Read Karbi JON 19 Bible Online

JON 19 - Karbi bible

JON 19

¹Ansi Pilat Jisu aphan paponsi champre abu pen pachok-lo.

²Chedanbang atum ingsu kethe aro pen phu kekup avaikang selamsi Jisu aphu kup-lo, lapen hepi arje achoi keding pangchoilo.

³Halatum Jisu adung vangsi pulo, “Kardom, Jihudi atum arecho!” Ansi halatum alangli kecheng ardeptet-lo.

⁴Pilat rotan nangbarthusi armu atum aphan pulo, “Neli alangliphan thang adaita thek-longle pu nanglitum kechini thekji aphan neli alangliphan dak rotan nanglitum along vanpo.”

⁵Ansi hala ingsu kethe aro pen keselam avaikang kupdongsi lapen hepi arje achoi keding pangchoithorsi Jisu aphan rotan vanlo. Pilat halatum aphan pulo, “Jo, amonit la helo!”

⁶Kurusar kethe atum lapen Kardomhemthepi keton aron-aso atum alangliphan thek-longsi hangjosi pulo, “Alangliphan thengparpan athak pathinon! Thengparpan athak pathinon!” Pilat halatum aphan pulo, “Nang-litumle alangliphan thengparpan athak pathidamnon. Neli ke alangliphan thang adaita thek-longle.”

⁷Armu atum alangliphan thakdunsi pulo, “Nelitum eson aron do. Halabangso aron ateng ke alangliphan pathivek nangji, Pima alangli amethangsi Arnam a-Sopo pu chepulo.”

⁸Pilat labangso alam arjulongsi aphrang apar pherethu muchot-lo.

⁹Alangli hem arlo chelutdamthusi Jisu aphan arjulo, “Nangli konat pensi kevangma?” Bonta Jisu thangta thak dundedet-lo.

¹⁰Pilat alangliphan pulo, “Nangli nethakthema? Mathanon, neli nangliphan nangkepajokji, lapen thengparpan athak nangkepathiji ajakongta do.”

¹¹Jisu thakdunsi pulo, “Arnam jakong nangkepi apotsi nangli neli phuthak ajakong kedochot. Lasi neliphan nangli rideng kehodai abang apap themulo.”

¹²Labangso alam arjulongsi Pilatke Jisu aphan kepajokji abidi rilo. Bonta armu atum hangjosi pulo. “Nanglile alangliphan pajokphlot lote nanglike Koisor Recho ajirpo kalilo! Amethangsi recho pu kechepu abang ke Koisor Recho abekethurlo.”

¹³Pilat lahei hei alam arjulongsi Jisu aphan rotan vanlo, lapen “Arlong Kepangni,” pu adim kebi akangsai anghoi athak alangli ingnilo. Labangso adim aphan Ibri alam penke “Gabbatha,” pusi pulo.

¹⁴Lake Kejok kechemathadam a-Meipi pen aphrang arni, nerlo chitim anbak apor ahut-lo. Ansi Pilat Jihudi atum aphan pulo, “Jo, nanglitum arecho!”

¹⁵Halatum hangjo josi pulo, “Alangliphan pathinon! Alangliphan pathinon! Alangliphan thengparpan athak pathinon!” Pilat halatum aphan pulo, “Neli nanglitum arecho aphan thengparpan athak pathi nangjima?” Kurusar kethe atum thakdunsi pulo, “Koisor Recho pen apar ke nelitum akaprek arecho ave.”

¹⁶Ansi thengparpan athak kepathiji aphan Pilat ke Jisu aphan halatum arideng hodailo. Lasi halatum Jisu aphan ponlo.

¹⁷Jisu amethangsi thengparpan cheparphangponlo. Ansi halatum “Phu Bongkok,” pu adim nanglelo. Ibri alam penke labangso adim aphan “Golgotha” pusi pulo.

¹⁸Halatum alangliphan hadak thengparpan athak sak-lo. Hadak halatum akaprek bang hini aphanta thengparpan athak sak-lo. Jisu aphan angbong bisi ihi inut ihi inut bilo.

¹⁹Pilat kepachini alam toksi thengparpan athak pabonlo. Ketok lapuson helo, “NAJARETH A-JISU, JIHUDI ATUM ARECHO.”

²⁰Penang amonit atum labangso alam porhelo, pima Jisu aphan thengparpan athak kesak adim ke rongsopi pen tebok-het-lo. Ibri, Roman lapen Grik alam pensi labangso kepachini alam tok-lo.

²¹Kurusar kethe atum Pilat aphan pulo, “‘Jihudi atum arecho,’ puke tok-ri, bonta, ‘Labangso amonit pulo, neke Jihudi atum arecholo,’ pule toknon.”

²²Pilat thakdunsi pulo, “Neli ke toktang-lo, toktang-lo anhelo, larthuthelo.”

