Read Karbi KETHAN 17 Bible Online

KETHAN 17 - Karbi bible

KETHAN 17

¹Pine kechokche kedo achainong mate abiresak HEMPHU aphan athok pajir nangne; lahei HEMPHU hijimlo.

²Nangtum arongso-heihei along ajehak apinso mate a-arloso atum HEMPHU aphan langplotsi pap klemlo pu nangtum arju long-lote, lapen

³akaprek arnam-heihei mate arni mate chiklopi mate chiklolongsohei hei aphan karcho lapen kangduk pen ajok Alangli pen kechejok aloh ingdilo, lahei ke HEMPHU ahukum pen keparlinlo.

⁴Lason alam nangtum arju long-lote arju tarlipnon. La kehingno akam Israel angbong keplang ahok-lo pulote,

⁵halabangso amonit aphan rongso angtan pondetnon lapen arlong pen varpopnon.

⁶Tebon seta lason amonit aphan jongsi banghini mate la-an sose ahaki alangli puthak dolo pu-ansi pathi unji; la aphuthak jongsi haki kecho abang inutvet pulote pathi un-e.

⁷Haki kecho abangsi kecheng a-arlong var nangpo, anke akaprek amonit atumta laso amonit aphan arlong var dunpo; lasonsi nangtum lason akehingno pen jokpo.

⁸Ahut pen ahut ke achom kangsai atum ajehak alam ke kangsaiji aphan sungkrung ta doji, komatsi longle kelongjima lason alam mate areng keso mate pran-karmut lapen monit kepathi angbong kethak kesung alam-heihei. Lason plang-lote, nang Arnam HEMPHU kangvaitang elong karcho adim damnon,

⁹lapen lason nangtum alam Levi akurusar atum lapen kangsai atum aphan hodai non, latumsi halaso ahut keklem atumlo lapen latumle laso alam aputhak papharlonang.

¹⁰Latum amethang kephar alam nangthanpo, lapen nangtum ke latum kepu asonthotsi klemnangpo.

¹¹Latum keparai alam dengnon lapen latum kepinkhat alam arjunon angton pen.

¹²Mane jongsi halaso ahut adeng kedo akangsai abang mate kurusar alam patepek-lote, halabangso amonit aphan pathilot nangji; lasonsi nangtum lason akehingno Israel pen pavir unpo.

¹³Anke abangphutinta laso alam arjulongpo lapen pherepo, lapen laso akam keklemhaiji abang avedetpo.

¹⁴Nangtum aphan nang Arnam HEMPHU nangkepiji alongle cheraidet aphi lapen hadak kedo pathirdet aphi, nangtum recho nangjima nangnema kompet akhei atum ason, nangtumle pharnon.

¹⁵Chinipamenon, nangtum kangvai arecho ke HEMPHU kangvaitang arecho masi. Alangli ke nangtum methang amonit nangji; bang adet aso angbong pen nangtum recho bat-ri.

¹⁶Aron-armu aphan recho ongdung alosei pado nangne, lapen losei kenamjile alangli Ijip adet monit toi nangnelo, pima HEMPHU pulo, alangli rat atum ke hadak mononphi seta chevoithu nangnelo.

¹⁷Recho ke apiso ongdung donangnelo, pima la alangliphan HEMPHU pen pasuipo; lapen alangli ke rup, ser pen chepaplang-o nangnelo.

¹⁸Alangli recho kecho ahut Arnam aron-heihei lapen kethan alam-heihei aloh epak alangli donangji, lapen la Levi kurusar atum arideng kedo atiri aloh pen ketokdun apak nangji.

¹⁹Laso aloh alanglidungsi bi nangji lapen la pen akai isi porhe nangji, ansi alangli la along HEMPHU hukum kepi an kroithip thekpo.

²⁰Laso alam alangliphan anut kaprek a-Israel akorte apar memu pu kematha pen pahelopo, lapen HEMPHU ahukum kepatepek pen pahelopo. Anke alangli ongdung aningkan an recho cholongpo, lapen la apoton atum Israel aputhak a-ove ove anta pangrilongpo.