Read Karbi KETHAN 27 Bible Online

KETHAN 27 - Karbi bible

KETHAN 27

¹Anke Moses, Israel ajalin atum penpen rat atum aphan pulo, “Pini ne nangtum aphan nangkepi kepinkhat alam-heihei kroinon.

²Jordan Aroi nangtum kehat arni lapen nangtum aphan nang Arnam HEMPHU nangkepi alongle arlo kelutdam arni, nangtum ajehak thedung a-arlong parjap nangji, lahei athak vit pamenon,

³lapen lahei athak lahei aron lapen akethan an tokjirnon. Nangphusar atum a-Arnam HEMPHU, nangtum aphan nangkepiji pu kechak alongle keme lapen aho-or kedo alongle along kelutdam ahut,

⁴nangtum ke Jordan paraisi kedolo, lahei a-arlong Ebal Anglong pini Ne nangtum aphan nangkepinkhat ateng parjapnon, lapen lahei vit pamenon.

⁵Hadak isi arlong pen keselam adovan buinon seta lahei along ingchin amar pen kethengthepin abang nangji,

⁶pima nang Arnam HEMPHU aphan kebuipi adovan ke kehong a-arlong kalidet nangji. Hadaksi nangtum kephrin athok pajir nangji,

⁷lapen hadaksi nangtum athok pajir nangji lapen kejelang athok-heihei chonangji, lapen nang Arnam HEMPHU angno kero aning pen donangji.

⁸Kevittang a-arlong-heihei athak Arnam aron-heihei athe tin paklangdak pen tok nangji.”

⁹Anke Moses, Levi akurusar atum penpen Israel arat kedo-an aphan pulo, “Nephan no chedentha, Israel arat atum, lapen ne arjutha. Pini nangtum nang Arnam HEMPHU arat plang-lo;

¹⁰lasi Alangliphan kroinon pini ne nangtum aphan nangkepi aron-heihei an rimpamenon.”

¹¹Anke Moses Israel arat aphan pulo,

¹²“Nangtum Jordan hatdet aphi, rat atum aphuthak ahirjume kepi ahut lahei akhei atum Gerizim Anglong along arjapther nangji: Simeon, Levi, Judah, Issakar, Joseph, lapen Benjamin akhei atum.

¹³Lapen Ebal Anglong along ahirjuno kepi ahut lahei akhei atum arjap dam nangji: Reuben, Gad, Asher, Zebulun, Dan, lapen Naphtali.

¹⁴Levi atum lahei alam asekethe pen ningje nangpo:”

¹⁵Badutame arlong, thengpi, mate tasam pen kumlin keselam abang lapen laphan archojoi abangphan Arnam ahirjuno padonang; kumlin kardom HEMPHU hijimlo. Lapen kadokave arat atum thakdunpo, “Amen!”

¹⁶Apo mate apei aphan aman kepipe abangphan Arnam ahirjuno padonang. Anke kadokave arat atum thakdunpo, “Amen!”

¹⁷Adung abang ahoi keterek abang-phan Arnam ahirjuno padonang. Anke kadokave arat atum ta thakpo, “Amen!”

¹⁸Amekkave amonit aphan kechok-che atovar keja abangphan Arnam ahirjuno padonang. Anke kadokave amonit atum thakpo, “Amen!”

¹⁹Bang adet aso atum, jangreng atum, lapen hemepi atum aphan latum kelong nangji pen kekhang abang aputhak Arnam ahirjuno padonang. Anke kadokave arat atum thakdunpo, “Amen!”

²⁰Apo apiso atum pen dim-tar kepasi pen ajok apo aman kejor abang aputhak Arnam ahirjuno padonang. Anke kadokave arat atum thakdunpo, “Amen!”

²¹Pi atum pen mek-langno akam keklem abang aputhak Arnam ahirjuno paphonang. Anke kadokave arat atumta thak-dunpo, “Amen!”

²²Angjirpi apok mate angjir pateng pen dim-tar kepasi abang aputhak Arnam ahirjuno paphonang. Anke kadokave arat atumta thak-dunpo, “Amen!”

²³Anipi pen dim-tar kepasi abang aputhak Arnam ahirjuno paphonang. Anke kadokave arat atumta thak-dunpo, “Amen!”

²⁴Prankarmutjoi atum aputhak Arnam ahirjuno paphonang. Anke kadokave arat atum thakdunpo, “Amen!”

²⁵Adai kavepin abangphan kepa-thijisi tangka kechodeng abang aputhak Arnam ahirjuno paphonang. Anke kadokave arat atumta thak-dunpo, “Amen!”

²⁶Arnam aron-heihei lapen akethan-heihei an kekroithekthe abang aputhak Arnam ahirjuno paphonang. Anke kadokave arat atumta thak-dunpo, “Amen!”