¹⁴La nangtum klemlote, akenang ahut Alangli nangtum alongle along arve nangtoipo, aphrang arve lapen aphi arveta longpo, anke sok athe, drakha ahorlang, lapen jit ajangthu nangtum aphan dopo,

¹⁵lapen kepangreng api aphanta bap dopo. Kenangji a-an nangtum longpo.

¹⁶Nangtum methang akaprek arnam-heihei atum aphan karchoji lapen kangdukjira HEMPHU pen chepasuilong nangnelo.

¹⁷Nangtum jongsi klemlote, HEMPHU nangtum phuthak aningthihakpo. Alangli arve khang po, lapen nangtum alongle sok kepatheji aphan longle ingtang-ongchot po. Anke nangtum hadak thi dapprangpo, Alangli nangkepi alongle jonghele mesen seta.

¹⁸Lahei ahukum ning chebinon, lapen mon-enon. Lahei nangri along chekokdong non, lapen nangtehang along chehomnon, la nangtum keche mathaji aphanlo.

¹⁹Lahei nangsomar atum aphan thannon. Nangtum hem kedo ahut lapen ingtan kebar ahut lahei alam chethannon, nangtum kesang ahutta, lapen nangtum kam keklem ahutta chethannon.

²⁰Nangtum ahem-heihei lapen anghapi-heihei along lahei toknon.

²¹Anke nangphusar atum aphan nang Arnam HEMPHU kepiji pu alongle along nangtum ajir dingklui an dolongpo. Pirthe athak sining dotik ke nangtum hadak dolongpo.

²²Ne nangkepitang aron-heihei an kroithipnon: Nang Arnam HEMPHU aphan chinghonnon, Alangli hukum an klemnon, lapen Alangliphan kroi-thipnon.

²³Anke nangtum kedambom ahut, halahei akhei atum aphan Alangli phlung-etpo, lapen nangtum apar themu lapen kangtangmu akhei-heihei alongle nangtum cherailongpo.

²⁴Nangtum kedongput alongle anke nangtum alongle plangpo. Nangtum alongle ahoike nitur akejejangtang ajo pen ha nirep Lebanon Anglong-heihei an, lapen Euphratis Aroi anihang pen ha nichi Mediterran Atalo an.

²⁵Halaso alongle along nangtum kedam aling nang Arnam HEMPHU-si bang arat atum nangtum aphan papheredukpo, la Alangli kechechak ateng-lo, lapen baduta nangtum aphan nangkhang un-elo.

²⁶Pini ne nangtum aphan ahirjume lapen ahirjuno nangpachongvai toilo,

²⁷isi ahirjume lake jongsi pini ne nangtum aphan nangkepi nang Arnam HEMPHU ahukum-heihei kroilote;

²⁸bonta isi ahirjuno, jongsi nangtum lahei ahukum kroimolote, lapen aphrang pen karchoche pinlang a-arnam-heihei aphan karchojile suilote.

²⁹Nangtum kecherai ji pu alongle along HEMPHU nang kevan ahut, nangtum Gerizim Anglong pen ahirjume pachethang nangpo, lapen Ebal Anglong pen ahirjuno pachethang nangpo.

³⁰(Laso Anglong hinita Jordan Aroi anichi anat Kanaan aso atum alongri, latum Jordan Arlok alongsi kedo. Latum ke nichi anat si kedo, Gilgal arongso adung Moreh athengpi kangthir pen helolelo.)

³¹Nangtum Arnam HEMPHU nangkepi alongle kecheraidamjisi nangtum Jordan Aroi kap-ji-dokdok-lo. Nangtum la cherailote, lapen hadak dopathirlote,

³²pini nangtum aphan ne nangkepi aron-heihei an kekroiji le chesiknon.