Read Karbi KETHAN 28 Bible Online

KETHAN 28 - Karbi bible

KETHAN 28

¹Nang Arnam HEMPHU aphan ne pini nangkepi ahukum an kroithip-lo pulote, pirthe athak akaprek akhei apar Alangli nangtum aphan pathemu po.

²Nang Arnam HEMPHU aphan kroinon lapen la kedo-an ahirjume la ke nangtum longpo:

³Nangtum arongso lapen ahidi-heihei HEMPHU nangpahirmepo.

⁴Nangtum aphan ongdung a-osomar, asok, achainong lapen abiresak pen HEMPHU nangtum aphan nangpahirjumepo.

⁵HEMPHU nangtum asok athe lapen lahei pen keselam a-an aputhakta nangpahirmepo.

⁶Nangtum keklem asontin aputhakta HEMPHU nangpahirmepo.

⁷Nangtum aphan nanghotur atum nangketengkheng ahut latum aphan HEMPHU paremdetpo. Latum ehin pen nangtum aphan nangtengkhengpo, bonta latum nangtum pen ahin kaprek kaprek pen katji.

⁸Nang Arnam HEMPHU nangtum akam aputhak ahirjume nangpipo lapen nangtum apuru soksi plengthuppo. Nangtum aphan Alangli nangkepi alongle along la nangpahirmepo.

⁹Nangtum jongsi nang Arnam HEMPHU aphan kroipamelote lapen la ahukum an klemlote, nangtum aphan Alangli methang arat aso nangpaplang po, la ke Alangli kechechak ateng-lo.

¹⁰Anke pirthe athak kedo arat atum an HEMPHU nangtum aphan nangpherepo.

¹¹Nangtum aphan HEMPHU nangkepiji pu nangphusar atum aphan kechak alongle along Alangli nangsomar, nang chainong pa-ongdungpo lapen dorphlup asok nangpipo.

¹²Alangli keplang apuru ahem sining-inghun pen asek ahut arve nangpajongpo lapen nangtum akam an nangpahirjumepo, anke nangtum ongdung akhei aphan param dun longpo, bonta nangtum ke bang pen choram nangnelo.

¹³Nang Arnam HEMPHU khei atum angbong nangtum aphan jalin nangpinchompo, bonta aphi kedun atum kalilo; pini Ne nangtum aphan nangkepi ahukum an kroithip lote kekroi pachemitmedet lote nangtum kaiketa chingthurverji.

¹⁴Bonta nangtum jongheseta lahei kroimorinon mate akaprek arnam-heihei aphan archorinon lapen ingduk-rinon.

¹⁵Bonta nangtum jongsi nang Arnam HEMPHU aphan kroikrelote lapen pini ne nangtum aphan nangkepi ahukum-heihei lapen aron-heihei kroithip pen rim pameme pulote, lahei kehingno an nangtum aphuthaksi vangpo:

¹⁶Nangtum arongso-heihei lapen ahidi-heihei HEMPHU ahirjuno pipo.

¹⁷Nangtum asok lapen lahei pen keselam a-an aputhak HEMPHU ahirjuno pipo.

¹⁸Osomar nangtum aphan nang-pichom pen ajok, sok pame-o-edet pen ajok chainong lapen biresak pachanche pen ajok HEMPHU nangtum aphan ahirjuno pipo.

¹⁹Nangtum keklem asontinta HEMPHU ahirjuno pipo.

²⁰Nangtum jongsi kehingno klemlo, lapen HEMPHU aphan dengmolote, Alangli nangtum aphuthak kevir vanpo, kemanghuloita vanpo, lapen nangtum keklem asontin aputhakta akesung vanpo, la ke nangtum prapjin pen virklungkletik anlo.

²¹Alangli nangtum aputhak nangtum kecheraiji pu alongle along keso chetangphlup-phletik ke keso aputhak keso nangtoipo

²²Nangtum aphuthak keche-un akeso HEMPHU nangtoipo, laso akeso ke ingdakbom lapen aphu keso doji; Alangli nangtum asok kepavirjisi pakreng-angpo lapen pasampridangpo. Nangtum thithetik-ke lahei akevir doverpo.

²³Arve jangjelo, lapen nangtum alongle ingchin asonsi ingtanghetpo.

²⁴Arve alar, longle aduk lapen sangti aduk atomon nangtum vir-et-etik nangtoibompo.

²⁵Nangtum ahotur atum nangtum aphuthak HEMPHU pahaipo. Nangtum latum aphan ehin pen tengkhengpo, Bonta latum pen nangtum akaprek akaprek ahin anat katpo, lapen nangtum aphuthak keplang alam thek-longsi pirthe athak kedo arat atum an pheredukpo.

