Read Karbi JON 11 Bible Online

JON 11 - Karbi bible

JON 11

¹Lazarus pu Bethani arongsopi asor inut sodet-lo. Bethanike Meri lapen akorte Martha atum arongsopilo.

²Hemphu akeng athak jangthu nempru kedung lapen achu pen keven abang ke labangso a-Meri helo. Kesodet abang, Lazarus-ke labangpi acheklepolo.

³Lasi hala angjir atum Jisu adung monit toisi papulo, “Nangli kechinghon abang sodet-lo, Hemphu!”

⁴Jisu labangso alam arjulongsi pulo, “Labangso akeso penke Lazarus thithe. Bonta labangso pen ajok Arnam a-Sopo anong ketheji aphan Arnam adak atur keklangjisi la plang-lo.”

⁵Martha, Martha akorte Meri lapen Lazarus aphan Jisu chinghon-o.

⁶Bonta Lazarus sodet pu arjulong-lok aphita alangli aphrang adim nini dothukok-lo.

⁷Ansi alangli amethang asangho atum aphan pulo, “Etum Judia adet damthulonang.”

⁸Asangho atum alangliphan thakdunsi pulo, “Nonhetsi Jihudi atum nangliphan arlong pen nangkarbuji abidi rilo. Tangte nangli kopusi hadak kedamthu-jilangma, Kuru!”

⁹Jisu thakdunsi pulo, “Arni isi angbong porphai krehini do, kalima? Anerlo akethe-ang angbong kedam abang ke patekungke. Pima alangli labangso apirthe akethe-ang thek-long.

¹⁰Bonta ajole damlote alangli patekungji, pima alangli long akethe-ang ave.”

¹¹Jisu labangso alam pudet aphi puthulo, “Etum ajirpo, Lazarus amek jangtang-lo. Bonta ne damsi alangphan ingthurdampo.”

¹²Jisu asangho atum thakdunsi pulo, “Alangli ameksi kejangchot-le pute methuji Hemphu!”

¹³Lazarus thitang-lo pu alamsi Jisu pudamlo. Bonta asangho atum ke Lazarus amek kejang binong alamsi mathadamlo.

¹⁴Lasi Jisu halatum aphan than pachinidak-lo, “Lazarus thitang-lo.

¹⁵Bonta neke nangtum pen apot chehok-lo, pima nangtum kekroithekji aphan ne hadak alangli long kavedet ke mesenlo. Da etum alangli long damlonang.”

¹⁶Lasi kecherop pu abang a-Thomas ke hala akaprek asangho atum aphan pulo, “Da ilita dunra alangli long thidunlonangho.”

¹⁷Jisu nangkele ahut anke Lazarus aphan kepipdamtang niphli an dotang-lo pu alam chinilo.

¹⁸Bethani arongsopi ke Jerusalem pen kehelo mali hini anta avechot.

¹⁹Acheklepo kethi pen apot Meri lapen Martha aphan aning kepaplijisi Judia asor ake-ongpi atum hadak vang-lo.

²⁰Ansi Jisu nangleji dokdok-lo pu alam arjulongsi Marthake alangliphan kangthumdunjisi hong nangbarlo. Bonta Meri ke hem arlosi dokok-lo.

²¹Ansi Martha Jisu aphan pulo, “Nanglile do asonte neli chekle thithedetji apot-lo, Hemphu!

²²Bonta nonta nangli kehang aling Arnam nangliphan nangpiji, lake neli chini.”

²³Jisu thakdunsi pulo, “Nangli cheklepo rengthupo.”

²⁴Martha thakdunsi pulo, “Mo kejut arni alangli rengthusi thurji, lake nelita chinilo.”

²⁵Jisu alangliphan pulo, “Kethi pen rengthusi kethur lapen chetheke neli helo. Neliphan kekroi abang aling ke thi setta rengthuji,

²⁶lapen kereng-bomlang lapen neliphan kekroi abang aling ke kaiketa thithedetji. Nangli la kroiloma?”

²⁷Labangpi thakdunsi pulo, “Kroilo Hemphu! Pirthe athak kevangji abang, Arnam a-Sopo, Khristo ke nangli helo, neli la kroilo.”

²⁸Martha labangso alam pudet aphi damsi akorte Meri aphan hang-joisi pulo, “Kuru nangletang-lo; alangli nangphanta nangrilo.”

²⁹Meri labangso alam karjulong pen mamat thurseraksi alangli pen kechetongjisi nangbarlo.

³⁰Jisu halabangso ahut anta rong angbong nanglelelang, Martha pen kechetong adimsi dolang.

³¹Hem arlo Meri aphan aning kepapli amonit atum ke Meri thurseraksi lapen hem pen kebar thek-longsi alangli phi phi dunlo. Pima alangli thiri along kechirudamjisi hadak pen barlo pusi halatum mathalo.

