Read Karbi JON 12 Bible Online

JON 12 - Karbi bible

JON 12

¹Kejok kechemathadam Achojun a-Meipi nangkeleji nithrok dolang. Lazarus kedo arong, Bethani along Jisu vang-lo. Labangso a-Lazarus aphansi Jisu kethi pen parengthulo.

²Hadak halatum Jisu aphan an thai piponlo. Hadak Jisu pen an kecho rap rap angbong Lazarus-ta inut-lo.

³Ansi Meri ke chap-ajangthu pu ador keso ajangthu nempru powa hini vansi Jisu akeng patip-lo, lapen amethang achu pen akeng venlo. Labangso ajangthu nempru angnim hem arlo bithe bitha klanphlung-lo.

⁴Ansi Jisu asangho atum angbong pen inut abang, atheke Jisu aphan hotur arideng kehodaiji dokdok abang, Judas Iskariot pulo.

⁵“Labangso ajangthu sika pharo hini pen jordetsi atangka keduk kelak atum aphan pidet nangji apot-lo. Kopisi lapuson keklemkledetma?”

⁶Alangli keduk kelak atum aphan kemathale labangso alam kepu kali, bonta alangli ke kechonghu abang-lo apotsi labangso alam pulo.

⁷Bonta Jisu pulo, “Labangpi aphan khangri! Neliphan thiri along nekebidamji aphan alangli la do-an birti nangkok-lo.

⁸Keduk kelak atum ke nanglitum along kaiketa doji. Bonta neli ke nanglitum along dovervedetji.”

⁹Ansi ake-ongpi amonit atum Jisu Bethani arongsopisi do pu arjulongsi Jisu aphanchot kali, bonta Jisu kethi pen keparengthu a-Lazarus aphanta kelangdamjisi hadak damlo.

¹⁰Lasi Kurusar kethe atum Lazarus aphanta kepathiji abidi rilo.

¹¹Pima Lazarus aphan keplangtang alam pen apot Jihudi atum halatum aphan osi Jisu aphan kekroi do-olo.

¹²Puthot arni Kejok kechemathadam Achojun a-Meipi along nangkedun armu ake-ongpi atum Jisu Jerusalem vangpo pu alam arjulong-lo.

¹³Lasi halatum sotele arvo otkreisi alang-liphan kangthumdunjisi nangbarlo lapen hangjo josi pulo, “Arnam anong pathenang! Hemphu amen pen kevang abang hirjume kelong atheng-lo! Israel atum arecho hirjume kelong atheng-lo!”

¹⁴Jisu gadha aso ejon longsi ardonlo. Lake hastro along ketok asonthot-lo. Atheke hastro along tok-lo,

¹⁵“O Zaion arongsopi, phereri! “Jo langtha, nang rechoke gadha aso athak ardonsi vang-lo.”

¹⁶Alangli sangho atum halabangso ahut ke la keplangtang alam athe chininedet-lo. Bonta Jisu aphan adak atur pathedet aphi halatum labangso alam chemathadamlo, atheke hastro along labangso alam ketokke alangli lamjirsi ketok-lo, lapen la ketoktang asonthotsi halatum alangliphan klemlo pu halatum chemathadamlo.

¹⁷Jisu ase kethe pen hangsi Lazarus aphan kethi pen keparengthu lapen tipit pen nangkepabar ahut Jisu along kedo atum la keplangtang alam aphi thanlo.

¹⁸Lasi monit atum alangli pen kechetongjisi damlo. Pima Jisu keklem akemanghumeme alam latum arjulong-lo.

¹⁹Ansi Pharisi atum lahin lahin chepulo, “Ilitum thangta klemthekthedet-lo, lake nanglitum thek-long-lo. Langtha, apirthe pen mamat alangli phi phi duntoilo.”

²⁰Halabangso Achojun amei ahut Arnam aphan kangduk kardomdamjisi Jerusalem arongsopi kedam atum angbong Grik amonit atumta penang dolo.

²¹Halatum Philip pu Galili adet, Bethsaida arongsopi asor inut along vangsi choningrilo, “Nelitum Jisu pen kechetongji puti akehai!”

²²Philip labangso alam Andriu aphan thandamlo, lapen latum banghini damthusi Jisu aphan labangso alam thandamlo.

²³Jisu halatum aphan pulo, “Monit a-Sopo aphan adak atur kepatheji ahut nanglelelang.

²⁴Neli nanglitum aphan ahokpetsi nangpulang, sok emuta longle athak klora thithete la emuvetbomji. Bonta la thilote athe pathe-oji.

²⁵Amethang apran kechinghon abang ke la pangbodetji, bonta labangso apirthe athak amethang apran kechinghonhe abang ke kejut un-e achethe kepalongji aphan la chebiji.

