Read Karbi KETHAN 21 Bible Online

KETHAN 21 - Karbi bible

KETHAN 21

¹Pudamlonang, inut amonit aphan mane pathilot thek-long-lo ha nang Arnam HEMPHU nang pachehemphuji ahavar ahidi along kepathitang abang arpum thek-longpo, seta pran-karmut abangphu chinine tangte,

²nangtum ajalin atum lapen kangsai atum damnangpo lapen adung arongso pen kethi arpum along an ko-an helo langma papunlonang.

³Anke adungnei arongso atheke kethi arpum kedo adung arong ajalin atum kam paklemklepinlang achainong api animso ejon ingvaipo.

⁴Latum la lang kekrengkrepin lapen alongle ta hai baibepinlang lapen e-epin alangjeng adung ponnangji lapen hadak latum la angphun ingdisut nangji.

⁵Hadak Levi akurusar atum dun nangji, pima kephangno alam aputhak latumsi aron ateng pen ingsai nangji. Nang Arnam HEMPHU-si latum Alangliphan kepangdukjisi lapen Alangli men pen kepahirmeji aphan ingvailo.

⁶Anke kethi arpum kelong adungnei arongso ajalin atum an chainong aputhak ari charsam nangpo,

⁷lapen pu nangpo, “Laso amonit aphan netumle kepathi kali, lapen la komatsi keklemloma netum chinine.

⁸HEMPHU, nangrat Israel atum aphan diyatha, nangsi latum aphan Ijip pen kevanlo. Netum aphanta diyatha lapen adai kave amonit aphan kepathi arvak netum aphan ne-enrinon.”

⁹Lasonsi, HEMPHU kenangji an keklem pen ajok, nangtum aphan prankarmut adai nang-en-elo.

¹⁰Nang Arnam HEMPHU nangtum aphan ron kechedan along nangkepahai ahut, nangtum monit keneppon ahut

¹¹latum angbong inut abangpi arje mesen lapen nang bangpi aphan nangningdokkhak-lo, lapen ke-enji nangninghang-lo tangte,

¹²Bangpi aphan nanghem chepondetnon, hadak bangpi achu chesoilong po, arichimi cheretpo,

¹³lapen ape-ari cheselepo. Bangpi nanghemsi donangpo lapen apei apo aphuthak chiklo ejon bangpi chiru po; laso aphi, bangpi pen chepangri unpo.

¹⁴Aphi, jongsi nang bangpi aphan akenang avelo pulote, nang bangpi aphan aninghang aling padamlongnon. Nang bangpi pen dim tar pasitang-lo apot si nang bangpi aphan ban ason khang un-elo lapen jordet un-elo.

¹⁵Pudamlonang, inut amonit apiso banghini dolo, lapen latum banghinita bangpo aphan sopo mahangpathekpilo, bonta sokleng abang ke bangpo aningkedok apiso pen aso kali.

¹⁶Bangso amonit asomar atum angbong kosonsi akhi kethakji pu kephar ahut, sokleng kelong nangji apharman aningkedok apiso aso abe dun nangnelo.

¹⁷Asokleng aphan alangli phanni akhi pinangji, la aningkedok apiso asopo kalidet setalo. Inut amonit sokleng komatma chini nangji, lapen laphan la kelong nangji akhi an aron ateng pen pi nangji.

¹⁸Pudamlonang, inut amonit asopo inut dolo, la chingkinodak lapen thurkrapver, la apei apo alam kecharjuje asolo, laphan adukpi seta arjuje.

¹⁹La apo-apei atum kedo arongso ajalin atum along laphan pon nangpo lapen laphan parjapsi hut nangpo.

²⁰Laphan latum punangpo, “Netum aso ke chingkinodak lapen thurkrapver, lapen netum alam arjuje; la tangka phangho-et lapen horjunpik.

²¹Anke rongsopi amonit atum laphan arlongpen varbop-po, lapen ke nangtum lasonsi lason akehingno pen jokpo. Israel atum abangphutin ta kopi plang-loma la arjulongpo, lapen pherepo.”

²²Monit kepathi apot inut amonit aphan pathilot-lo pulote, lapen la abang arpum nujok ehong along vek-lok-lote,

²³hadak la jopangthang pado nangnelo. Halaso arni amat la pipdet nangji. Kalite Arnam ahirjuno dopo. Bang arpum pipnon, anke nangtum nang Arnam HEMPHU nangkepi alongle aputhak pasa-ur-elo.