Read Karbi KETHAN 9 Bible Online

KETHAN 9 - Karbi bible

KETHAN 9

¹Israel arat atum arjutha! Pini ke nanglitum Jordan Aroi kapji dokdok lo lapen nangtum apar themu lapen ingtangmu akhei atum alongle kecheraiji dokdok-lo. Latum arongsopi-heihei thetan, sining phore apaisong do.

²Arat atumta ajon dinglen lapen ingtangrak; latum ke akromkethe akhei, lapen latum angno baduta arjap un-epu kepu nangtum arjulong-lo.

³Bonta nonke nangtum nangmek hini pen kethurvur ame ason HEMPHU nangtum Arnam nangtum aphrang aphrang kedam thek-longpo. Nangtum dambom ahut latum aphan Alangli paremdetpo, anke nangtum latum aphan phlung unpo lapen pavirdapprang longpo, lake Alangli kechak ateng-lo.

⁴Nangtum aphan HEMPHU nang Arnam latum aphan phlungdet aphi, nangtum longle kelongji a-ot dolo apotsi Alangli nangtum aphan nangvanlo pu chepuri. Kali, HEMPHU si lahei arat aphan nangtum apharman nangphlung pipo, pima latum hingnopik.

⁵La ke nangtum kemesen apot lapu kali, lapen kechokpet ason keklem apotsi nangtum aphan halatum alongle pa-enlong-lo laputa kali. Alangli latum aphan phlungji pima latum hingnopik lapen nangphusar Abraham, Isaak, lapen Jakob aphan kechak alam Alangli chebi ingtung.

⁶Nangtum chechini pamenon, nangtum aphan HEMPHU-ke nangtum a-ot dolo apotsi laso aho-or kedo alongle kelongji kali. Nangtum ke kechingkino arat-lo.

⁷Kejejangtang ajo kopusonsi nangtum HEMPHU aphan aningpathiloma laso alam tengneri. Nangtum Ijip ke-o arni pen ladak nangkele arni an Alangli be nangtum thurlo.

⁸Sinai Anglong alongta nangtum HEMPHU aphan aning pathilo, nangtum aphan kepavirdetji an aningkepathi.

⁹Nangtum pen HEMPHU kechejok aloh alam arlong plangni alongsi Alangli tok-lo lapen la ke-endamjisi ne inglong arludamlo. Hadak ne jophlikep niphlikep dodamlo, lapen ajatta choche lapen junje.

¹⁰Anke HEMPHU amethang ari pen ketok a-arlong plangni nephan nepilo, atheke inglong along nangtum kechingrum arni me angkang pen Alangli keningje alam tok-lo.

¹¹Kalang, hala jophlikep niphlikep aphi HEMPHU Alangli kechejok aloh alam ketok tang a-arlong plangni neliphan nepilo.

¹²Anke neliphan HEMPHU pulo, “Non amat inglong pen hirnon, pima Ijip pen nangkeja nangrat atum ingthirthetang-lo lapen hingno akam klemtang-lo. Latum ne kepaklemtoi akam pen suitang-lo, lapen latum amethang aphan isi akumlin selamtang-lo.”

¹³Neliphan HEMPHU pulo, “Lahei arat atum ko-an kechingkinoma Ne chini.

¹⁴Nephan ke khangji bor-irinon. Ne latum aphan pavirdetpo, anke baduta latum aphan chematha dam-thuthe detpo. Anke Ne latum apar themu lapen jakong thedung akhei nang pen paplangpo.”

¹⁵Lasi neli chetevarlo, lapen inglong nanghirlo, kechejok aloh ketok a-arlong plangni ponlo. Inglong pen me ade vang-lo.

¹⁶Nangtum aphan nangtum Arnam HEMPHU nangkepi ahukum kekroikre thek-long-lo, lapen ejon achainong aloso tasam akumlin nangtum methang aphan keselam pen ajok Alangliphan langplotsi nangtum pap klemlo.

¹⁷Lasi hadak nangtum angno arlong aplang arum varlo lapen paphuk-railo.

¹⁸Anke puthot neli aphrang ason jophlikep niphlikep HEMPHU angno ardomkhrup-lo, lapen thangnatta choche junjelo. Neli la klemlo, pima nangtum HEMPHU aphan langplotsi pap klemlo lapen Alangliphan aningpathilo.

¹⁹HEMPHU aningkethipik aphan neli pherelo, pima nanglitum aphan kepavirdetji an Alangli ningthilo; bonta HEMPHU puthot neli phan ano chedenlo.

²⁰HEMPHU-ke Aaron aphanta kepathilotji an aningthilo, lasi halaso amat neli Aaron aphan arnam ardom pilo,

²¹Halaso kehijimmeme apap nesi pondet-lo, la ke tasam achainong aloso, lapen la me along varchorlo. Anke neli la paduk-ilo, longle aduk ason koi-ilo, lapen la inglong pen nangkeli alangjeng along aduk varchuilo.

²²Taberah, Massah, lapen Kibroth Hattaavah along nangtum HEMPHU nang Arnam aphan aningpathilo.

²³Nangtum aphan nangkepitang alongle kepacherai ji aphan Alangli Kadesh Barnea pen hukum pisi nangpadamtoi ahut, Alangli be nangtum thurlo; Alangliphan nangtum chikikelo lapen kroikrelo.

²⁴Ne nangtum aphan nangkechini arni pen nangtum HEMPHU abe thurlot-lo.

²⁵Lasi ne domkhrup pen HEMPHU angno jophlikep niphlikep dolo, pima Alangli ke nangtum aphan pavirdetpo pu neli chinilo.

²⁶Lapen neli ardomlo, “Keklem-un a-HEMPHU, Nangmethang arat aphan pavirdet-ri, laso arat aphan nangsi pajok-lo lapen Ijip adet pen Nang methang thedung ajakong horang pen vanlo.

²⁷Nangliban Abraham, Isaak, lapen Jakob aphan chemathadamtha, lapen latum kechingkino, kehingno, lapen laso arat atum apap aputhak nangno chedenrinon.

²⁸Kalite, latum aphan nangli kechak alongle along arat aphan pon un-edet-lo, pu Ijip asor pupo. Latum aphan kepathijisi kejejangtang ajo keponlo pu pima latum aphan nang hijimlo, pusi latum pupo.

²⁹Jatseta, lahei arat helo Nangmethang aphan Nang kangvaitang arat lapen Nangjakong horang pen Nang latum aphan Ijip adet pen kevan arat-lo.”