²³Chedanbang atum Jisu aphan thengparpan athak sakdet aphi Jisu ape enlo, lapen la phanphli thaksi abangphutinta ephan phan enlo. Halatum Jisu achoi kedingta enlo. Labangso achoi keding ke keroi adim ave, achoi apak pen amatsi thakthorlo.

²⁴Lasi chedanbang atum chepulo, “Ili la ingsek nangne, bonta la komat abangsi kelongjima, la kechiniji aphan khadotle pathulonang.” Hastro alam kepachekokji aphansi la plang-lo, atheke hastro pulo, “Halatum ne pe hei hei chethak-lo, lapen nechoi keding kelongji aphan khadot pathulo.” Chedanbang atum labangso alam asonthotsi klemlo.

²⁵Jisu apei, Jisu apei akorte, Klopas apiso lapen Megdala a-Meri atum ke Jisu athengparpan adungsi arjapphrong-lo.

²⁶Alangli pei lapen alangli kechinghon asangho aphan hadak karjapphrong Jisu thek-ong-lo. Lasi alangli apei aphan pulo, “Jo, nangli sopo!”

²⁷Ansi alangli asangho aphan pulo, “Jo, nangli pei!” Ansi halabangso ahut pen labangso asangho labangpi aphan amethang ahem cheponlo.

²⁸Anke kadokave asonta plengtang-lo pu Jisu chinilo, lapen hastro alam kepachekokji aphan alangli pulo, “Neli lang ing-it-ong!”

²⁹Hadak drakha ahorlang kethor aharlung ehong do. Ansi tula ensi labangso aharlung along nimlo lapen arpik ehong pen la krongsi Jisu angho along bilo.

³⁰Jisu la chongsipsi pulo, “La choktang-lo.” Ansi Jisu aphu tongdiksi achethe chevung-lo.

³¹Ansi hala thengparpan athak kesaktang atum aphan akeng kepalok longji lapen thengparpan pen abang arpum pasunsi kepon longji aphan Jihudi atum angbong keja atum Pilat aphan choningrilo. Halabangso arni ke Sabbath Arni pen aphrang arnilo. Sabbath Arni halatum abang arpum thengparpan athak kepado ke halatum aning hanghe apotsi halatum lason choningridamlo. Pima hala nangkeleji a-Sabbath Arni ke halatum aphan ingthirparpik-lo.

³²Lasi chedanbang atum damsi Jisu along thengparpan athak kesakdun, aphrang abang akeng palok-lo, lapen labangso aphi halatum hala anut kaprek abang aphanta akeng palok-lo.

³³Labangso aphi halatum Jisu adung damlo, bonta Jisu thitang-lo pu chinisi halatum alangli keng ke palok-ledet-lo.

³⁴Bonta chedanbang inut abang chir pen Jisu arep along tok-lo, lapen hala mamat lang lapen vi nangbulo.

³⁵Nanglitumta labangso alam kekroithekji aphan la kethekdunlong abangsi labangso alam pulo. Alangli ahok alamsi pulo, lapen alangli kepu alam ke ahok alam pu alangli chini.

³⁶Pima, “Arepi ehong natta lok-ledetji,” pu hastro along ketok alam kepachekokji aphansi lahei hei plang-lo.

³⁷Lapen akaprek alam, atheke, “Halatum ketok-luttang abang aphan monit atum langphrongji,” pu alamta hastro along ketok do.

³⁸Labangso aphi Arimathea arong-sopi asor, Joseph pu abang Jisu abang arpum kepon longji aphan Pilat aphan choningridamlo. Labangso a-Josephta Jisu asangho inut-lo. Bonta alangli ke kekroi chepaklangdakdedet-lo. Pima Jihudi atum angbong keja atum aphan alangli pherelo. Pilat alangliphan hukum tholo. Lasi Joseph damsi Jisu abang arpum ponlo.

³⁹Hala aphrang Jisu adung ajosi kevang abang Nikodemasta Joseph along dunlo. Alangli hijung aphik pen kepangvui abap keho ajangthu lin phokep anbak ponlo.

⁴⁰Ansi latum banghini Jisu abang arpum ensi halabangso ajangthu nempru vit-lo, lapen phirsoni ape pen perlo. Lake Jihudi atum kethitang abang arpum kebidamji aphan keklem aron atang-lo.

⁴¹Jisu aphan thengparpan athak kesak adim apaiberi arlo kethitang abang arpum kebiji aphan isi arlong kehongtang do. Lake akemilang, kethitang abang arpum bidamde pinlang.

⁴²Halabangso arni ke Sabbath Arni pen aphrang arnilo, lapen la kehongtang adimta tebok-het-lo apotsi halatum Jisu abang arpum hadaksi bidamlo.