Read Karbi JON 14 Bible Online

JON 14 - Karbi bible

JON 14

¹Jisu halatum aphan pulo, “Nangtum aning aduk chepadori. Arnam aphan kroira nephanta kroinon.

²Ne-Po ahem ke angdeng do-o. Neke nangtum aphan dim nang-kethikpi damjisi dampo. Lale ahok-he asonte ne nangtum aphan labangso alam nangpupedetji apot-lo.

³Lapen ne damsi nangtum aphan dim nang-thikpidet lote ne vangthuji. Anke ne kedo adim nangtumta kedo longji aphan ne nangtum aphan nangponji.

⁴Ne kedamji adim atovar ke nangtum chinipet-lo.”

⁵Thomas alangliphan pulo, “Nangli konatsi kedamjima, lake nelitum chinine Hemphu! Tangte nelitum kopusi nangli kedamji adim atovar chinithekpoma?”

⁶Jisu alangliphan pulo, “Ne helo tovar, ahok lapen chethe. Ne pen pete baduta Po along dam-un-e.

⁷Nonke nangtum nephan chinitang-lo. Nangtum ne-Po aphanta chiniji, lapen non penke nangtum alangphan chini-tang-lo lapen thek-longtang-lo.”

⁸Philip alangliphan pulo, “Nelitum aphan Po nepaklangtha, Hemphu! Nelitum kenangjike la an helo.”

⁹Jisu thakdunsi pulo, “Philip, ne lapu-an arni keding nangtum along nangkedodun anta nangtum nephan nechininelangma? Nephan nekethek-long abang ke Po aphanta thek-long-lo. Tangte nang kopisi, ‘Netum aphan Po nepaklangtha,’ pu kepulangma?

¹⁰Neke Po pen chelangpetver, lapen Po ne pen chelangpetver pu nang kroikrelangma, Philip?” Ansi Jisu amethang asangho atum aphan pulo, “Ne nangtum aphan nangkepu alam hei hei ke nemethang aning kehang penle kepu kali, bonta ne pen kechelangpetver abang, Posi amethang akam cheklembomlo.

¹¹Neke Po pen chelangpetver, lapen Po ne pen chelangpetver pu ne kepu alam nangtum kroinon. Lapu kali setta ne keklem akam hei hei apot-le nangtum nephan kroinon.

¹²Ne nangtum aphan ahokpetsi nangpulang, nephan kekroi abang ke ne keklembom akam hei hei klemji, lapen la apar akethemu akam hei heita alangli klemji. Pima neke Po along dampo.

¹³Lapen Sopo pen ajok Po adak atur keklangji aphan nangtum nemen pen kehang aling ne la klemji.

¹⁴Nangtum nemen pen nelong kopine nangchohang lote ne la klemji.

¹⁵“Nangtum nephan neinghonlo pute nangtum nehukum hei hei kroiji.

¹⁶Ansi ne Po aphan choningriji, lapen Po nangtum along anut kaprek akerap abang aphan nangtoiji. Alangli kaiketa nangtum along doverji.

¹⁷Halabangso abang ke Karjong helo. Alangli ke Arnam alamjir ahok alam kethan abang-lo. Pirthe alangliphan deng un-e, pima pirthe ke alangliphan thek-longle lapen chinine. Bonta nangtum ke alangliphan chini, pima alangli ke nangtum alongsi do, lapen nangtum aning arlosi doji.

¹⁸“Neke dam setta nangtum aphan jangre ason nangpinchongche. Ne nangtum along vangthuji.

¹⁹Non malomso aphi lote pirthe nephan thek-longledetji. Bonta nangtum ke nephan thek-longji, lapen neke reng-et-lo apotsi nangtumta rengji.

²⁰Halabangso arni nangle lote, neke Po pen chelangpetver, nangtum ne pen chelangpetver lapen ne nangtum pen chelangpetver pu nangtum chiniji.

²¹Nehukum hei hei kedeng lapen kekroi abang ke nephan kechinghon abang-lo. Nephan nekanghon abang aphan ke Po inghonji. Neta alangliphan inghonji lapen cheklangji.”

²²Judas (Judas Iskariot kali) pulo, “Hemphu, nang netum aphan cheklangji, bonta pirthe aphan ke cheklangkledetji pu athe kopima?”

²³Jisu thakdunsi pulo, “Nephan nekanghon abang ke ne kethan alam kroiji. Ne-Po alangliphan inghonji, lapen ne-Po lapen neta alangli long vangsi alangli pen dorap rapji.

²⁴Nephan nekanghonhe abang ke ne kethan alam kroikre. Nangtum ne pen karjulong alam ke nemethang alam kali, bonta nephan neketoi abang, Po alamlo.

²⁵“Ne non nangtum along kedo ahutsi nangtum aphan lahei hei alam nangputekang-lo.

²⁶Po nemen pen nangketoiji akerap abang, atheke Karjong Kangthirsi nangtum aphan kadokave alam nangthanji, lapen alangli nangtum aphan ne nangkethantang alam an ning nang-pachemathathuji.

²⁷“Ne nangtum aphan ning kangsam nangpitekang-lo. Ne nemethang aning kangsamsi nangtum aphan nangpite-kang-lo. Pirthe nangkepi asonthot-le ne nangkepi kali. Nangtum aning aduk chepadori lapen phereri.

²⁸Ne nangtum aphan otekangji, bonta ne nangtum along vangthuji pu ne nangtum aphan kepu alam nangtum arjulong-lo. Nangtumle nephan ne inghon asonte ne Po along damji pu apot ke nangtum aning arongji apot-lo, pima ne par alangli themulo.

²⁹Mo la kadokave kechekokji ahut nangtum kekroi thekji aphan la chekok ke ako, non ne nangtum aphan la nangpulo.

³⁰Ne nangtum pen kechingki ajir pading-o longlelo, pima labangso apirthe kechari abang vangtang-lo. Alangli ke nephuthak thang ajakong ave,

³¹bonta neke Po aphan inghon pu pirthe chinivek nangji. Lasi Po nephan hukum nekepi asonthotsi ne klemlo. Da, ili dak pen damlonang.”