Read Karbi KETHAN 4 Bible Online

KETHAN 4 - Karbi bible

KETHAN 4

¹Rat atum aphan Moses pulo, “Neli nangtum aphan nangkethan aron an kroipetnon, lapen nangtum rengpo, lapen nangtum Arnam, HEMPHU nangphusar atum aphan kepijipu alongle cherailongpo.

²Neli hukum nangkepi along thangnatta pakamri, lapen pakom nangnelo. Neli nangkepi nangtum Arnam HEMPHU ahukum kroinon.

³Peor Anglong HEMPHU kopisi keklem loma nangtum methangsi chepulo. Hadak kedo Baal aphan karcho atum an abangphutin aphan Alangli pathi-et-lo,

⁴bonta nang Arnam HEMPHU aphan kekroithip atum ke nonputa reng-et-lang.”

⁵Kedo-an aron neli nanglitum aphan nangthanlo, neli Arnam HEMPHU neliphan kepaklemtoi ateng-lo. Nanglitum ketengkhengji lapen kecheraiji alongle alongta lahei kroinon.

⁶Lahei kroithipnon, lapen ajok akaprek akhei atum aphan nanglitum resetpu pachinipo. Latum lahei aron arjulong pen pupo, “Laso akhei ko-an agian lapen akemathathek ke-ong loma!”

⁷Akaprek akhei atum ko-an theloma etum akenang ahut HEMPHU Arnam aphan adung kelong ason latum lason a-arnam longle. Alangli eli kerap kehang ahut ethak.

⁸Badu akhei ko-an thetame, pini neli nanglitum aphan nangkepi ahok-akangsai aron ason halatum ave.

⁹Nangmethang cherepamenon! Nangtum nangmek hini pen kethek-long an, rengtik an ketengnenedetjile chemathanon. Nangsomar lapen nangsumar atum aphan.

¹⁰Sinai Anglong along HEMPHU angno nangtum karjap alam chethannon, halaso ahut Alangli neliphan pulo, “Rat pangrumnon. Ne kopima kepu latum arjulong nangji, anke latum rengtik an latum Nephan kroithekpo, lapen latum asomar atum aphan lahei kepaklem ji aphan chethanpo.”

¹¹Nangtum kosonsi inghun karthat kangtingthip amehi lapen sining an keturbong ame pen kedipthip anglong akeng-ri karjap-loma nangsomar atum aphan thannon.

¹²Kosonsi nangtum aphan me pen ningjeloma lapen kosonsi alangli nangtum aphan ningjelo bonta nangtum Alangliphan thek-longle laso alam latum aphan thannon.

¹³Nangtum pen Alangli kopisi kechejok aloh alam nangtum kekroi nangjima Alangli nangthan-et-lo, atheke nangtum Hukum Kep Kroivek nangji pu alam, la ke Alang-lisi plangni a-arlong aplang along tok-lo.

¹⁴Nangtum ketengkhengji lapen kecheraiji adet along nangtum kopisi kekroi nang jima nangtum aphan kepathanjisi HEMPHU neliphan nepulo.

¹⁵Sinai Anglong along nangtum aphan HEMPHU me pen kepu ahut, Alangliphan nangtum thangnat arje thek-longle. Nangtum akeme aphan,

¹⁶pinso mate arloso arje akumlin nangtum aphan ke selam pen ajok pap klemnangnelo,

¹⁷pi mate vo arje tame selam nangnelo,

¹⁸mate pherui mate lang-ok arje tame kumlin selam nangnelo.

¹⁹Nangtum sining angsong arni, chiklo lapen chiklolongso-heihei kopima kethek-long aputhak karchoji lapen kangdukjira asat chepaklo nangnelo. Nangtum Arnam HEMPHU-si lahei akaprek arat atum keparchoji aphan bipi lo.

²⁰Bonta nangtum ke Alangli Ijip adet kekar-ang amede pen kepajoktang arat-lo. Nangtum pini keplang asonsi Alangli nangtum aphan amethang arat kepaplangji si nangtum aphan Alangli nangvanlo.

²¹Nangtum pen ajok Nangtum Arnam HEMPHU neliphan aningthihak-lo, lapen nangtum aphan Alangli nangke piji pu aho-or kedo alongle along Jordan Aroi kapsi dunlonglelo pu pachethang lo.

²²Laso alongle alongsi neli thipo, lapen langroi kaita neli kapke lo, bonta nanglitum ke hatsi aho-or kedo alongle cheraiji dokdok-lo.

²³Chechininon, nangtum pen HEMPHU nang Arnam pen kechejok aloh alam tengneri. Thangnat akumlin nangtum aphan keselamledetjile Alangli hukum kroinon,

²⁴pima nangtum a-Arnam HEMPHU kekar-ang ame ason, Alangli ke anut kaprek aphan pekpe.

²⁵Nangtum jongsi det along ajirdingklui an do setame nangso lapen nangsu do-olo setame, nangtum methang aphan pine a-arje akumlin keselam pen ajok pap klemrinon. La ke HEMPHU angno kehingnopik akamlo, lapen laso akam Alangliphan aning pathipo.

