Read Karbi KETHAN 32 Bible Online

KETHAN 32 - Karbi bible

KETHAN 32

¹“Pirthe lapen sining-inghun ne lam arjutha, ne kepu alam tebok-het pen arjutha.

²Arve asonsi ne kethan alam nangklopo lapen longle athak la ar-e cheplangpo. Arongso aputhak ne lam klosirpo bap kangduk aputhak keklo arve asonpo.

³HEMPHU amen ne roji lapen Alangli rat atum la thedung alam chethanji.”

⁴“HEMPHU-ke nangtum aphan thedung nangkechedanpi abang-lo, Alangli tovarke chok-lim lapen ingsaipame; Nang Arnam ke kekroithirklong lapen ahokpet; kopisi akechok lapen akeme la klemlo.

⁵Bonta nangtum ke kekroithirklong-kle, Alangli rat-lo pu kechekrongta chelonle, isi pap keplengset lapen kechobei akhei.

⁶HEMPHU aphan nangtum lasonsi klemnangjima, nang kelu lapen kematha thekthe arat-atum? Alangli ke nangpolo, nang pinchong Abang-lo, Alangli nangtum aphan isi akhei paplang-lo.

⁷Kedamtang alam, hako alam chemathadamtha; nangpo atum aphan kopi plang-loma charjunon, kedamtang alam nangke pathanjile arlengkesar aphan arjunon.

⁸Kangtuinei Abang khei atum aphan alongle pilo; rat atum kodaksi kedo nangjima Alanglisi pathir, Akheitin aphanta inut arnam Alangli pi,

⁹bonta Jakob apoton ke Alangli methang aphansi chongvailo.”

¹⁰“Latum aphan kejejangtang ajo kedamtap long-lo, isi kesampridang, tomon kejapvur akejejangtang ajo. Latum aphan Alangli railo lapen lanalo, Alangli methang aphan kecherai ason.

¹¹Vomule asomar aphan kangjar kethan ason, latum aphan jokvan pen arveng pachepur, Israel atum aphan HEMPHU paklokledet-lo.

¹²HEMPHU inutpetsi arat aphan jalo bang adet arnam akerap hanghe.”

¹³“Latum aphan Alangli kangtui alongle pangritoi, hidi along kopisi arong kevang-loma latum cholo. Arlong along pijo alang latum long; arlong ajo alongleta latum ajit arong chanpilo.

¹⁴Latum achainong lapen abi ongdung achulang long, latum kemenei abiresak, abi, lapen achainong long-lo, kemenei asok tepli lapen kechongvai adrakha ahorlang long-lo.”

¹⁵“HEMPHU arat atum plangbomlo, bonta thurkrap; latum akrom the-o lapen mamrang long-lo. Latum aphan Kepinchong Arnam aphan olo lapen latum thedung Kepajok abangphan dengmolo.

¹⁶Latum kumlin kardom latum a-HEMPHU aphan palang un-elo; latum kehingno klemsi Laphan aning pathilo.

¹⁷Ahok-he arnam-heihei aphansi latum athok pajirlo, aphusar atum kechininepinlang a-arnam kemi-heihei, Israel atum kekroikrepinlang a-arnam-heihei,

¹⁸Latum a-Arnam, latum thedung Kepajok Abangphan chetengnelo, latum aphan chethe kepi abang.”

¹⁹“HEMPHU la thek-longsi, aning thilo lapen asopo lapen asopimar aphan dengmolo.”

²⁰“Ne latum aphan rapdundelo, “ Alangli pulo; “anke latum kopi plang poma Ne langji, kechingkino, kekroithirthe arat atum.

²¹Latum akumlin pen Nephan ning pathilo, latum arnam-heihei apot lang un-elo, arnam-heihei lake athikpet pen arnam kali. Lasi latum aning kepathijisi Ne khei aphan rimpo; latum kepalang un-e-jisi kelu akhei aphan selampo.

²²Ne ning kethi me ade ason karpo lapen pirthe athak asontinta chopo la pirthe aber anta lepo lapen inglongpi angkur-heihei chopo.”

²³“Latum aphuthak Ne kejutjepin akevir vanpo lapen latum aphan Nethai aso kedo-an appo.

²⁴Kangchir lapen keso pen latum thiji; kepherememe akeso pen latum thiji; latum aputhak kepatengkhengjisi Ne nampi api toiji, lapen abi kedo apherui latum aphan parchupo.

²⁵Tovarpi-heihei along ron vangsi kethi vanpo; hem-heihei along kephere lutchokpo. Risomar lapen okarjang atum thiji; oso thi-i lapen akesar atumta jokjelo.

