Read Karbi KETHAN 8 Bible Online

KETHAN 8 - Karbi bible

KETHAN 8

¹Pini ne nangtum aphan nangkepi aron-heihei kroipamenon, anke nangtum rengpo, aphai chanpo, lapen nangphusar atum aphan HEMPHU kechak alongle cherailongpo.

²Nang Arnam HEMPHU kosonsi la ningkan phlikep kejejangtang ajo soding nangkeja loma chemathatha, nangtum aporman ke-en jisi kesung nangtoilo, anke nangtum kopisi keklemji ningkehangma lapen Alangli ahukum-heihei kroithekpoma Alangli chinipo.

³Alangli nangtum aphan an pangchirsi padamlo, anke manna a-an Alangli nangtum kechoji aphan nangpilo, laso a-an nangtum lapen nangphusar atumta aphrang cholonglepinlang. Alangli la klemlo, atheke nangtum aphan kethan nangkepiji aphanlo, atheke monit ke him penle kereng chot kali, bonta HEMPHU angho pen kebar alamthetin pensi rengji.

⁴La ningkan phlikep, nangtum ape-ari rak-redet-lo, lapen nangkeng kangkelo.

⁵Chemathatha, nang Arnam HEMPHU ke apo atumle asomar aphan anem ke-en ason pakeng lapen nangtum aphan adukta pi.

⁶La apotsi HEMPHU kopima hukum nangkepi klemnon: Alangli aron-heihei ateng rengnon lapen Alangliphan kroinon.

⁷Nang Arnam HEMPHU nangtum aphan aho-or kedo alongle along nangkevanlo, isi langroi lapen langjeng kedo adet, lapen longle arlo pen lang ingbopsi arlok lapen inglong bithe palilo;

⁸isi soktipli, soktipliso, drakha, thebo, dalim, jit, lapen pijo alang-heihei kedo alongle.

⁹Hadak nangtum ingchirchelo, mate ingchirnangnelo. La arlong along ingchin dolo, lapen la anglong-heihei pen nangtum angchin-kelok tuk unji.

¹⁰Nangtum ko-an ma kechoji ning kehang la an cholongji, lapen nangtum aphan aho-or kedo alongle HEMPHU nangkepi apot Alangliphan nangtum kero pipo.

¹¹Nangtum Arnam HEMPHU aphan ketengnenedet jile cherenon; pini ne nangtum aphan nangkepi aron-heihei angbong kroimori.

¹²Nangtum kecho ji aphan ning hang an long-lote, lapen kedoji aphan hem keme dolong-lo te,

¹³lapen nang chainong, biresak, rup, ser, lapen akaprek nangmar an chanlote,

¹⁴nangtum chepindakde detjile cherenon, lapen nangtum ban kedo Ijip adet pen nangkepajok a-HEMPHU Arnam aphan tengneri.

¹⁵Alangli nangtum aphan ajak keding lapen kepherememe kejejangtang ajo nangjalo, hadak abi kedo apherui lapen chehelangbong apivo-heihei do-o. Halaso kekrengtai lapen langkave alongle ajo Alangli nangtum aphan arlong pen lang pangbop-lo.

¹⁶Kejejangtang ajo Alangli nangtum kechoji aphan manna nangpilo, la nangphusar atumta cholonglepinlang. Nangtum aphan aporman nangkelangjisi Alangli kesung nangtoilo, anke kejutsi nangtum aphan akeme ason pen Alangli nang pahirjumepo.

¹⁷La apotsi, nangtum nangmethang ajakong lapen kangtang-kangsak pensi plang-lo pu chematha nangne.

¹⁸Chemathatha, nang Arnam HEMPHU si nangtum aphan keplangji ajakong nangpilo. Alangli la klemlo, atheke nangphusar atum pen Alangli kechejok aloh aputhak kekroi thirklong-verlang.

¹⁹Nang Arnam HEMPHU aphan kaita tengneri mate akaprek arnam-heihei aphan karcho lapen kangduk pen ajok nangtum suiri. Nangtum jongsi la klemlote, pini ne nangtum aphan pacheretoilo, atheke nangtum virdetpo.

²⁰Nangtum jongsi HEMPHU aphan kroikrelote, nangtum kedambom ahut Alangli kepavirji akhei atum aphan asonthot nangtum aphanta nangpavirdetpo.