²⁶Nangtum kethi ahut vo atum lapen marat api atum vangsi nangtum abang arpum-heihei nangchopo, anke latum aphan kepaphere abang avelo.

²⁷Nangtum aphuthak ingthum-heihei HEMPHU Ijip aso aphuthak keklem ason nangtoipo. Keso pen nangtum abang kangji. Bang chipru pen dipthippo, lapen nangtum ingthakpo, bonta me un-e detpo.

²⁸Nangtum aphan HEMPHU nangning parunhuppo; mekkave lapen kemanghu pen HEMPHU nangtum aphan nang arbupo.

²⁹Amek kave amonit atum asonsi anerlota nangtum pherairokpo, lapen nangtum atovar chelonglelo. Nangtum keklem aling thangnatta chingthurthelo. Nangtum aphan kaiketa chenekpo lapen thiparohumpo, lapen nangtum aphan nangkerapji baduta avedetpo.

³⁰Nangtum mane-a-arloso aphan chehang dunpo, bonta bang kaprek si bangpi aphan chepangripo. Nangtum hem kimpo, bonta la nangtum dolong lelo. Nangtum drakha aberi along arong epo, bonta la athe nangtum cholonglelo.

³¹Nangmek angden nangchainong aphang bang thupo, bonta la a-ok nangtum chechodun longlelo. Nangtum kelangbom ahutsi nang gadha aphan bang sanponpo, lapen latum nangphan nangpithuthelo. Nanghotur atum aphan nang biresak pidetpo, lapen baduta nangtum aphan nangkerapdun abang avelo.

³²Nangtum kechelangding ahut nangsopomar lapen nangsopimar atum aphan ban chopipo. Nangsomar atum nangchiruijima pu nangtum arnivangta kelang nangmek so-ang po.

³³Bang adet akhei atumsi nang kechepaduk pen ke-e asok ponpo, laso alar nangtum thangnat ta longle, bonta kaike kechenek lapen keduk akamsi kelong.

³⁴Nangtum akeduk si nangtum aning parunhuppo.

³⁵Nangkeng HEMPHU-si keme-un-e amek pen dipthippo; nangkeng pen nangphu an ingthumsi dipthippo.

³⁶Bang adet along HEMPHU si nangtum lapen nang recho atum aphan ta pondetpo, hadak nangtum lapen nangphusar atum kaita dolonglepinlang hadak nangtum thengpi lapen arlong-heihei pen keselam a-arnam-heihei aphansi ingdukpo.

³⁷Nangtum aphan HEMPHU nangkepratsei adet along, rat atum nangtum keplangtang alam chinisi thirikjokpo; nangtum aputhak latum nang chongthuiripo lapen nang ingnekchoipo.

³⁸Nangtum ongdung achili rikpo, bonta kerot longji ke asap natji, pima phelongsi nangtum asok chopo.

³⁹Nangtum drakha arong epo lapen lahei lanapamepo, bonta nangtum la athe pangrumrelo mate la pen alang junlonglelo, pima ingki atumsi la cho-etpo.

⁴⁰Nangtum alongle along jit ajangthu arong bithe-bitha arong vangpo, bonta nangtum jit ajangthu longlelo, pima jit athe ingjui-etpo.

⁴¹Nangtum asomar pinso lapen arlo ta doji, bonta nangtum latum aphan pangbo-etpo, pima latum aphan ron along keneppon atum aphan asonsi neppondetpo.

⁴²Nangtum athengpi lapen asok ingki atumsi cho-etpo.

⁴³Nangtum alongle along kedo bang adet aso atum ajakong chelong ponbompo, lapen nangtum ajakong nang aveponbompo.

⁴⁴Latum nangtum aphan keparamji ason doji, bonta nangtum ke latum aphan keparamji aphan avelo. Kejut ke latumsi nangtum aphan pangripo.

⁴⁵Lahei an akevir nangtum aphuthak vangpo, lapen nangtum vir-et-etik lahei nangtum along nangdodun-verpo, pima nangtum nang Arnam HEMPHU aphan kroikrelo lapen Alangli nangtum aphan nangkepi aron-heihei an rimredet-lo.

⁴⁶Lahei ke nangtum lapen nangpoton atum aphuthak kaike aphan Arnam kangsai apormanlo.

⁴⁷Asontin anatta HEMPHU nangtum aphan pahirjumelo, bonta Alangliphan nangtum kechehok lapen ning-arong aning pen ingduk thekthedet-lo.

⁴⁸La apotsi HEMPHU nangketoiji ahotur atum aphan nangtum ingduk nangpo. Nangtum ingchirji, ingitji, lapen pe-ri avedetji, asontinta akenang dokokpo. Nangtum virvetik an HEMPHU nangchenekpikpo.

