Read Karbi KETHAN 13 Bible Online

KETHAN 13 - Karbi bible

KETHAN 13

¹Inut amontri mate mang athe kethan abang isi manghumeme mate isi angthek kepiji chechaktahai,

²la ke nangtum aphan nangtum aphrang pen karchoche a-arnam-heihei aphan keparchoji lapen kepangdukji aphanlo. La kechak ason chekok seta,

³la aphan thangnatta nangno chedendunri, Nangtum aphan aporman nangkelangjisi nang Arnam HEMPHU laphan kerim lo, nangning ajakong do-an pen HEMPHU nang Arnam aphan nangtum chinghonma chinghonhema kelangji aphanlo.

⁴HEMPHU aphanle hungnon, lapen laphanle aman pinon; laphan kroinon lapen Alangli hukum-heihei kroinon laphanle archonon, lapen laphanle kroithipnon.

⁵Bonta HEMPHU abe kethur mang athe kethan abang mate amontri aphan pathilotnon, HEMPHU-si nangtum ban kedo Ijip adet pen nangpajok-lo. Lason amonit ke kehingno amonit-lo, lapen HEMPHU nangtum aphan kai kereng nangji aphan kepi ahukum pen nang-kepasuijisi kebor-ilo laso akehingno pen kejokji aphan. Lason aphan pathilot nangji.

⁶Nangkorte tame, nangsopo tame, mate nangsopi tame, mate kechinghon nangpiso tame, mate nang kechephonei ajirpo jongsi akaprek arnam-heihei aphan keparchoji nangchorungjoi pulote, la ke kehingno akamlo, atheke lahei nang lapen nangphusar atum ta kaita archochepinlang.

⁷Latum angbong mane abang nangtum adung kedo arat atum a-arnam-heihei aphan mate kehelo kedo arnam-heihei aphan keparchoji nangchorung tahai.

⁸Bonta la nangtum aphan nangpabai longri; laphan alamta arjuri. Laphan thangnat akangjinso mate inghon meme paklangri lapen laphan raidunri.

⁹Laphan pathilotnon! Laphan arlong kevarcheng abang plangnon, lapen ke abangphutinta laphan arlong pen pavarlonang.

¹⁰Laphan arlong pen varbopnon! Labangso abang nangtum aphan nangtum ban kedo adim Ijip adet pen nangkepajok nang Arnam HEMPHU pen nangkepasuiji abang-lo.

¹¹Anke kadokave Israel arat atum kopi plang-loma arjulongpo; latum pherepo, lapen badutame mononphi lapuson kehingno akam choklemhaihelo.

¹²Nangtum rongso-heihei along kedo ahut angthek nangtum aphan nang Arnam HEMPHU nangkepi arongso, nangtum arjulong tahai,

¹³ajehak amokevangve amonit nangkhei angbong pen akaprek arnam aphrang pen nangtum karchochepin arnam-heihei aphan karchojira amethang arongso arat atum aphan keja alam arjulongji.

¹⁴Lapuson alam arjulong-lote, arjupame nangji; lapen jongsi lason kehingno akam plangtang-lote,

¹⁵halaso arongso along kedo arat kedo-an, kepangreng api an pathilapnon. Halaso arongso aphan pavirklung nangji.

¹⁶Haladak kedo amonit atum amar an van et-ra, rongso achetai along pangsomnon. Nangtum Arnam HEMPHU aphan kephrin athok kepi ason la rongso along kedo-an me keidutnon. La kaike aphan paruhup-lonang, lapen mononphi pakim-thuthe-detnang.

¹⁷Kepavirji aphan kepanong an amar nangtum aphan thangnatta chebi ri, lapen HEMPHU Alangli ningkethi pen chiruipo, lapen nangtum aphan ingjingso po. Alangli nangtum aphan ingjinsopo lapen nangtum aphan ongdung arat paplangpo, la nangphusar atum aphan kechak ateng-lo.

¹⁸Pini ne nangtum aphan nangkepi ahukum-heihei an kroipet pulote lapen akenang ateng klemlote kechak ateng nangpipo.