Read Karbi JON 10 Bible Online

JON 10 - Karbi bible

JON 10

¹Jisu pulo, “Neli nanglitum aphan ahokpetsi nangpulang, Biresak aroi anghap anat pen kelutdamde, bonta atovar kaprek anat pen arlusi arlo kelutdam abang ke kanghu lapen dokait-lo.

²Bonta anghap anat pen aroi arlo kelutdam abang ke labangso abiresak kevi abang-lo.

³Inghap along keton abang alangliphan inghap ingpupiver, lapen alangli amethang abiresak atum amen hangsi kuver. Biresak atum alangli se arju, lapen alangli latum aphan ingtan japonver.

⁴Alangli latum aphan ingtan pabarsi latum aphrang aphrang dam, lapen biresak atum alangli phi phi dun, pima latum alangli se chini.

⁵Latum jonghe setta anut kaprek aphi dundedetji, bonta halatum along pen katkoiji, pima latum anut kaprek ase chinine.”

⁶Jisu labangso alamlir pen halatum aphan pulo, bonta alangli kepu alam athe halatum chininedet-lo.

⁷Lasi Jisu puthulo, “Neli nanglitum aphan ahokpetsi nangpulang, neli helo biresak atum kelut anghap-lo.

⁸Neli pen aphrang kevang atum ke kanghu lapen dokait atumlo. Bonta biresak atum halatum alam arjujedet-lo.

⁹Neli helo inghap-lo. Nelinat pen aroi arlo kelutdam abang aling ke jokji. Labangso abang aroi arlo lutji, ingtan nangbar longji lapen chopan longji.

¹⁰Kanghu abang ke kechonghuponji, kepathiji lapen kepavirji aphansi kevangchot. Neli ke latum chethe kelongji lapen la kedorphlupji aphansi kevang.

¹¹“Biresak kevi pame abang ke neli helo. Alangli ke biresak atum aphan ajok amethang apran chepi.

¹²Biresak kevi binong kalidet abang, atheke amethang abiresak kalidet bonta kevi kechongdatchot abang ke mahar kevang thek-long lote biresak atum aphan otekangsi katjuiji. Lasi mahar biresak aphan men men nepsi latum aphan papratseiji.

¹³Alangli ke katjuiji, pima alangli ke kechongdatchot abang, lapen biresak atum aphan mathathe.

¹⁴Biresak kevi pame abang ke neli helo. Po neliphan chini lapen neli Po aphan kechini asonthotsi,

¹⁵neli ke neli methang abiresak atum aphan chini. Lapen biresak atum aphan ajok nelimethang apran kechepiji aphanta neli ke chesiknailo.

¹⁶Bonta neli ke akaprek abiresak atumta do. Halabangso abiresak atum ke labangso aroi arlo kedo atum kali. Neli halatum aphanta vanvek nangji. Halatum neli se arjuji. Anke halatum ahur isipet cheplangji lapen kevi abangta inutnatji.

¹⁷“Po ke neliphan neinghon, pima neli ke neli pran chepidetsi labangso apran kechelongthuji aphan neli pran kechepiji aphanta chesiknailo.

¹⁸Baduta neli pran en-un-e. Neli ke neli methang aning kehang pensi neli pran kechepi. Neli ke neli pran kechepiji ajakong do, lapen kecheparengthuji ajakongta do. Neli Po neliphan nekepaklemtoi akam la helo.”

¹⁹Lahei hei alam pen apot monit atum kepu prekjamlo.

²⁰Halatum angbong ongmuchot atum ke pulo, “Alangli ke hi-i pholoksi ingchamjamlo. Nanglitum kopisi alangli kepu alam arjudunbom langma?”

²¹Bonta akaprek atum pulo, “Inut hi-i kepho amonit ke lapuson ningje thekthe. Hi-ile kopusi amek kave atum aphan amek kepachechar thekpoma?”

²²Halabangso ahut ke ningkreng-lo. Jerusalem arongsopi along Kardom a-Hemthepi Arnam aphan kepanong arni kechemathadam arong-aje Ameipi dolo.

²³Kardomhemthepi arlo “Solomon ahongkup” pu ahongkup along Jisu ke helatvoilo.

²⁴Ansi Jihudi atum alangliphan komjaisi pulo, “Nangli nelitum aphan ni ko-an nepasiksakbom-jilangma? Jongsi Khristo ke nangli helo tangte nelitum aphan nethandaknon.”

²⁵Jisu thakdunsi pulo, “Neli nanglitum aphan nangthantang-lo, bonta nanglitum kroikrelo. Neli Po amen pen keklembom akam hei hei neli lamjir haki pilo.

²⁶Bonta nanglitum ke la kroikrelo, pima nanglitum ke neli methang abiresak kali.

²⁷Neli methang abiresak atum ke neli se arju, lapen neli halatum aphan chini. Latum ke neli phi phi nangdun.

²⁸Neli latum aphan kejut un-e achethe pi, lapen latum ke kaiketa thithedetji. Baduta halatum aphan neli rideng pen thipon un-edetji.

²⁹Neli Po neliphan nekepitang atum ke kadokave apar themulo, lapen baduta latum aphan Po arideng pen thipon un-e.

³⁰Po lapen neli ke inutpet-lo.”

³¹Ansi Jihudi atum alangliphan karbujisi puthot arlong rungrep-lo.

³²Jisu halatum aphan pulo, “Po neliphan nekepaklemtoi akam keme neli nanglitum angno klem-olo. Labangso angbong kolobangso akam apotsi nanglitum neliphan nekarbuji mathaloma?”

³³Halatum thakdunsi pulo, “Nangli kam keme keklem apot kali, bonta nangli Arnam aphan kepinrem apotsi nelitum nangliphan arlong pen nang-arbupo. Pima nanglike monitchot setta Arnam pusi chepulo.”

³⁴Jisu halatum aphan thakdunsi pulo, “Nanglitumke arnam atumlo pu Arnam kepu alam nanglitum methang Aron angbong ketok do, kalima?

³⁵Hastro alam ke kaita patepek un-e, lapen Arnam alam kelongtang atum aphan arnam atum pusi Arnam pulo, lake ilitum chinilo.

³⁶Bonta neliphan ke Posi neingvailo, lapen alanglisi neliphan pirthe athak netoilo. Tangte neli ke Arnam a-Sopolo pu neli methang kechepu apot neli Arnam aphan pinremlo pu nanglitum kopusi keputhekma?

³⁷Neli jongsi Po nekepaklemtoi akam hei hei klemkle tangte nanglitum neliphan nekroi nangne.

³⁸Bonta neli jongsi lahei hei klembomlo tangte neliphanle kroikre setta Po ke neli pen chelangpet lapen nelita Po pen chelangpet pu nanglitum kethek-longji lapen kechini pameji aphan nanglitum la neli keklem akam hei hei anke kroi nangji.”

³⁹Lasi halatum puthot Jisu aphan kenepji abidi rilo. Bonta Jisu halatum angbong pen katjuilo.

⁴⁰Ansi Jisu puthot Jordan hapu parai kapsi Jon aphrangsi baptisom kepi adim damthulo, lapen alangli hadak dokok-lo.

⁴¹Ansi ake-ongpi amonit atum alangli long vangsi pulo, “Jon ke kemanghumeme akam thangta klemkle, bonta alangli labangso amonit alamjir kepu alam anke ahok-lo.”

⁴²Hadak ake-ongpi amonit atum alangliphan kroilo.