Read Karbi JON 15 Bible Online

JON 15 - Karbi bible

JON 15

¹Ne helo drakha arikang binong, lapen ne-Po ke ketiki abang-lo.

²Ne long kedo, athe kepathethe aro an aphan ke alangli ing-lokpetji, lapen athe kepathe aro an aphan ke ansose athe kepapatheji aphan alangli ingchaiji.

³Ne nangtum aphan nangkethan alam pen ajok nangtum aphan nang-pangthirtang-lo.

⁴Nangtum ne longle donon, lapen neta nangtum alongsi dopo. Arong pen cherap-het-hete aro amethang ke athe chepathe thekthe. Lasonthotsi nang-tumta ne pen cherap-het hete athe pathe thekthe.

⁵“Neke drakha arikang-lo, lapen nangtum ke arolo. Ne pen chelangpet, lapen ne alangli pen chelangpet lote, labangso abang ke athe pathe-oji. Pima ne penpete nangtum thangta klem un-e.

⁶Ne pen kechelangpetpe abang aphan ke ne hala aro hei hei aphan asonthak thaksi ingtan varchorsi pathikhraiji. Lason aro atum aphan ke pangrumthusi me along phrindutsi pachodetji.

⁷Nangtumle ne pen chelangpetbom, lapen ne lam hei hei nangtum aning arlo dobom lote, nangtum aning kehang aling hang tame, la nangtum aphan nangpidetji.

⁸Nangtum athe kepathe-o pen ajok ne-Po adak atur klangji, lapen lasonsi nangtum nesangho plangji.

⁹Po nephan ne kechinghon asonthotsi neta nangtum aphan nang chinghonlo. Nangtum ne akanghon angkangle dobomnon.

¹⁰Neke Po ahukum hei hei kroisi alangli akanghon angkang dobomlo. Lasonthotsi nangtumta ne hukum hei hei kroibom lote nangtum ne akanghon angkangsi dobomji.

¹¹“Ne ning arong kedo asonthotsi nangtumta ning arong kedoji, lapen nangtum aning arong keplengsetji aphansi ne nangtum aphan lahei hei alam nangpulo.

¹²Tangte ne hukum ke la helo: ne nangtum aphan nangkanghon asonthot-le nangtum lahin lahin chinghon non.

¹³Amethang ajirpo atum aphan ke-chinghon akethenei ke ajirpo atum apharman amethang apran kechepi helo.

¹⁴Ne nangtum aphan hukum nangkepi asonthot-le nangtum klem lote nangtum ke nejirpo atumlo.

¹⁵Ne non pen apara ke nangtum aphan ban pu nangpupelo. Pima aban abang ke ahemphu keklem akam chinidunde. Bonta ne nangtum aphan jirpo pusi nangpupo, pima neke Po along pen karjulong alam an nangtum aphan nangthantang-lo.

¹⁶Nangtumle nephan nekangvai kali. Bonta nangtum damra athe kepatheji, lapen halabangso athe kedoverji aphan nesi nangtum aphan nang ingvailo, lapen akam nangbat-lo. Lasi nangtum ne men pen Po along kechohang aling alangli nangtum aphan la nangpiji.

¹⁷Lasi ne nangtum aphan labangso ahukum nangpilo: nangtum lahin lahin chinghon non.

¹⁸“Pirthe jongsi nangtum aphan nanglangremlo tangte, mathanon, aphrangke la nephansi nelangrem paphrang-lo.

¹⁹Nangtumle pirthe aso asonte pirthe amethang aso aphan kechinghon asonthotsi nangtum aphan nang inghonji apot-lo. Bonta nesi nangtum aphan pirthe angbong pen nang ingvailo, lapen nangtum ke pirthe aso kalidet apotsi pirthe nangtum aphan nanglangremlo.

²⁰Ne nangtum aphan nangkepu, ‘Ahemphu apar aban themu, lapu kali,’ pu alam nangtum chemathadamnon. Halatum nephan nekechenek asonthotsi nangtum aphanta nang chenekji. Halatum jongsi ne kethan alam kroilo tangte, halatum nangtum alamta kroiji.

²¹Bonta ne men pen apot halatum nangtum aphan lahei hei klemji, pima halatum nephan neketoi abang aphan chinine.

²²Ne vangvedet-ra halatum aphan lahei hei alam thanthedet asonte halatum apap adai avedetji apot-lo. Bonta nonke, ‘Netum keklem akam hei hei ke pap-lo puke netum chinine,’ pu halatum kepuji atovar avelo.

²³Nephan nekelangrem abang ke ne-Po aphanta langremlo.

²⁴Nele baduta keklemkle pinlang akam halatum angbong klemkledet asonte halatum apap adai avedetji apot-lo. Bonta nonke halatum ne keklem akam nangthekdun long-lo, lapen halatum nephan lapen ne-Po aphanta langremlo.

²⁵Lake, ‘Thang athe aveta halatum nephan nelangremlo,’ pu halatum Aron along ketok alam kepachekokji aphan plangvek nangkok-lo.

²⁶“Kerap abang, atheke Arnam alamjir ahok alam kepaklang lapen Po along pen kevang abang, Karjong vangji. Po along pen ne alangliphan nangtum along nangtoiji, lapen alangli nangtum aphan neli lamjir nang thanji.

²⁷Ansi nangtumta neli lamjir thanji, pima kecheng ahut penta nangtum nelong nangdodunlo.”