²⁶Ne latum aphan pavir pamepo, anke baduta latum aphan chemathathelo.

²⁷Bonta latum ahotur aphan Ne pachepindak longle, latum Ne rat aso aphan paremdet-lo pu; la ke Ne methangsi latum aphan kesorlerlo.”

²⁸“Israel atum ke kematha thekthe akhei; latum abidi avepin-khangjang.

²⁹Latum kopi apotsi keremloma chechinine; kopi plang-loma latum chechinine.

³⁰Kopi apotsi bang suri aphan inut keparemlo lapen surikep aphan banghini paremlo? HEMPHU, latum Arnam latum aphan obup-lo; latum kangtangnei Arnam latum aphan obup-lo.

³¹Halatum ahotur atum a-arnam ke ingtangte pu latum chechini, Israel a-Arnam ason ingtangrak-re.

³²Latum ahotur, Sodom lapen Gomorrah ason kehingno, lake athe keho lapen abi kedo adrakha athe ason,

³³pherui abi pen keselam adrakha ason.”

³⁴“Latum ahotur kopima keklem HEMPHU chemathadamlo latum aphan kechok apor aduk kepijisi inghongding-lo.

³⁵HEMPHU latum aphan alar huiji lapen aduk piji; latum kekliji apor nangleji; latum kevirji apor tebok-het-lo.

³⁶HEMPHU arat aphan chepajokji latum ajakong kave Alangli kethek-long ahut. Alangliphan kangduk atum aphan Alangli ingjinsoji, latum kerap kavepin la kethek-long ahut.”

³⁷Anke arat aphan HEMPHU arjupo, “Nangtum kechiki ajakong kethe arnam-heihei konat-lo?

³⁸Nangtum latum aphan athu kedo athok pensi pacholo ke lapen kejunji adrakha ahorlangta pilo. Latum non pavang-ra nangparap lonang; Latum nangtum aphan nangpajok lonang.”

³⁹“Ne lapen Ne inutpetsi Arnam chot; akaprek arnam ke ahok kali. Ne pathi lapen chethe pi, areng amekta pado lapen pame, lapen Ne kopima keklem baduta nang hili un-e.

⁴⁰Nechenam kereng et Arnam, Ne Neri chejarlo lapen chechak-lo

⁴¹Ne ke Ne kekar-ang anokjir arsopo lapen ahok akangsai kedoji aphan langpo. Ne hotur atum aphuthak Ne alar huipo lapen Nephan kehijim atum aphan aduk pipo.

⁴²Ne thai aso latum avi paklopo, lapen Nephan kekhang atum aphan Nenokjirsi pathipo. Ne pen kechedan amonit aphan Ne langdingde; arengkesochot lapen keneppon atum anta thiji.”

⁴³“Khei atum, nangtum HEMPHU arat aphan rovek nangji latum aphan kepathi atum aputhak Alangli adukpilo. Alangli hotur atum aphuthak alar huilo lapen arat atum apap-heihei diyalo.”

⁴⁴Laso alun Moses lapen Nun asopo Joshua parjulo, ansi Israel arat atum la arjulong-lo.

⁴⁵Rat atum aphan Arnam akethan-heihei Moses thantangdet aphi,

⁴⁶alangli pulo, “Pini ne nangtum aphan nangkepi lahei ahukum kekroi thekji aphan chini pamenon. Nangsomar atum aphan lahei kethan ruibomnon, ansi latum Arnam akethan an kroithip thekpo.

⁴⁷Lahei akethan ke jungjung alam kali; lahei ke nangtum achethebinong-lo. Lahei kroinon anke nangtum kecheraidamji pu Jordan alongle along kedo arni pading thekpo.”

⁴⁸Halaso arni amat Moses aphan HEMPHU pulo,

⁴⁹“Abarim Anglong-heihei anat damnon, la ke Moab adet, Jeriko arongsopi chingden lo; Nebo Anglong arludamnon lapen Israel arat aphan Ne kepiji pu Kanaan alongle langnon.

⁵⁰Hor anglong along nangli ik Aaron kethi ason nanglita halaso anglong along si thipo,

⁵¹pima Israel arat angno nanglitum banghinita Neliphan kroithipthe det-lo. Nangtum Meribah alang-heihei along kedo ahut, la ke Zin akejejangtang ajo Kadesh arong so adung-lo, rat atum angno nangtum Nephan aman pipedet-lo.

⁵²Laso alongle nangli ha kehelo pensi langpo, bonta Israel arat aphan Ne kepi alongle along nangli lutdun longlelo.”