Read Karbi KETHAN 14 Bible Online

KETHAN 14 - Karbi bible

KETHAN 14

¹Nangtum ke nang Arnam HEMPHU arat atumlo. Lasi kethi abang phan ningduk ahut, nang ok siri nangnelo lapen nangtehang angden achu chesoi nangnelo.

²Nangtum ke nang Arnam HEMPHU amarlo; pirthe kedo arat atum an angbong pen amethang arat kepaplangjisi Alangli nangtum aphan nang ingvailo.

³HEMPHU ingthirthe pu kepu pachethang amar an ke cho nangne lo,

⁴Lahei api nangtum chotame: Chainong, biresak, bi,

⁵thijok, josung, karju, mate jok-lu,

⁶akeng kemo kechephlak api an, lapen ahiso kecheheje api an cho tame.

⁷Bonta akeng kemo kechephlak lapen ahiso kecheheje api kalite chori. Ka-ut, mengserang, mate coney avo-heihei cho nangnelo. Lahei aphan ingthirthe pusi tin nangpo; latum ahiso checho bonta akeng kemo kechephlak ave.

⁸Phak chori. Lahei ingthirthe pusi tin nangji latum akeng kemo kechephlak do, bonta ahiso chechoche. Lahei api angbong chori mate kethi arpum anta ot-ri.

⁹Abeng kedo lapen alip kedo alang-ok an cho tame,

¹⁰bonta lang along kedo abeng kave lapen alip kave an cho nangnelo; lahei ingthirthe pusi matha nangpo.

¹¹Kangthir avo an nangtum cho tame.

¹²Bonta lahei angbong nangtum cho nangnelo: Vomu, takun, vomu along-lopi,

¹³vomu kiso, vomu ajat an,

¹⁴vo-ak lapen la ajat an,

¹⁵ostrik, vo hamlam, lang avokek lapen vomu ajat an,

¹⁶vo inghu, vo dudu, lapen kethoi chobei avo,

¹⁷lapen vojarong, volongkom arecho, lapen volangjak,

¹⁸vo chokang , volongkom ajat an, volongkom aso ajat lapen vo-arplak-heihei.

¹⁹Arveng kedo bilit phelong an nangtum aphan ingthirthelo; lahei cho nangnelo.

²⁰Kangthir angki, an cho tame.

²¹Amethang kethi api an a-ok chori. Nangtum angbong kedo bang adet aso atum la pachonang, mate nangtum la akaprek bang adet aso aphan la jor tame. Bonta nangtum ke nang Arnam HEMPHU apharmanlo; nangtum ke Alangli arat aso atumlo. Mok kechubom abiresak aso mate abi aso chotun-ri.

²²Phankep pen ephan ke bivetnon, aningkanvang nang hidi along kepathe athe an phankep pen ephan.

²³Anke HEMPHU aphan keparchojira elong kangvaitang adim along damra; hadak Alangli ingno nang sok, drakha ahorlang, jit ajangthu, kechingthokcheng achainong aso lapen abiresak aso phankep pen ephan chodamnon. La klemnon, anke nangtum kaike HEMPHU nang Arnam aphan aman kepiji charlithekpo.

²⁴Jongsi nangphan HEMPHU kepahirme amar phankep pen ephan keponji karcho adim nanghem pen heloving pulote, laheile klemnon:

²⁵Kelongtang amar jorra, tangka le karcho adim along ponnon.

²⁶Nang kopima kepadamji nangningkehang aling padamnon, chainong a-ok, biresak aloso, drakha ahorlang, hor-arak tame, nang Arnam HEMPHU angno, nang lapen nanghem isi atum anta chotame lapen ning cheparongnon.

²⁷Nangtum arongso along kedo a-Levi atum aphan langkrangri; latum amethang alongle ave.

²⁸Kethom aningkan kejut aphongtin nang sok phankep pen ephan vannon lapen la nangrongso along thap-ra bivetnon.

²⁹Laso asok ke Levi atum aphanlo, latum alongle ave, lapen bang adet aso atum aphan, lapen nangrongso along kedo jangreng, hemepi atum aphanlo. Latum vang nangpo lapen kenangji an ponpo. La klemnon, lapen nang keklem asontin along nang Arnam HEMPHU nangpahirmepo.