Read Karbi KETHAN 19 Bible Online

KETHAN 19 - Karbi bible

KETHAN 19

¹Nang Arnam HEMPHU nangtum aphan nangkepiji pu alongle ahemphu arat atum aphan pavirdet aphi, lapen nangtum halatum arongsopi-heihei, ahem-heihei cherai-et-ra hadak kedo pathirdet aphi,

²Nang Arnam HEMPHU nangtum aphan nangkepiji pu alongle along rongsopi rongthom ke bivet nangji.

³Nangtum tovar selam nangpo, nang Arnam HEMPHU nangtum aphan nangpacheraiji alongle longri kethom phlak-non, anke monit kepa thi abang hadak kat longpo.

⁴Mane abang jongsi mathakrang pen ahotur kali abangphan pathilot pulote, la halahei arongsopi along chepajok dam un lapen jok-longpo.

⁵Atheke mane banghini amonit atum nampi thengpi kepiji aphan damlo, lapen inut abang ke thengpi pibomlo, bonta cho abe pen jokphlotsi ari asangho aphan pathilot-lo, alangli halahei arongsopi along kat pen chepajok unlo.

⁶Jongsi hadak rongsopi erong natsi dochot pulote, la heloving tahai lason ahut alar kehuiji adon atum kepathi apot laphan nepchek tahai lapen aningthisi adai kave abangphan pathi lot tahai. Jat seta, la ke mathakrang pensi ahotur kali aphan kepathi apotsi

⁷Ne nangtum aphan lahei rongsopi rongthom kebivetji aphan hukum nangpilo.

⁸Nangphusar atum aphan HEMPHU kepu ateng nang Arnam HEMPHU jongsi nangtum alongri ahoi pathebom ahut lapen Alangli kechak ateng alongle an nangtum aphan nangpilo pulote,

⁹nangtum puthot rongsopi rongthom ingvaithu nangji. (Pini Ne nangtum aphan nangkepi ahukum an nangtum kroipamelote lapen nang Arnam HEMPHU aphan chinghon lapen Alangli kethan ateng kroilote laso alongle Alangli nangpiji.)

¹⁰La klemnon, anke adai kave abang thinangnelo lapen HEMPHU nangkepi alongle along lahei aphan kepathi apot nangdo avelo.

¹¹Bonta inut amonit jongsi ahotur aphan arlenjoi pen pathilot-lo, lapen kechepajokjisi lahei arongsopi erong along katjuilo.

¹²Lason pulote laso abang arongso ajalin atum laphan pahangdet lapen prankarmut alar kehui adon atum arideng laphan hodai po, anke laphan aninghangte pathipo.

¹³Laphan jinsori. Lason aprankarmut pen Israel atum chepajoknon, anke nangtum along kadokaveta mesen bompo.

¹⁴Nangdung kedo amonit atum ahoi angthek terek-ri, atheke la hako pen nang Arnam HEMPHU si nangtum aphan longle nangkepi ahut kepathirlo.

¹⁵Inut monit kepathi abangphan adai kepadoji aphan isinat ahaki ke dorde; inut amonit adai kedolo pu kehokji aphan hini ahaki anke donangji.

¹⁶Inut amonit jongsi anut kaprek aphan ahok-hepin pen pathilo pu lambok lote,

¹⁷banghinita elong karcho adim damnangpo, lapen kurusar atum lapen kangsai atum pen ajok pangsaipo, atheke latumsi halaso ahut saihem along dopo.

¹⁸Kangsai atum alam angton pen tarlip nangpo; lapen jongsi akorte Israel aphan ahok-he pen lambok lote,

¹⁹kebok kelong abang kephonangji an lamkebok abang aduk longnangpo. Lasonsi nangtum lason akehingno pen jokpo.

²⁰Anke kadokave atumta kopi plang-loma la arjulongpo, lapen latum pherepo, lason akehingno akam baduta mononphi choklem haihelo.

²¹Lason alam along thangnat akangjinsota paklang nangnelo; laso aphan aduk kepi nangji ke apran alar apran, amek alar amek, aso ehong alar aso ehong, ari ehong alar ari ehong, lapen akeng ehong alar akeng ehong.