Read Karbi KETHAN 30 Bible Online

KETHAN 30 - Karbi bible

KETHAN 30

¹Ne nangtum aphan ahirjume lapen ahirjuno angbong nangpachongvai toilo. Lahei ason nangtum aphan nangkeplang ahut lapen nangtum aphan Nang Arnam HEMPHU khei atum angbong nangkepapratsei ahut, Ne nangtum aphan nangkepi akechongvai alam nangtum chemathapo.

²Nangtum lapen nangpoton atum jongsi HEMPHU anat pini Ne nangtum aphan nangkepi ahukum-heihei nangning do-an pen kekroiji aphan nangche-ruilote,

³nang Arnam HEMPHU nangtum aphan ingjinsopo. Nangtum aphan nangkepapratsei akhei atum angbong pen nangvanthupo lapen nangtum aphan Alangli puthot pachingthur-thupo.

⁴Nangtum pirthe kehelonei adimle pratseitame, nang Arnam HEMPHU nangtum aphan nangpangrumpetpo lapen nangvanthupo,

⁵anke nangtum nangphusar atum ephong kedo alongle chepahemphu longthupo. Lapen nangtum ke nangphusar atum apar chingthurmuchot po lapen aphaita ong muchotpo.

⁶Nang Arnam HEMPHU nangtum aphan lapen nangpoton atum aphan kekroithek aning nangpipo, anke nangtum Alangliphan nangning do-an pen chinghon thekpo lapen nangtum hala so alongle along dolongverpo.

⁷Lahei ahirjuno ke nangtum aphan kehijim lapen kechenek ahotur atum anatsi Alangli paklopo,

⁸lapen nangtum puthot Alangliphan kroipo lapen pini ne nangtum aphan nangkepi ahukum-heihei an rimpo.

⁹Nangtum keklem asontin akamta HEMPHU nangpachingthurpo; nangtum asomar ongdungpo lapen kepangreng api ta ongdungpo, lapen nangtum ahidi sok longpikpo. Nangphusar atum aphan kepachingthur kechehok asonsi nangtum aphan Alangli kepachingthurji aphan chehokpo,

¹⁰bonta nangtum Alangliphan kroi nangji lapen laso aloh along ketok aron lapen Alangli akethan an rimpame nangji. Nangning do-an pen nangtum Alanglilong nangchevoi nangji.

¹¹Ne nangtum aphan pini nangkepi ahukum-heihei ke kesungpik kali mate nangtum keklem un-e lapu kali.

¹²La ke sining angsongle kedo kali. Nangtum “Komatsi angsong karlupo lapen netum aphan arum nekevanpipo, anke netum arjulongpo lapen kroi unpo?” Pu punangnelo.

¹³Lapen la ke akaprek atalopi paraisi kedo lapu kali. Nangtum, “Komatsi talopi parai kedampo, lapen la netum aphan nekevanpipo, anke netum la arjulongpo lapen la kroithekpo?” pu punangnelo.

¹⁴Kali, la ke ladak nangtum alongsi dolo. Nangtum la chini lapen jongdamthek, la apotsi non la kroinon.

¹⁵Pini ne nangtum aphan keme lapen kehingno angbong, chethe lapen kethi angbong nangpachongvailo.

¹⁶Nangtum jongsi nang Arnam HEMPHU ahukum-heihei pini ne nangkepi an kroilote, lapen Alangli phan chinghonlo, laphan kroilo, lapen aron an rimlo pulote nangtum chingthurji lapen ongdung arat akhei plangji. Nangtum kecheraiji pu alongle along nang Arnam HEMPHU nangpahirjumepo.

¹⁷Bonta nangtum jongsi kroikre lapen karjujimolo, lapen akaprek arnam-heihei aphan karchoji chejalo pulote,

¹⁸nangtum aphan pavirdetpo, ne ladak non nangtum aphan pacheretoilo. Nangtum keche-raiji pu Jordan parai alongle along nangtum do-o longlelo.

¹⁹Ne non nangtum aphan chethe lapen kethi angbong, Arnam ahirjume lapen Arnam ahirjuno angbong nangpachongvai toilo, lapen nangtum kechongvai ahaki aphan sining lapen pirthe aphan ne hang-lo. Chethe chongvainon.

²⁰Nang Arnam HEMPHU aphan chinghonnon, laphan kroinon lapen laphan kroithip-ra donon, anke nangphusar Abraham, Isaak lapen Jakob atum aphan kepiji pu kechak alongle along nangtum lapen nangpoton atum dolongverpo.