Read Karbi JON 18 Bible Online

JON 18 - Karbi bible

JON 18

¹Jisu Arnam ardomdet aphi amethang asangho atum pen pen hadak pen barsi Kidron pu a-arlok parai damlo. Hadak isi apaiberi do. Jisu lapen asangho atum labangso apaiberi arlo damlo.

²Jisu aphan hotur arideng kehodai abang, Judas ke labangso adim chini, pima Jisu lapen asangho atum hadak abatai batai chetongdamlo.

³Lasi Roman aron-aso atum, lapen kurusar kethe atum lapen Pharisi atum nangketoidun Kardomhemthepi keton aron-aso atum aphan cheponsi Judas halabangso apaiberi along damlo. Halatum lemtem, thengtom lapen arisim hei hei cheponkreilo.

⁴Jisu aphan kopi pi plangjima, lake alangli chechinilo. Lasi alangli nangbarsi halatum aphan pulo, “Nanglitum komat aphansi kerima?”

⁵Halatum thakdunsi pulo, “Najareth a-Jisu aphan.” Ansi alangli pulo, “Neli helo.” Jisu aphan hotur arideng kehodai abang, Judasta halatum pen pen hadaksi arjaptherlo.

⁶Jisu halatum aphan, “Ne helo,” pu pudet aphi halatum aphi chiruichotsi longle athak kliruilo.

⁷Ansi Jisu halatum aphan puthulo, “Nanglitum komat aphansi kerima?” Halatum pulo, “Najareth a-Jisu aphan.”

⁸Jisu pulo, “Neli helo pu neli nanglitum aphan nangthantang-lo. Nanglitum nephansi keri tangte la akaprek atum aphan ke padam longtha.”

⁹Alangli keputang alam, atheke “Nang nephan nekepitang atum angbong pen inutnat aphanta pavir longledet-lo Po,” pu alam kepachekokji aphansi alangli labangso alam pulo.

¹⁰Ansi Simon Pitorke amethang anokjir chesatsi Kurusar Kethenei aban aphan ano ar-e anat chorphlak-lo. Labangso aban amen ke Malchus pu helo.

¹¹Jisu Pitor aphan pulo, “Nang nokjir ahom along chesekthunon. Po nephan nekepi aharlung ne jun nangnema?”

¹²Ansi Roman aron-aso atum lapen labangso aron-aso atum aphan hukum kepi abang, lapen Jihudi atum aphan angphun kerai atum Jisu aphan nepsi kok-lo.

¹³Ansi alangliphan aphrangke Annas along ponlo. Pima halabangso aningkan ke Kaiaphas helo Kurusar kethenei abang-lo, lapen Annas ke Kaiaphas ahupolo.

¹⁴Rat atum apharman inut amonit kethisi keme pu Jihudi atum angbong keja atum aphan kethan abang la Kaiaphas helo.

¹⁵Simon Pitor lapen anut kaprek asangho Jisu aphi aphi dunlo. Hala anut kaprek asangho abang aphan ke Kurusar Kethenei abang chinilo. Lasi alangli ke Jisu along Kurusar Kethenei ahem thekup an lutdunlo.

¹⁶Bonta Pitorke inghap angtansi dokok-lo. Ansi hala anut kaprek asangho abang ingtan vangsi, lapen inghap kehon arloso pen chingkidamsi Pitor aphan arlo ponlo.

¹⁷Hala inghap kehon arloso Pitor aphan pulo, “Nanglita labangso amonit asangho inut-lo, Kalima?” Pitor thakdunsi pulo, “Kali, neli ke kali.”

¹⁸Chungduk apotsi ban atum lapen keton aron-aso atum hokvai ame thorlo, lapen halatum arjapphrongsi me chinghip-lo. Lasi Pitorta dunsi halatum along arjapdunthersi me chinghipdunlo.

¹⁹Ansi Kurusar Kethenei abang Jisu asangho atum alamjir lapen Jisu kethan alam alamjir Jisu aphan arjulo.

²⁰Jisu thakdunsi pulo, “Neli ke kaiketa rat angnosi abangphutin aphan thanlo. Monit atum kechingrum adim, atheke Sinagog hei hei along lapen Kardomhemthepi alongsi thanlo. Neli ke thangta than chonghuhe.

²¹Tangte nangli kopisi nearjulangma? Neli kethan nangkarjudunlong atum aphanle arjunon. Neli kopi alamsi kethanma, la nangli halatum aphanle arjunon. Neli kethan alam halatum chinilo.”

