Read Karbi JON 17 Bible Online

JON 17 - Karbi bible

JON 17

¹Jisu lahei hei alam pudet aphi sining anat langdingsi pulo, “Ahut nangletang-lo Po! Nang Sopo nangdak nangtur kepaklangthekji aphan nang nang Sopo adak atur paklangnon.

²Pima Sopo arideng nang kepitang atum an aphan alangli kejut un-e achethe kepithekji aphan nang alangliphan kadokave amonit aphuthak ajakong pitang-lo.

³Kejut un-e achethe ke nangphan, atheke Arnam binong, la nang inutpet aphan kechini lapen nang nangketoi a-Jisu Khristo aphan kechini helo.

⁴Pirthe athak ne nangdak nangtur paklangtang-lo, pima nang nephan nekepaklemtoi akam ne klem patangtang-lo.

⁵Pirthe pinchongche ako nang nenong kepathe asonthot-le nonta nang nangmethang angno nenong pathenon Po!

⁶“Pirthe athak nang nephan nekepi-tang amonit atum aphan ne nangdak nangtur paklang-lo. Halatum ke nangmethang amonit-lo. Nang halatum aphan nerideng nepilo, lapen halatum ke nanglam kroilo.

⁷Nang nephan nekepitang ason anke nang pensi vang-lo pu nonke halatum chinilo.

⁸Nang nephan nekethan alam ne halatum aphan thanlo, lapen halatum la deng-lo. Neke nang long pensi kevang, lake ahok pu halatum chinilo, lapen nangsi nephan netoilo pu halatum kroilo.

⁹“Ne halatum aphan nang ingno nangchoningripilo. Pirthe amonit atum aphan ke ne choningripipe, bonta nang nephan nekepitang amonit atum aphansi ne choningripilo. Pima latum ke nangmethang amonit atumlo.

¹⁰Ne long kedo amonit anke nangmethang amonit-lo, lapen halatum pen ajok nedak netur klangtang-lo.

¹¹Non ne nanglong chevangpo. Non malomso aphi lote ne pirthe athak dodedetpo. Bonta halatum ke pirthe athak dobom-jilang. Po, Kangthir a-Bang! Etum isipet asonthot, halatumta isipet keplangji aphan nang nephan nekepi amen pen, atheke nang men ajakong pen nang halatum aphan raitha.

¹²Ne halatum along kedo ahut nang nephan nekepi amen pen, atheke nangmen ajakong pen ne halatum aphan railo. Lapen hastro alam kepachekokji aphan hala kevirdet nangji abang apar ke halatum angbong inutnatta virvedet-lo.

¹³Nonke ne nang long chevangpo. Ne ning ke-arong asonthot halatumta aning arong keplengsetji aphan ne pirthe athak lahei hei alam thanlo.

¹⁴Nang nephan nekepathantoi alam ne halatum aphan thantang-lo, lapen pirthe halatum aphan lang-remtang-lo. Pima neke pirthe aso kali asonthotsi halatumta pirthe aso kalilo.

¹⁵Nang halatum aphan pirthe athak pen pondet nangji pule ne nangphan nangkechoningri kali, bonta nang halatum aphan Kehingno a-Bang arideng pen keraiji aphansi ne nangphan nangchoningrilo.

¹⁶Ne pirthe aso kalidet asonthotsi latumta pirthe aso kalilo.

¹⁷Ahok alam penle nang halatum aphan chepanongtha. Nang lam ke ahok alamlo.

¹⁸Nang nephan pirthe athak neketoi asonthotsi neta halatum aphan pirthe athak toitang-lo.

¹⁹Halatumta ahokpet pen nangphan nangkechehodai thekji aphan, ne halatum aphan ajok nemethangsi nangphan nangchehodailo.

²⁰“Ne halatum aphansi choningri-pichot-lo, lapu kali, bonta halatum kethan alam pen ajok nephan kekroi atum aphanta ne choningripilo.

²¹Halatum aning isipet keplangthekji aphansi ne choningrilo Po! Nang ke ne pen ning isipet, lapen neta nang pen ning isipet asonthot-le halatumta etum pen ning isipet paplangnang.

²²Etum inutpet asonthot halatumta inutpet keplangji aphan nang nephan nekepi adak atur ne halatum aphan pilo.

²³Nangsi nephan netoilo, lapen nang nephan nekanghon asonthotsi nang halatum aphanta inghonlo pu pirthe amonit atum kechiniji aphan, atheke halatum ning isipet keplang pamethekji aphan ne halatum pen ning isipet lapen nang ne pen ning isipet-lo.

²⁴“Oh, Po! Nang halatum aphan nerideng nepitang-lo. Nang nephan nekepi adak atur halatum kethek longji aphan halatum ne kedoji adim nelong nangkedodunjisi ne ning hang-lo, pima pirthe pinchongche ako penta nangke nephan ne inghonlo.

²⁵Po, dhoromi abang! Pirthe nangphan chinine, bonta neke nangphan chinilo, lapen nangsi nephan netoilo pu la sangho atum chinilo.

²⁶Nang nephan akanghon halatumta kedoji lapen neta halatum along kedoji aphan nang komatma, lake ne halatum aphan pachinidak-lo, lapen ne la pachinibomjilang.”