Read Karbi KETHAN 29 Bible Online

KETHAN 29 - Karbi bible

KETHAN 29

¹Moab adet along Israel lapen HEMPHU angbong kechejok aloh Moses aphan HEMPHU hukum kepi alam-heihei lahelo; lahei ke Sinai Anglong along latum pen HEMPHU kechejok aloh ketok pen abat aloh-lo.

²Moses kadokave arat atum aphan hangpetsi latum aphan pulo, “Ijip arecho, a-saihemphu atum lapen adet kangthim aphan kopisi keklemloma nangtum nangmek-hini pen thek-long-lo.

³Kepherememe avur, manghumeme akam-heihei, lapen HEMPHU keklem thedung thedung angthek-heihei nangtum thek-long-lo.

⁴Bonta pini arni anta nangtum kopima akethektang ason athe nangpachini longlelang.

⁵Ningkan phlikep HEMPHU nangtum aphan kejejangtang ajo nangjaponlo, lapen nangtum ape-ari, lapen nangkeng-op kaita chingseksedet-lo.

⁶Nangtum kechoji aphan him ave, mate drakha ahorlang mate arak kejunji aphan ave, bonta nangtum akenang an HEMPHU padorlo, lake Alangli nangtum Arnamlo pu kepachiniji aphanlo.

⁷Etum laso adim kevang ahut, Heshbon arecho Sihon, lapen Bashan arecho Og nangbarsi etum pen kechedanjisi vang-lo, bonta latum aphan eli paremdet-lo,

⁸latum alongle cheraipidet-lo, lapen lahei Reuben akhei, Gad akhei, lapen Manasseh akhei ebeng atum angbong thak dak-lo.

⁹Laso akechejok aloh aron an kroithipnon, anke nangtum kopima keklem chunpo.”

¹⁰Pini nangtum nang Arnam HEMPHU angnosi karjap-lo, nangtum kadokave, nangjalin atum, lapen kam arpu kedo atum, nangmonit atum,

¹¹arloso lapen osomar atum, lapen nangtum along kedo bang adet aso atum lapen nangtum aphan theng, lang keroi atum antalo.

¹²Pini nangtum ladak kedo ke nangtum pen nang Arnam HEMPHU angbong kechejok aloh along kechejokji aphanlo lapen laso aputhak kedengji aphanlo,

¹³anke non HEMPHU nangtum aphan nangtum Alangli rat-lo lapen Alangli ke nangtum a-Arnam lo pu pachinipamepo, la ke nangphusar Abraham, Isaak, lapen Jakob aphan kechak ateng-lo.

¹⁴La kekroi nangji akechejok aloh along nangtum detle kechejokdun nangji pu HEMPHU keselam kali.

¹⁵Alangli la keselam ke etum ladak kedo kadokave karjapsar kedo an atum aphan penpenlo.

¹⁶Ijip along nangtum kedo akai kopusonma lapen bang adet ajo kedamput ahut kosonma chemathadamtha.

¹⁷Halatum atheng pi, a-arlong, arup lapen aser pen keselam kehijimmeme akumlin-heihei nangtum thek-long-lo.

¹⁸Chinipamenon, nangtum pini ladak karjap angbong pinso, arlo, hemtun mate badu akhei setame kaprek akhei a-arnam-heihei aphan karchojile e-Arnam HEMPHU pen pasuisenang. La ke kehodak athengpi angkur lapen bikar kepathe athengpi arong asonpo.

¹⁹Pini ladak kedo-an atum chinipamenon, lahei alam karjulong atum an chingki-nodak seta thangthe pu chematha pen atovar chedambom abang do pulote, nangtum mesen lapen kehingno pupu aphuthakta virdetpo.

²⁰Lason amonit aphan HEMPHU diyaje, laso alar HEMPHU aningkethi amede labangso amonit aphuthak chodetpo, lapen laso aloh along kevir ason ketok an laso amonit aphuthak laphan HEMPHU pavirklungkletik klopo.

²¹La ke Israel akhei angno isi arjan HEMPHU paplangpo, lapen ladak kechejok aloh along ketok ahirjuno an atheke HEMPHU akethan-heihei aloh along ketok an ason la aphuthak klopo.

²²Mononphi kevangji a-ove nangpoton atum, lapen bang adet heloving kedo atum nanglongle aputhak HEMPHU kevan akevir lapen akesung thek-longpo.

²³Hidi isi aho-or kave ningjoinodakpo, meplum lapen ingti si plengsetpo; thangnat enodakpo, bap anta chingjokjedet po. Nangtum alongleke Sodom lapen Gomorrah, Admah lapen Zeboiim arong sopi asonpo, lahei HEMPHU aningkethi hak ahut pavirdet-lo.

²⁴Anke pirthe adang amonit atum nang arjupo, “Kopisi HEMPHU latum alongle along lason keklemlo?”

²⁵Lapen la akethak-ke, “La ke HEMPHU arat atum Alangli pen kechejok aloh kangdi apot-lo, latum aphusar atum a-Arnam, Alanglisi latum aphan Ijip adet pen kevanlo.

²⁶Latum aphrang penta karchochepin akaprek a-arnam-heihei aphan ingduk-lo, la ke HEMPHU si latum aphan archori pu a-arnam-heiheilo.

²⁷Lasi arat atum aphuthak HEMPHU aningthilo, lapen laso aloh along ketok an akevir latum aphuthak vanlo.

²⁸HEMPHU-ke aningthihak-lo, lapen la aningthipiksi, latum aphan alongle pen phurjok-si bang adet alongle along varchorlo, lapen latum hadaksi pini anta dolang.”

²⁹Etum Arnam HEMPHU ajehak alam kepatujoi dolang; bonta Alangli aron ke paklangtang-lo, lapen kaike aphan eli lapen epoton atum anta la kroiver nangpo.