³²Meri Jisu kedo adim nanglesi Jisu aphan thek-long-lok pen alangli kengri domkhrup-lo lapen pulo, “Nanglile do asonte neli cheklepo thithedetji apot-lo Hemphu!”

³³Meri kechiru, lapen Meri along nangkedun atumta kechiru thek-longsi Jisuta aning dukdunlo.

³⁴Ansi alangli halatum aphan pulo, “Nanglitum alangliphan konatsi kebidamlo?” Halatum thakdunsi pulo, “Vang-ra nanglangtha Hemphu!”

³⁵Jisu chirulo.

³⁶Monit atum pulo, “Langtha, alangli alangphan ko-an kechinghon!”

³⁷Halatum angbong manene atum pulo, “Hala amek kave abang aphan amek kepachechar abang ke alangli helo, kalima? Lazarus kethithedetji aphanta alangli klem unji apot-lo, kalima?”

³⁸Jisu aning runhupsi thiri along damlo. La Lazarus aphan kebi adim ke longkulo, lapen amangho along arlong bithip-lo.

³⁹Jisu hukum pisi pulo, “Arlong tereknon.” Hala kethitang abang angjir, Martha pulo, “Nonke nemthuhakpo Hemphu. Alangliphan ladak kebitang niphli an dotang-lo!”

⁴⁰Jisu alangliphan pulo, “Nangli kroi lote nangli Arnam adak atur thek-longji pusi neli nangliphan nangpulo, kalima?”

⁴¹Ansi halatum arlong terek-lo. Jisu angsong anat langdingsi pulo. “O Po, nang nelam karju apot ne nangphan rolo.

⁴²Nang kaiketa nelam arjuver, lake ne chinilo. Bonta nangsi nephan neketoi pu ladak karjapphrong amonit atum kekroithekji aphansi ne la pulo.”

⁴³Labangso alam pudet aphi alangli ase kethe pen hangsi pulo, “Lazarus, ingtan nangbarnon!”

⁴⁴Ansi Lazarus ingtan nangbarlo. Alangli ri lapen akeng hei hei ke keper-i ape pen perhet-lo, lapen amahang ke pe so pen phungthip-lo. Jisu halatum aphan pulo, “Alangphan phrira padamnon.”

⁴⁵Meri along kevang angbong ake-ongpi atum ke Jisu keklem akam thek-longsi alangliphan kroilo.

⁴⁶Bonta halatum angbong manene atum ke Pharisi atum along damsi Jisu keklem akam alam thandamlo.

⁴⁷Lasi kurusar kethe atum lapen Pharisi atum kangsai amei pangrumsi pulo, “Labangso amonit ke ason ason akemanghumeme akam klem-olo. Ili kopisi klem apot-loma?

⁴⁸Alangliphan lason paklem longbom lote kadokaveta alangliphan kroipetpo. Anke Roman atum angbong keja atum vangsi Kardomhemthepi lapen ilitum akhei aphan pavirdetpo!”

⁴⁹Bonta halatum angbong pen Kaiaphas pu Kurusar Kethenei abang halatum aphan pulo, “Nanglitum lapu-an akeluma?

⁵⁰Kadokave kevirdetji apar kadokave arat apharman inut abang kethisi keme, lake nanglitum chininema?”

⁵¹Alangli amethang aning kematha penle labangso alam kepu kali, bonta halabangso aningkan ke Kurusar Kethenei ke alangli helo apotsi,

⁵²Jihudi atum aphanchot kali, bonta kehelo adet kepratsei, Arnam amonit atum aphan kepangrumpetji aphan Jisu thiji dokdok-lo pu alamsi alangli thanmek-lo.

⁵³Lasi halabangso arni pen Jihudi atum angbong keja atum alangliphan kepathijisi chingvailo.

⁵⁴Lasi Jisu chepaklangdak penke damdedet-lo. Alangli hadak pen damsi Kejejangtang ajo pen ketebok-het, Ephraim arongsopi damlo, lapen hadak alangli asangho atum along dodunlo.

⁵⁵Kejok Kechemathadam Achojun a-Meipi tebok-het-lo. Labangso amei nanglele ako aron atang pen kechepangthirji aphan penang atum rong pen damsi Jerusalem arludamlo.

⁵⁶Halatum Jisu aphan rilo, lapen halatum Kardomhemthepi arlo kechingrum ahut lahin lahin charjulo, “Alangli labangso Achojun a-Mei along nangdundedet binongjima? Nangli kematha kopuson?”

⁵⁷Lasi Jisu aphan kenep longji aphan alangli kedo adim kechini abang aling ke halatum aphan than-pachinivek nangji pusi kurusar kethe atum lapen Pharisi atum kepu pasodak-lo.