²²Jisu la pudet aphi Kardomhem-thepi keton aron-aso inut abang Jisu akecheng ardeptetsi pulo, “Nang kopusi Kurusar Kethenei aphan lason alamle kethakdun hailo!”

²³Jisu thakdunsi pulo, “Neli jongsi kopine akechokche alam ningjetang-lo tangte neli akechokche alam ladak kedo abangphutin aphan than-pachininon. Bonta neli keningje alam jongsi chok tangte nangli kopi apotsi neliphan nekardepma?”

²⁴Ansi Annas Jisu aphan paphlok-phledetsi Kaiaphas along, atheke Kurusar Kethenei along toilo.

²⁵Simon Pitor arjapthersi me chinghipdunlo. Ansi anut kaprek atum alangliphan pulo, “Nanglita labangso amonit asangho inut-lo, kalima?” Bonta Pitorke chekrongkredetsi pulo, “Kali, neli ke kali.”

²⁶Kurusar Kethenei aban inut abang pulo, “Neli nangliphan alangliphan pen pen paiberi arlo nangthek-long-lo, kalima?” Labangso aban ke hala Pitor ano kechorphlak abang adonlo.

²⁷Pitor chekrong thuthedetsi pulo, “Kali.” Ansi hala mamat vo ejon kulo.

²⁸Adapprang halatum Jisu aphan Kaiaphas ahem pen ponsi govornor ahemthepi arlo ponlo. Jihudi atum ke hem arlo lutdundedet-lo, Pima halatum Kejok Kechemathadam Achojun a-Meipi along kechodunji aphan ingthirjir pen kedojisi aning hang-lo.

²⁹Lasi Pilat nangbarsi halatum adung damlo lapen pulo, “Nanglitum labangso amonit aphan kopisi kedinma?”

³⁰Halatum thakdunsi pulo, “Alang-lile kopine akehingno akam klemkle asonte nelitum alangliphan ladak nangli long vanvedetji apot-lo.”

³¹Pilat halatum aphan pulo, “Tangte nanglitum alangliphan ponra nangli-tum methangle nanglitum aron ateng pen ingsainon.” Halatum thakdunsi pulo, “Nelitumke badu aphanta pathi longle.”

³²Jisu keputang alam kepachekokji aphansi la plang-lo; atheke alangli kopusonsi thijima, lake alangli aphrang pen thanlo.

³³Pilat hem arlo chelutdamthulo lapen Jisu aphan hangsi arjulo, “Jihudi atum arecho nangli heloma?”

³⁴Jisu thakdunsi pulo, “La nangli nekarju alam ke nangli methang kemathadam alamma, mate anut kaprek atumsi nangliphan neli lamjir nangthanloma?”

³⁵Pilat thakdunsi pulo, “Nelita Jihudi amonit putong nangli kema-thama? Nangli methang amonit atum lapen kurusar kethe atumsi nangliphan neli rideng nehodailo. Nangli kopi akamsi keklemdet-loma?”

³⁶Jisu thakdunsi pulo, “Neli ratke dak pirthe arat kali. Neli ratke dak pirthe arat-lo asonte neliphan Jihudi atum angbong keja atum arideng nepahodai longledetji aphan nerat aso atum ron chedanji apot-lo. Bonta neli ratke dak pirthe arat kali.”

³⁷Lasi Pilat alangliphan pulo, “Tangte nanglike rechoma?” Jisu thakdunsi pulo, “Nanglisi la nepulo. Kalang-lo, neli ke recholo. Neli ahok alamjir kethanjisi pirthe athak vangsi mahang nangthek-lo. Ahok abe atum anke neli lam arju.”

³⁸Pilat alangliphan arjulo, “Ahok ke kopilo?” Ansi Pilat ingtan nangbarthusi monit atum along damlo, lapen pulo, “Neli alangliphan thang adaita thek-longle.

³⁹Bonta Kejok Kechemathadam Achojun a-Meipi ahut neli nanglitum aphan inut amonit nang pajokpi nangji, lason aron do. Neli nanglitum aphan Jihudi atum arecho nangpajokpi tamema?”

⁴⁰Halatum hangjosi pulo, “Kali, alangliphan kali! Hala Barabbas aphanle pajoknon.” Barabbas ke inut akanghupi-lo.