Read Karbi KETHAN 33 Bible Online

KETHAN 33 - Karbi bible

KETHAN 33

¹Moses, la Arnam amonit, alangli thithe aphrang Israel arat aphuthak kepi ahirjume lahei helo:

²Sinai Anglong pen HEMPHU vang-lo; Edom aputhak arni kethur asonsi Alangli thurlo lapen Paran Anglong pen arat aphuthak turdang-lo. Surikep apherangke Alanglilong dolo, ari ar-e ke ketur-ang amede ason.

³HEMPHU ke arat aphan chinghon lapen Alanglilong kedo atum an aphan rai. Lasi ili Alangli kengri ingphun pangkilo lapen Alangli hukum-heihei kroilo.

⁴Moses ekepi Aron nelitum kroi, la netum akhei kechibivek nangji akhilo.

⁵HEMPHU-ke amethang arat Israel arecho plang-lo latum akhei lapen ajalin atum kechingrum pet ahut.

⁶Reuben akhei aphan Moses pulo: “Reuben ke arat ong-edet seta, pathithedetnang.”

⁷Judah akhei aputhak alangli pulo: “HEMPHU, latum kerap kehang arjutha; Akaprek akhei atum pen latum aphan pangrumpetnon. Latum aphan chedanpinon, HEMPHU, Lapen latum ahotur abe kethur ahut rapdunnon.”

⁸Levi akhei aputhak alangli pulo: “Nang, HEMPHU, Urim lapen Thummim pen ajok nangning kehang paklangnon lake Levi, kekroithirklong nangban atum pen; Massah along nang latum aphan asat ennon Lapen Meribah alang-heihei along latum ahok pu aporman enlo.

⁹Nangphan latum kekroi-o chepaklang-lo Anke apei-apo aphan, akorte, mate asomar aphantalo. Latum nang hukum-heihei kroilo Lapen nang kechejok aloh aputhak kroithip-lo.

¹⁰Latum Nangrat aso aphan nang Aron thanpo; Latum nang dovan athak athok pajirpo.

¹¹HEMPHU, latum akhei kangtangrakjile rapnon; Latum kopima keklem ning ingsamnon. Latum ahotur an aphan sorlamnon; anke latum kaita thur un-edetpo.”

¹²Benjamin akhei aphuthak alangli pulo: “Laso akhei aphansi HEMPHU chinghon lapen rai; Alangli latum aphan joparnita raiver, Lapen latum angbong Alangli do.”

¹³Joseph akhei aphan alangli pulo: “Latum alongle aputhak HEMPHU arve pen pahirmenang Pirthe aklong pen lang pavangpinang.

¹⁴Latum alongle botor pen kepathe athesere pen paplengset nang, Abotor tin along kelongdun athesere kemenei palongnang.

¹⁵Latum hako anglong-heihei kangvaitang athesere pen paplengsetnang.

¹⁶Akeme ason latum alongle paplengsetnang, HEMPHU ahirjume kepi pen ajok, Me kekar ang pen lam keningje Abang. Lahei ahirjume Joseph akhei along pavangnang, Pima akorte atum angbong la si ajalinlo.

¹⁷Joseph ke chainong ajakong do, la anu chai anu asonlo La anu-heihei ke Manasseh aphan asurisurilo Lapen Ephraim aphanta surikep-lo. Lahei pen la khei atum aphan tong-lo Lapen pirthe kejut ahoi an phlung-lo.”

¹⁸Zebulun lapen Isaakar akhei aphan alangli pulo: “Talo along Zebulun abeha keklem pachingthur nang, Lapen ahem along Issakar akhi pabatbom lonang.

¹⁹Bang adet atum aphan latum inglongpi along pha Lapen ahok athok hadak latum pi. Talo pen latum akhi long Lapen talo akungsoding asangti pen ta longdun.”

²⁰Gad akhei aphan alangli pulo: “Arnam aphan ronang, athema Alanglisi latum ahoi pathelo. Gad ke hingho asonsi chonghong Ati mate aphu areng kangsekji aphan.

²¹Latum amethang aphan akemenei alongle si enlo; Isi jalin akam latum aphan pek-lo. Latum HEMPHU ahukum lapen aron-heihei kroilo Israel ajalin atum an kechingrumpet ahut.”

²²Dan akhei aphuthak alangli pulo: “Dan ke ejon ahinghosolo; La Bashan pen chonhamlo.”

²³Naphtali akhei aphuthak alangli pulo: “HEMPHU aning kedok pen Naphtali aputhak pahirjumepik-lo; Latum alongle Galili alangbi pen nitur an le.”

²⁴Asher akhei aphuthak alangli pulo: “Asher ke akaprek akhei apar ahirjume kelong atumlo. Alangli ke akorte atum aningpadokpik nang, Lapen alangli alongleke jit arong pen paplengsetnang.

²⁵La arongso-heihei ingchin anghap pen parailonang, Lapen la kaiketa jokvan pen padolongnang.”

²⁶Israel arat atum, jat aser tame nangtum a-Arnam ason kali, sining adang-bithe ahir-asang pen kardon, inghun bithe nangphan nangkerapjisi kardon.

²⁷Arnam ke kaiketa nangphan nangraiverlo; Alangli kaike kedo ari ke nang archak-lo. Nangtum dambom ahut Alangli nanghotur aphan phlung-lo; lapen Alangli latum aphan pavir-etnon pusi nangphan nangpulo.

²⁸Lasi Jakob apoton atum Ijip along ingsamjin pen dolong-lo, sok-sang lapen drakha ahorlang kedo alongle along kedo jokvanlo, hadak sining pen ar-e vangsi longle pachamlo.

²⁹Israel, nang ko-an kerengme! Nang asonthot baduta ave, HEMPHU pen ajok kepajok akhei. HEMPHU amethangsi nangchong lapen nokjirlo, nangphan nangkechedanpiji lapen kepahaiji aphan. Nanghotur atum vangsi kangjinso chohangpo, lapen nang latum aphan dongruipo.