Read Karbi KETHAN 26 Bible Online

KETHAN 26 - Karbi bible

KETHAN 26

¹Nang Arnam HEMPHU nangtum aphan nangkepiji pu alongle nangtum cheraidet aphi lapen hadak do pathirdet aphi,

²nangtum abangphutinta nanghoton along kerotcheng asok athe bivet nangji lapen la nangtum elong karcho adim along ponvek nangji.

³Halaso ahut adeng kedo akurusar along damnon, lapen punon, “Neli non ne Arnam HEMPHU aphan atheke neliphusar atum aphan kechak netum aphan nekepiji pu alongle along Alangli nepalut-long-lo pu chekrong-lo.”

⁴Nangpen kurusar abang hoton ponpo lapen nang Arnam HEMPHU adovan along la bipo.

⁵Anke, HEMPHU angno nangtum laso alam-heihei patampo: “Ne phusar atum ke kechongvirtap Aram aso atumlo, latum kedodamji pusi Ijip adet ahem asor an cheponlo. Hadak latum kedam ahut aphai ong-e, bonta latum aphai ongdung-lo lapen isi ingtangrak akhei plang-lo.

⁶Ijip atum nelitum aphan chenekpik-lo lapen ban akam nepaklem bor-ilo.

⁷Anke nelitum aphusar atum Arnam HEMPHU aphan kerap kelongjisi hang-lo. Nelitum aphan Alangli ne arjulo, lapen nelitum kechechaknang, akesung, kelangnodak ason Alangli nethek-long-lo.

⁸Alangli ajakong lapen kangtang-kangsak pen ajok Ijip arideng pen nelitum aphan nepajok-lo. Alangli manghumeme akam klemlo, lapen angthek-heihei paklang-lo, lapen kepherememe akam paplang-lo.

⁹Alangli nelitum aphan ladak nevanlo, lapen nelitum aphan keme-o lapen aho-or kedo alongle nepilo.

¹⁰Lasi Alangli neliphan nekepi kerotcheng asok HEMPHU aphan vanpilo.” Tangte HEMPHU angno hoton thok-non lapen hadak archonon.

¹¹Nangphan lapen nanghemtun aphan nang Arnam HEMPHU akeme amar nangkepi apot Alangli phan tengneri; lapen Levi atum lapen bang adet aso atum atheke latum nangtum angbong kedo atum an nangtum ketalon ahut nangpado dunlonang.

¹²Ningkan kethom thom aphongtin nangsok kelong angbong pen phankep pen ephan Levi atum, bang adet aso atum, jangreng lapen hemepi atum aphan pinangji, anke arattinta latum do-an kechoji aphan longpo. Nangtum la klemlote,

¹³HEMPHU aphan punon, “Kangthir et aphan kep pen ephan nelihem chebibepinlo; lahei Levi atum, bang adet aso atum, jangreng atum lapen hemepi atum aphan nangli Nephan kepaklemtoi ahukum ateng pen neli latum aphan pilo. Phankep pen ephan aputhak ahukum an neli kroimome lapen tengnene.

¹⁴Neli ning keduk ahut neli la chochepinlang; neli aron ateng pen kangthirthe ahut seta lahei neli hem pen cho en-epinlang; lapen laso angbong pen kethitang aphan dan neli pipe. Nangliphan neli kroipamelo, O HEMPHU; phankep pen ephan aputhak nangli hukum kepi an ke neli klemlo.

¹⁵Nang kedo adim sining angsong pen nanglangra Nangrat Israel aphan pahirjumetha; netum aphusar atum aphan Nang kechak netum aphan nekepi alongle keme lapen aho-or kedo aputhak pahirmetha.”

¹⁶Pini nang Arnam HEMPHU Alangli aron-heihei an kekroiji aphansi hukum nangpilo; lasi lahei nangning aklong pen kroithipnon.

¹⁷Pini nangtum HEMPHU aphan nang Arnamlo pusi chekrong-lo; Alangli aron-heihei an lapen ahukum an kekroiji aphan nangtum chechak-lo.

¹⁸Pini HEMPHU nangtum aphan amethang amonit pusi Alangli kechechak ateng deng-lo, lapen Alangli aron-heihei an kekroithekji aphansi hukum nangpilo.

¹⁹Alangli kepinchong angbong an pen akaprek akhei apar nangtum aphan pathe muchotpo, lapen nangtum Alangli men aputhak kero lapen aman vanpipo. Alangli kechak ateng nangtum ke Alangli rat aso plangpo.