Read Karbi KETHAN 5 Bible Online

KETHAN 5 - Karbi bible

KETHAN 5

¹Israel arat an aphan Moses hangpet-lo, lapen latum aphan pulo, “Israel arat atum, pini nanglitum aphan ne nangkepi aron-heihei an arjutha. Lahei charlinon, lapen lahei kroilo pura chesikthipnon.

²Sinai Anglong along etum Arnam HEMPHU isi kechejok aloh pathik lo,

³elitum apo atum penchot lapu kali, bonta pini elitum kerenglang atum an penlo.

⁴Me pen hadak inglong along nangtum angnosi HEMPHU nangtum aphan ningjelo.

⁵Alangli kopisi kepuma laso alam nanglitum aphan nangkethanjisi neli ke, HEMPHU lapen nanglitum angbongsi arjap-lo, pima nangtum me pherelo, lapen inglong arludam un-e.” HEMPHU pulo,

⁶“Neke nangtum Arnam HEMPHU, nangtum ban kedo adim, Ijip pen nangkepajok a-Bang-lo.”

⁷Ne ingno nangtum badu a-Arnam avedet nangji.

⁸Sining mate pirthe athak mate pirthe aber alang arlo, nangtum aphan thangnat akumlin selam nangnelo.

⁹Badu akumlin aphanta ardomri lapen laphan archori, athema Ne ke HEMPHU nang Arnamlo, lapen Ne ke Nelar badu aphanta chakche. Nephan kehijim abangphan lapen la aso-asu aphan ove kethom lapen ove phli anta aduk kepi abang lo.

¹⁰Bonta Nephan kechinghon lapen Ne hukum kekroi atum aphan suri suri a-ove anta Ne kanghon paklangji.

¹¹Kehingno kematha pen Nemen en nangne, athema Ne, HEMPHU nang Arnam Nemen ke-entap aling aphan adukpiji.

¹²Kesang arni talonnon, lapen la bi pangthirnon, Ne HEMPHU nang Arnam hukum nangkepi ateng-lo.

¹³Nangtum akam kecheklemji aphan ni throk dolo,

¹⁴bonta throksi arni ke kesang arnilo la Nephan kehodai tang arnilo. Halaso arni baduta kam klem longlelo, nangtum seta, nangsomar atum, nang ban atum, kepangreng api atum, mate nangtum angbong kedo bang adet aso atum setame klem longlelo. Nangtum kesang ason nang ban atum jokta sanglong nangji.

¹⁵Chemathatha, Ijip along nangtum jokta ban si donang-lo, lapen Ne HEMPHU nang Arnamsi Ne thedung ajakong lapen akangtang pen nangtum aphan nangpajok-lo. La apotsi Kesang Arni ketalonji aphan Ne nangtum aphan hukum nangpilo.

¹⁶Nangpo nangpei aphan aman pitu, la Ne HEMPHU nangtum Arnam hukum nangkepi ateng-lo, anke kadokaveta mesenpo, lapen Ne nangtum aphan nangkepiji pu alongle along nangchethe dinglenpo.

¹⁷Pran armut-ri.

¹⁸Beisa klemri.

¹⁹Chonghuri.

²⁰Chobei pen badu aphanta boktap-ri.

²¹Bang apiso aphan ar-i-ri: la ahem, alongle, aban atum, achainong, agadha mate la kedo aling amar aputhak ar-i-ri.

²²Inglong along nangtum keching-rum ahut lahei ahukum helo HEMPHU nangtum aphan nangkepi. Me pen lapen inghun karthat pen nangtum aphan ase kethe pen nangkepu ahut, Alangli lahei ahukum si nangpilo, akaprek avelo. Anke Alangli lahei arlong plangni athak tok-lo lapen lahei neliphan nepilo.

²³Inglong isi me pen kekar-ang ahut kangting pen nangtum ase arjulong-lo, nangtum ajalin atum, lapen khei asar atum nelilong vang-lo

²⁴lapen pulo, “Me pen etum Arnam HEMPHU keningje ahut Alangli kethe lapen adak-atur nelitum aphan paklang-lo! Pini nelitum thek-long-lo, inut amonit aphan Arnam ningjelo seta alangli reng-et-un.

²⁵Bonta nelitum kopisi puthot kethiji aphan phothu nangjilangma? Hala kephere-meme ame si netum aphan pavirdetpo. Jongsi netum Arnam HEMPHU puthot ningjelote nelitum thivek nangpo.

²⁶Me pen Arnam keningje alam arju longdet aphi mane amonit reng-loma?

²⁷Moses chemathathunon, lapen netum Arnam HEMPHU kopisi keningje ma athetin nelitum aphan nethannon. Anke nangchevoira Alangli kopisi kepuloma nelitum aphan nethannon. Nelitum arjupo lapen kroipo.”

²⁸HEMPHU la arjulongsi, Alangli neliphan pulo, “Lahei arat atum kopisi kepuma Ne arjulong-lo, lapen latum keputa ahok-lo.

²⁹Latum jongsi lason mathaver asonte! Latum jongsi Nephan lason man piver lapen Nehukum an kroiver asonte, latum akai lapen aso-asu atum along jat asonta mesenpo.

³⁰Latum apehem-heihei along kechedamjile damra thandamnon.

³¹Bonta Moses, nangke Nelong ladak dokoknon, lapen Ne Aron-heihei lapen hukum-heihei nangphan nangpipo. Rat atum aphan lahei thannon, anke Ne latum aphan kepiji pu alongle along latum lahei kroithekpo.”

³²Israel arat atum, Nang Arnam HEMPHU nangtum aphan nangkepi ahukum an kekroithekjile chematha pamenon. Alangli ron-heihei angbong isinatta kroimori.

³³Lahei kedo-an kroipetnon, anke nangtum along jat ta mesenpo lapen nangtum kecheraiji alongle along nangtum dolongver po.