Read Karbi KETHAN 20 Bible Online

KETHAN 20 - Karbi bible

KETHAN 20

¹Nangtum ahotur pen ron kechedanji kedam ahut nangtum apar ronhemkonglong-heihei lapen losei-heihei lapen ron-armu atum bang nang-ong munak thek-long-lo, seta nangtum latum aphan phereri. Nang Arnam HEMPHU, Ijip pen nangtum aphan nangkepajok abang, nangtum along nangdo dunpo.

²Nangtum ron chedande aphrang, inut akurusar aphrang vang nangji lapen ron-armu atum aphan pu nangji,

³“Israel amonit atum, arjutha! Pini nangtum ron chedandampo. Nangtum ahotur aphan phereri, mate ningcheparun-ri mate pratseiri.

⁴Nang Arnam HEMPHU nangtum along nangdunpo lapen Alangli nangtum aphan nangpahaipo.”

⁵Anke Saihemphu atum pinso amonit atum aphan pupo, “Ladak angbong mane hem kekim mirak bonta la hodaidelang lason doma? Jongsi do pulote alangli hem pachedamnang. Athema jongsi ron along alangli thilot pulote mane si alangli lar hem hodai nangkokpo.

⁶Ladak angbong mane drakha aberi e-mirak bonta alangli drakha athe kelikji avarsai chelonglelang lason doma? Jongsi do pulote, alangli hem pachedamnang. Athema ronkechedan along alangli thilot-lote mane si drakha ahorlang junlongrongpo.

⁷Ladak angbong mane abang arloso kehangdun doma? Jongsi dolote alangli hem pachedamnang. Athema, ron kechedan along alangli thilot-lote mane si alangli kechehangdun a-osopi aphan enpo.”

⁸Pinso amonit atum aphan Saihemphu atum pupo, “Ladak kedo angbong mane abang ningkerunhup-ra phereju abang doma? Do pulote, alangli hem pachedamnang. Athema, la akaprek atum aning pahaidukpo.”

⁹Ron-armu atum aphan saihemphu abang keningje pajut si ahamphangtin aphan ajalin ingvaipo.

¹⁰Nangtum rongsopi erong keteng-kheng ahut, kechengsi la arat atum aphan pachehodaiji avarsai pinangji.

¹¹Latum jongsi anghap-heihei ingpulo, lapen chehodailo pulote, latum kedo-an nangtum aban plang nangpo lapen nangtum aphan kam klem bor-i nangpo.

¹²Bonta halaso arongsopi asor jongsi nangchehodaide, bonta kechedanji aphan si chongvailo, pulote nangtum aron-armu asong latum aphan kompetnon,

¹³anke nang Arnam HEMPHU nangtum aphan rongsopi nangpacheraitoi ahut, la along kedo pinso amonit atum an aphan pathilapnon.

¹⁴Nangtum methang aphan arloso atum aphan, osomar atum, kepangreng api, lapen rongsopi along kedo-an amar pontame. Nanghotur atum amar an nangtum cherai tame. HEMPHU-si nangtum aphan la nangkepilo.

¹⁵Lason helo halahei kehelo arongsopi-heihei aputhak nangtum kedo damji alongle adim pen keklem nangji akam.

¹⁶Bonta nang Arnam HEMPHU nang-tum aphan nangkepiji alongle along nangtum rongsopi-heihei kecherai ahut, abangphutin aphan pathi-etnon.

¹⁷Kadokave arat atum aphan pavir klungnon: Hitti atum, Amor atum, Kanaan atum, Periz atum, Hivi atum lapen Jebusi atum aphan, HEMPHU nangtum aphan hukum nangkepi ateng klemnon.

¹⁸Latum aphan pathinon, anke latum a-arnam-heihei aphan karcho ahut kehijim meme an keklem akethan pen ajok latum nangtum aphan HEMPHU aphuthak langplotsi pap paklemklelo.

¹⁹Isi arongsopi nangtum kecheraiji pu kebor-i ahut, la thesere arong chor nangne, kecherai ajir dingklui setame. Thesere athe cho non, bonta arong ke pavir nangnelo; thengpi arong ke nangtum ahotur kali.

²⁰Nangtum akaprek athengpi arong inghan kebuiji aphan chortame ha rongsopi cherairetik an.