⁴⁹Pirthe kejut ahin pen nangtum aphuthak isi akhei pathurpo, laso akhei alam-aki nangtum chinine. Vomu asonsi latum nangtum aphuthak sokvurpo.

⁵⁰Latum ke angthin ave lapen badu aphanta, osomar lapen arlengkesar atum aphan seta akangjinso ave.

⁵¹Latum nangtum kepangreng api, nangtum asok, cho-etpo, lapen nangtum ke kangchir pensi thipo. Latum nangtum aphan sok, drakha ahorlang, jit ajangthu, kepangreng api mate biresak ejonta bibelo, lapen nangtum thi po.

⁵²Nang Arnam HEMPHU nangkepi adet along arongtin latum tengkhengji lapen nangtum kechiki kangtuiving, keparpongchen apaisong ta ruraipo.

⁵³Nanghotur atum nangtum arong-heihei kekompet ahut nangtum lapu-an sungji nangtum aphan nang Arnam HEMPHU nangkepi nang somar atum aphanta chechoji.

⁵⁴Nangtum angbong areng kangduk lapen jakong kavenei abang ta akorte aphan kecho ason chepipelo, kechinghon apiso aphanta pipelo lapen la along ahin kedo asomar aphanta pipelo;

⁵⁵lasonsi la kechobom asomar a-ok la badu aphanta pipelo, pima la aphan thangnatta avedet-lo, kekomchen pen ajok lapen nangtum aphan nang hotur atum nangtum arong an aputhak nangkepasung pen apot-lo.

⁵⁶Nangtum angbong areng kangduk lapen jakong kave a-arloso, akeng longle dongdepinlang, pima bangpi lapu-an ajakong kave lapen arengkangduk, la bangpi kechinghon apenan aphanta, asopo lapen asopi aphanta aningsopo,

⁵⁷akengdak pen amahang kepathek lapen kepathektang atum aphuthakta aningsopo, pima bangpi latum aphan chojoipo, athema thangnatta avedet apot lapen hotur atum kekompet apot lapen nangtum arong-heihei along hotur atum nangkepasung apot-lo.

⁵⁸Laso aloh along ketok an Arnam akethan kroithipthe pulote, lapen nang Arnam HEMPHU kemanghumeme lapen kepherememe amen aphan aman pi thekthe pulote,

⁵⁹kaike ingtontepin keme un-e akeso-heihei lapen kepherememe avur nangtum lapen nangpoton atum aphuthak Alangli nangtoibompo.

⁶⁰Ijip along nangtum kethektang akepherememe akeso-heihei Alangli nangtum aphuthak puthot nangtoithupo, lapen nangtum kaita memelo.

⁶¹Laso Arnam aron-heihei lapen akethan-heihei along ketokte akeso an lapen avur an Alangli nangtoithupo, lapen nangtum virdetpo.

⁶²Nangtum aphai sining angsong kedo achiklolongso-heihei ason do-olo seta, nangtum angbong kerengji ong-edetji, pima nangtum nang Arnam HEMPHU aphan kroikrelo.

⁶³Nangtum aphan HEMPHU kepachingthurji lapen aphai kepa-ongji aningkedok asonthotsi, Alangli nangtum aphan kepavir ji lapen pavedetji aphan aningdok-lo. Nangtum kecheraiji pu alongle along pen nangtum aphan helang-etpo.

⁶⁴HEMPHU nangtum aphan ehin apirthe pen ahin kaprek an khei atum angbong nanghijikjampo, lapen hadak nangtum thengpi, arlong pen keselam arnam-heihei aphan ingdukpo, lahei arnam ke aphrang penta nangtum lapen nangphusar atumta archochepinlang.

⁶⁵Nahokta nangtum ningkangsam longle, nang methang pu nahokta chepulonglelo; HEMPHU-si nangtum aphan nangtum aphuthak ningkesiksak ningkethethe lapen ningkerunhup, padopo.

⁶⁶Nang-tum akai kaiketa phere nangjupo. Ajo anerlota nangtum kepherememe pensi plengsetpo, lapen nangtum kethi aphan kepheretap pensi dokhangjangpo.

⁶⁷Nangtum kethek-long asontinta phereduk po. Adapvangta arnikangsam asonte pusi cholangdingpo, lapen arnikangsam nanglelote adap asonte pusi mathapo.

⁶⁸Nangtum Ijip puthot dam nangnelo pu HEMPHU pulo seta nangtum aphan hadak Alangli puthot nang toithupo. Hadak ban atum asonsi nang hotur atum arideng nangtum chejorpo, tebonseta nangtum aphan baduta nangnam abang avedetpo.