Read Karbi KETHAN 16 Bible Online

KETHAN 16 - Karbi bible

KETHAN 16

¹Abib achiklole nang Arnam HEMPHU aphan aman kepijile Kejok Amei talonnon; halaso aningve lapen achiklosi Alangli nangtum aphan Ijip adet pen nangpajok-lo.

²Elongvet karcho adim damnon lapen hadak nangtum kepangreng api angbong ejon abiresak mate achainong Kejok Amei a-an lapen HEMPHU nang Arnam aphan aman kepijile thatnon.

³Laso a-ok nangtum kecho ahut, thap kedo ahim pen chori. Athema nithroksi nangtum thapkave ahimsi chonangji, atheke nangtum Ijip ke-o ahut ketong pen nangtum lasonsi klemlo. Laso ahim chonon, atheke la phan kesung ahim pusi irpo, anke nangtum rengtik an nangtum kesung adim la ke Ijip pen nangkebar ahut alam chemathadampo.

⁴Ni throksi nangtum adet along badu ahemta thap avedet nangji; lapen ke kecheng arni arni kangsam kepathi api halaso aningve amat chodet nangji.

⁵Nang Arnam HEMPHU nangkepi arongso along nangtum Kejok Amei athok pipedet tahai;

⁶bonta nang Arnam HEMPHU kangvai adim, atheke la along Alangli men padopo, hadak-le arni kangsam arni kechilut ahut athok pajirnon.

⁷Ok updetnon, lapen la elong karchoji adimle chonon; lapen puthot adap-le hem chevangnon.

⁸Athema la aphi nithrok ke nangtum thap kave ahimsi chonangji, lapen throksi arni ke nang Arnam HEMPHU aphan karchojile chingrumnon, lapen halabangso arni ke kam klemrinon.

⁹Nangtum sok kerot arni pen rui throksi lakhanon,

¹⁰lapen ke Sok-kerot Arong-aje talonnon, nangtum aphan nang Arnam HEMPHU ahirjume nangkepi ateng pen ningkangsam adan kevan pen ajok HEMPHU aphan aman pinon.

¹¹HEMPHU angno nangsomar atum penpen, nangban atum penpen, Levi atum lapen bang adet aso atum penpen, lapen nangtum arongso along kedo jangre lapen hemepi atum penpen ning cheparong non. La ke elong karcho adimle klemnon.

¹²Chechininon, nangtum lahei ahukum klemvekpo; nangtumta Ijip adet along ban donang-lo pu alam chetengneri.

¹³Nangtum asok tidet aphi lapen nangtum adrakha sordet aphi, ni throksi an chepachong Arong-aje talonnon.

¹⁴La nangsomar atum penpen, nangban atum, Levi atum, bang adet aso atum, jangreng atum, lapen hemepi atum, la nangrongso kedo atum penpen ningcheparongnon.

¹⁵Elong karchoji adim nithroksi an rong-aje ketalon pen ajok nang Arnam HEMPHU aphan aman pinon. Ning cheparongnon, pima nangsok lapen nangkam aputhak HEMPHU pahirjumetang-lo.

¹⁶Elong karcho adim nangtum akhei pinso amonit an HEMPHU aphan karchoji aphan ningkan isi phong thom vang nangji: Kejok Amei ahut, Sok-kerot Arong-aje ahut, lapen Kechepachong Arong-aje ahut. Pinso abangphutin isi kepanong adan van nangji,

¹⁷la ke Alangli ke-un-an, nang Arnam HEMPHU Alangliphan ko-anma ahirjume kepi ateng.

¹⁸Nangtum aphan nang Arnam HEMPHU nangkepi arongso alongtin kangsai atum lapen aban atum batnon. Lahei amonit atum rat aphan abe dundepin pen ingsaipo.

¹⁹Latum ahok-hedet nangnelo mate latum kangsai ahut mane abe kedun paklang nangnelo; lapen latum tangka chodeng nangnelo, athema dan-heihei ke kereset lapen ahokpet amonit atum amekta palu thek-lo, lapen latum aphan ahok-he ason papharthek-lo.

²⁰Kaiketa mesen pen lapen ahokpet pen nangji, anke nangtum aphan nang Arnam HEMPHU nangkepi alongle along nangtum kaita dolongverpo.

²¹Nang Arnam HEMPHU aphan nangtum dovan keselam ahut, la adung Asherah arnampi athengpi akumlin bidunri.

²²Kumlin karchoji aphan thangnat along-e parjap-ri; lahei aphan HEMPHU hijimlo.