²⁶Nephan keru kethaiji aning kehang abang ke ne long nangdunvek nangji, lapen ne kedo adimsi nebanta nangdo dunji. Lapen ne-Po ke nephan keru kethai abang aling aphan aman pi.

²⁷“Non nening thu-it-lo! Ne pisi pu apot-loma? ‘Labangso ahut pen nepajoktha Po,’ putong pu apot-loma? Ai lapu kali, pima labangso ahut kepho nangji akeduk kesung kechechakji aphansi ne vangtang-lo.

²⁸O Po, nangdak nangtur chepaklangnon!” Ansi sining pen ase kethe vangsi pulo, “Ne nedak netur chepaklangtang-lo, lapen ne lason klemthujilang.”

²⁹Hadak karjapphrong amonit atum labangso ase arjulong-lo, lapen lake sining kangreng ase pusi halatum angbong manene atum ke pulo. Bonta akaprek atum pulo, “Sining apherangkesi alangliphan pulo.”

³⁰Bonta Jisu thakdunsi pulo, “Labangso ase ke neliphanle nekepu kali, nanglitum aphansi nangkepulo.

³¹Nonke pirthe aphan kangsaiji ahut-lo. Non labangso apirthe ahemphu aphan ingtan varphitpo.

³²Lapen neli-phan mo pirthe athak pen nerungdet lote ne kadokave amonit aphan nedung vungpo.”

³³Alangli kopusonsi kethijima, la kepaklangjisi labangso alam pulo.

³⁴Armu atum thakdunsi pulo, “Khristo ke kaiketa doverji pusi Aron nelitum aphan nethanlo. Tangte Monit a-Sopo aphan rungdet nangji pu nangli kopusi keputhekma? La Monit a-Sopo komatma?”

³⁵Jisu thakdunsi pulo, “Kethe-ang nanglitum angbong non malomso ahut an dojilang. Nanglitum kangting kephophedetji aphan the-angdang akole dambomnon. Pima kangting angbong kedam abang ke konatsi kedamma, la chechinine.

³⁶Tangte nanglitum kethe-ang asomar keplangji aphan kethe-angdang akole kethe-ang aphan kroinon.” Jisu labangso alam pudet aphi halatum aphan otekangsi chepatu damjoilo.

³⁷Alangli halatum angnosi manghumeme akam anta klemlo setta halatum alangliphan kroikrelo.

³⁸Lake Arnam amontri, Isaiah kepu alam kepachekokji aphanlo. Pima alangli pulo, “O Hemphu, netum kethan alam matsi kekroi abang doma? “Hemphu mat aphansi amethang ajakong chepaklang-loma?”

³⁹Lasi halatum kroi-thekthedet-lo, pima Isaiah pulo,

⁴⁰“Halatum amek pen kethek longledetji, lapen aning pen kechinithekthedetji aphan Arnam halatum amek pachecharche-det-lo, lapen aning pangtangrak-lo. Ansi halatum nelong nangchiruire-detsi ne halatum aphan pamemedetji pusi Arnam pulo.”

⁴¹Isaiah ke Jisu adak atur thek-long-lo, lapen alangli lamjirsi thanlo apotsi alangli labangso alam pulo.

⁴²Tebonta kangsai Ameipi abangphu atum angbong pen penang atum ke Jisu aphan kroilo, bonta halatum aphan sinagog pen phlungphitna pu Pharisi atum aphan kephere pen ajok halatum akekroi chepaklangdak haihe-det-lo.

⁴³Pima halatum ke Arnam pen akero kelong aparte monit pen akero kelong ar-i-munak-lo.

⁴⁴Jisu ase kethe pen pulo, “Nephan nekekroi abang aling ke nephan kekroichot kali, nephan neketoi abang aphanta kroilo.

⁴⁵Nephan nekethek-long abang ke nephan neketoi abang aphanta thek-long-lo.

⁴⁶Nephan kekroi abang ke kangting angbong kedo jokphlotji aphan ne kethe-ang asonthak thaksi pirthe athak vang-lo.

⁴⁷Ne kethan alam ke arju, bonta kekroikre abang aphan ne ingsaise, pima neke pirthe aphan kangsaiji aphanle kevang kali, bonta kepajokji aphansi kevang.

⁴⁸Nephan kechakche lapen ne kethan alam kedengde abang aphan kangsaiji abang inut do. La neli kethantang alamsi mo kejut arni alangliphan ingsaiji.

⁴⁹Labangso alam ke ahok, pima neke nemethang aning kehang penle keningje kali, bonta ne keningje lapen kethan ke nephan neketoi abang. Po hukum nekepi ateng-lo.

⁵⁰Lapen alangli hukum ke kejut un-e achethe van pu ne chini. Lasi Po nekepathantoi atengsi ne thanlo.”