Read Karbi KETHAN 12 Bible Online

KETHAN 12 - Karbi bible

KETHAN 12

¹Nangphusar atum a-Arnam HEMPHU nangtum aphan kepiji alongle along kedo ahut rengtik an kekroi nangji aron lahei helo. Lahei arjutha!

²Nangtum kecheraiji alongle, inglong kangtui-heihei along, inglongso-heihei along lapen thengpi arong arum-heihei along halatum arat atum karcho adim an pavir-et nangji.

³Latum adovan-heihei phri-etnon, lapen kangthir along-e beng-etnon. Asherah arnampi kesoi akumlin an chor-etnon, anke latum lahei along mononphita archochedetpo.

⁴Lahei amonit atum amethang a-arnam aphan karcho ason nangtum nang Arnam HEMPHU aphan archori.

⁵Nangtum kedo-an akhei kedo alongri pen HEMPHU si elong adim ingvaipo, hadak rat atum Alangli ingno vangpetpo lapen Alangliphan archopo.

⁶Hadaksi nangtum athok adan-heihei, kephrin lapen akaprek athok-heihei, phankep pen ephan lapen nangtum adan-heihei, HEMPHU aphan nangtum kechak kepanong adan-heihei, nangtum ningkangsam adan-heihei, pi keching-thokcheng achainong lapen abiresak adan-heihei pipo.

⁷Hadaksi, nang Arnam HEMPHU angno, nangtum aphan kepahirme abang, nang lapen nanghemtun-heihei atum cholongpo lapen nangtum kechoklem akeme ason checholongji.

⁸Halaso arni nangkele ahut, nang-tum keklembom ason klemrinon. Non anta nangtum nangning kehang alingsi archobomlo,

⁹pima nang Arnam HEMPHU nangtum aphan nangkepi alongle along lut-lelang, atheke hadak nangtum ingsamjin pen dolongji.

¹⁰Nangtum Jordan Aroi kehat ahut, HEMPHU-si nangtum aphan longle pacherai longpo lapen hadak pado longpo. Alangli nanghotur atum pen nangraipo lapen hadak nangtum ingsamjinpen dolongji.

¹¹HEMPHU-si elong adim Alangliphan karchoji adim ingvaipo, lapen hadaksi ne nangtum aphan hukum nangkepi ason an Alanglilong vanpi nangpo: Nangtum kevang nangji kephrin athok-heihei, lapen akaprek athok-heihei, nangtum kevan nangji phankep pen ephan lapen nangtum adan-heihei, lapen nangtum HEMPHU aphan kepiji pu kechak kepanong adan-heihei.

¹²Nangsomar atum penpen, nang ban atum penpen, lapen nang rongso along kedo a-Levi atum penpen hadak ning cheparong-ra donon; chininon, Levi atum ke amethang alongle avelo.

¹³Nangtum kechongvai adim aling nangtum kevan athok pilongle;

¹⁴Nangtum akhei-heihei alongri angbong pen HEMPHU kangvai elong adim si nangtum athok pichot nangji. Hadaksi nangtum kephrin athok-heihei, lapen ne hukum nangkepi an pi nangji lapen klem nangji.

¹⁵Bonta nangtum kechopangreng api nangtum nahok-le dotame nangninghang aling pathi tame lapen chotame. Nangtum aphan HEMPHU nangkepi an chotame. Nangtum kedo-an aron ateng pen ingthir tame ingthirthetame lahei cho tame, lahei ke nangtum thijok mate jok-lu a-ok kecho ason chotame.

¹⁶Bonta nangtum lahei avi chonangnelo; lang ason nangtum lahei longle athak dung-et nangji.

¹⁷HEMPHU aphan kepajir adan nangtum kedo adim-heihei along chonangne; nangtum sok-sang, drakha ahorlang, mate nangtum jit ajangthu aphankep pen ephan chonangnelo, kechingthokcheng achainong lapen abiresak, HEMPHU aphan kepanong adan, nangtum ning kangsam adan, mate akaprek adan-heihei chonangnelo.

¹⁸Nang lapen nang somar atum, nangban atum penpen, lapen nangrong along kedo a-Levi atum pen pen lahei athok nangtum nang Arnam HEMPHU angnosi chonangji, nang Arnam HEMPHU kangvaitang elong karcho adimsi chonangji. Hadaksi nang keklem ason an aputhak ning cheparong pen donangji.

¹⁹Chininon nangtum alongle along kedotik ke nangtum Levi atum aphan langkrangri.

²⁰Nang Arnam HEMPHU nangtum alongri kepakam ahut, Alangli kechak ateng, nangtum nangning kehang ahut ok chotame.

²¹Jongsi karcho adim heloving pulote, nangtum aphan HEMPHU nangkepi achainong mate abiresak nangning hanglet ahut pathitame, lapen ne nangkeputang ateng lahei nangtum ahemle checho seta chok.

²²Badutame aron ateng pen ingthir-et mate ingthirthe tame, Alangli thijok mate jok-lu a-ok kecho ason ok pachonang.

²³Ok along Avi kedolang a-ok si chochedet nangji, athema chethe ke vi alongsi kedo, la apotsi ok ke chethe penpen nangtum chonangne.

²⁴Kechoji aphan vi en nangne; la alar lang ason la longle thak dung-et nangji.

²⁵Laso ahukum jongsi nangtum kroilo te, HEMPHU-ke aning ingsam-opo, lapen nangtum lapen nangso-nangsu atum anta domesenpo.

²⁶Nangtum athok-heihei lapen HEMPHU aphan kepanong adan-heihei elong karcho adimle ponvetnon.

²⁷HEMPHU adovan along-le kephrin pangthim athok-heihei hadak-le pajirnon. Lapen nangtum kechoji a-ok athok ta hadak-le pinon lapen dovan athak-le avi ke dungnon.

²⁸Ne nangkepi ahukum an kekroithip penle kroinon, lapen nangtum lapen nangso-nangsu atumta kaike aphan mesenverpo, pima nangtum kopima kechok lapen HEMPHU nang Arnam aningkehang akamsi klemnangpo.

²⁹Nangtum khei atum alongle ketengkheng ahut latum aphan nang Arnam HEMPHU-si pavirpo, lapen ke nangtumla cheraipo lapen hadak do pathirpo.

³⁰Halahei akhei aphan HEMPHU pavirdet aphi, chininon, nangtum halatum adhorom keseke ason charlidunri, pima lake kevirlo. Latum a-arnam-heihei aphan kosonsi karchoma chini bor-i nangnelo, pulote nangtum ta halatum asonthotsi karchoji charlirongpo.

³¹Halatum a-arnam-heihei aphan kercho asonthot nang Arnam HEMPHU aphan archorinon, athema halatum a-arnam aphan karcho ahut latum kehijimmeme akam an latum klemlo, lapen lahei ke HEMPHU hijimpik-lo. Latum ke me angkang along-heihei asomar atum aphanta phrinsi arklilo.

³²Nangtum aphan ne hukum nangkepi ason an klemnon; laso along pakamri lapen la pen thangnatta en-rinon.