²⁶Pini neli nangtum ahaki kepachojisi sining lapen pirthe aphan hang-lo, atheke nangtum jongsi Nephan kroikrelo pulote, nangtum prapjinpen laso adet pen avedetpo. Nangtum kecheraiji pu alongle Jordan parai along do longverve detpo. Nangtum aphan pavirklungpo.

²⁷Akaprek akhei atum angbong nangtum aphan HEMPHU nang papratseipo, nangtum hadak inut banghini anbaksi reng-longchotji.

²⁸Hadak nangtum monit ari pen keselam a-arnam atum aphansi ingduk nangpo, lake thengpi lapen arlong a-arnamlo, kethek-longle lapen karjulongle a-arnam atumlo, chota cho thekthe, ingnim ta ingnim thekthe.

²⁹Hadak nangtum Arnam HEMPHU aphan cholangdingpo, lapen nangning aklong pen Alangliphan rilote, nangtum Alangliphan longji.

³⁰Nanglitum kesung ahut lapen lahei nanglitum aphan keplang ahut, anke nangtum padusi Alanglinat chevoipo lapen Alangliphan kroipo.

³¹Alangli ke kangjinso thepik Arnam. Alangli nangtum aphan o-e lapen pavirdetde, lapen Alangli methang nangtum aphusar atum pen Kechejok Aloh alam tengnene.

³²Hako alam, nangtum mahang-thekthe aphrang alam chematha damtha, hako ahut pirthe athak Arnam monit aphan kepinchong ahut alam pirthe adang ri-etnon. Lasonthot thedung akam aphrang plang-loma? Lasonthot alam mane aphrang arjulong-loma?

³³Nangtum non kelong ason monit atum Arnam me pen keningjevoi karjulong arat atum pirthe dolo ma?

³⁴Kaprek arnam atum isi arat aphan kaprek akhei angbong pen kevanji aphan damhaijima, lapen nangtum aphan HEMPHU Arnam Ijip along nangkeklem ason amethang arat chepinchong unjima? Nangtum amek angden Alangli jakong lapen kangtang chepaklang-lo Alangli avur lapen ron vanlo, manghumeme ason ason Alangli klemlo lapen kepherememe akam paplang-lo.

³⁵HEMPHU ke nangtum aphan la paklang-lo, la ke Alangli inutnatsi Arnamlo, lapen akaprek avelo pu aporman nangpilo.

³⁶Sining pen Alangli se nangtum aphan parjulong-lo, anke Alangli nangtum aphan pinkhat unpo; lapen ladak pirthe athak nangtum aphan Alangli men kangthir nangpathek-long-lo, lapen Alangli la pen nangtum aphan ningjelo.

³⁷Nangtum aphusar atum aphan Alangli chinghon-o apotsi, nangtum aphan Alangli ingvailo, lapen Alangli thedung ajakong pen nangtum aphan Alangli ha Ijip pen nangvanlo.

³⁸Nangtum dambom ahut, Alangli nangtum aphan kethedung lapen kangtangrak akhei atum aphan phlung-lo, anke Alangli nangtum aphan nangvansi halatum alongle nangpidetpo, la so alongle helo nangtum kechepahemphuji alonglelo.

³⁹Lasi pini chemathanon, lapen kaiseta tengnerinon: HEMPHU-ke sining lapen pirthe a-Arnamlo. Akaprek arnam avelo.

⁴⁰Neli nangtum aphan pini nangkepi aron an kroinon anke nangtum lapen nangpoton atum kaike mesenpo. Nangtum kaike kechepahemphuji nangtum Arnam HEMPHU nangkepi alongle along nangtum dolongverpo.

⁴¹Anke Jordan Aroi anihang anat rongthom arongsopi Moses bivet-lo

⁴²hadak mane amonit jongsi ahotur kali bonta mathakrang amat mane aphan pathilot-lote, chepachongdam unpo, lapen lahei arongsopi along jokpo, lapen laphan pathithelo.

⁴³Reuben akhei aphan Bezer arongsopi ha kejejangtang ajo apam dolo; lapen Gad akhei aphan ke Ramoth dolo, lake Gilead alongrisi kedo; lapen Manasseh akhei aphan ke Golan, la Bashan alongri along dolong-lo.

⁴⁴Israel arat atum aphan Moses Arnam aron-heihei lapen akethan-heihei pilo.

⁴⁵Israel aso-atum Ijip pen kevang ahut Moses halatum aphan kethan ahaki-heihei, aron-heihei, lapen kangsai-i aron-heihei lahei helo.

⁴⁶Lake Jordan parai Bethpeor angdenchit a-arlok, Amor atum arecho Sihon adet, la Heshbon alongsi kedo, laphan Moses lapen Israel aso atum Ijip pen kevang ahut paremdet-lo.

⁴⁷La alongle latum cheraidet-lo, lapen Bashan arecho Og lata anut kaprek Amor atum arecholo, la Jordan anihang anatsi kedo, laso alongleta cherai pidet-lo.

⁴⁸Laso alongle Aroer arongso pen Arnon Aroi an, lapen ha Sirion Anglong anirep an.

⁴⁹La Jordan Aroi anihang alongri anta parlo-lo lapen ha Kethi Atalo anitur lapen Pisgah Anglong akeng-ri anta parlolo.