Read Karbi JON 2 Bible Online

JON 2 - Karbi bible

JON 2

¹Nini aphi Galili adet, Kana arong-sopi along piso kepangri dolo. Jisu apeita hadak dunlo,

²lapen Jisu asangho atum aphanta piso kepangri along phalo.

³Drakha ahorlang ikdetsi Jisu apei Jisu aphan pulo, “Hor iktang-lo.”

⁴Jisu thakdunsi pulo, “Sarpi neli pisi klem nangjima, lake nangli neliphan nethan nangne. Neli keklemji ahut nanglelelang.”

⁵Ansi Meri ban atum aphan pulo, “Alangli nanglitum aphan nangkepu alingle klemnon.”

⁶Jihudi atum aron atang pen keche-pangthir nangji aron do. Lasi labangso akam aphansi hadak lang kepangpen-i arlong ahing pumthrok bilo. Labangso ahing apumtinta litar pharo isi anbak jang.

⁷Ban atum aphan Jisu pulo, “La hing do-an lang pangpennon.” Halatum la do-an kungmairi an lang pangpenlo.

⁸Labangso aphi alangli halatum aphan pulo, “Nonke la hing arlo pen lang sok-ra chojun amei kechepahemphu abang along ponnon.” Ansi halatum alangli long lang ponlo.

⁹Anke labangso alang drakha ahorlang cheplangdet-lo. Alangli la chomat-lo, lapen labangso ahor konat pensi nangkedokok-loma, lake alangli chininedet-lo. Bonta hala lang kesok aban atum ke la chinilo. Lasi alangli hala piso kechepangri apinso aphan hangdetsi pulo,

¹⁰“Abangphutin amonitta akemenei adrakha ahorlangsi pi paphrangji, lapen alohi atum junpik aphisi akelam muchot adrakha ahorlang piji. Bonta nangke non anta akemenei adrakha ahorlang bibomlang!”

¹¹Galili adet, Kana arongsopi alongsi Jisu la aphrangsi kemanghumeme akam klemlo. Hadak alangli amethang adak atur chepaklang-lo, lapen asangho atum alangliphan kroilo.

¹²Labangso aphi Jisu, apei, akorte atum lapen asangho atum Kapernaum arongsopi hirdamlo. Bonta hadak arni keding dodedet-lo.

¹³Jihudi atum Kejok achojun a-Meipi tebok-het-lo apotsi Jisu Jeru-salem arongsopi arludamlo.

¹⁴Monit atum Kardomhemthepi Kangthir along chainong, biresak, lapen vothung hei hei kejor, lapen tangka kelar atum amethang methang atebul adung kangnikrei alangli thek-long-lo.

¹⁵Lasi alangli phamri pen champre abu selamsi kadokave api, atheke chainong lapen atebul hei hei tharlepisi halatum atangka hijikpi-et-lo,

¹⁶lapen vothung kejor atum aphan alangli hukum pisi pulo, “Lahei hei ladak pen ponnon! Ne-Po ahem kejor kenam adim pinchongri!”

¹⁷Ansi hastro along ketok alam, atheke “O Arnam, ne nanghem aphan kematha-e ke me kecho asonthak thak-lo,” pu alam alangli sangho atum chemathadamlo.

¹⁸Jihudi atum angbong keja atum alangli long vangthusi alangliphan arjulo, “Nangli lahei hei akemang-humeme akam keklemji ajakong do pu angthek nekepaklangji aphan nangli kopipi akemanghumeme akam klemthekma?”

¹⁹Jisu thakdunsi pulo, “Labangso a-Kardomhemthepi phridaknon, lapen neli la nithom angbong kimthupo.”

²⁰Halatum alangliphan arjuthulo, “Labangso a-Kardomhemthepi kekim ningkan phlikep-ra throk an nang-lo. Nangli la nithom angbong kim patang unjima?”

²¹Bonta Kardomhemthepi pu Jisu kepudam ke alangli methang abang arpum aphansi chepudamlo.

²²Lasi Jisu aphan kethi pen parengthusi pathurdet aphi alangli sangho atum la alangli kepu alam chemathadamlo, lapen halatum hastro alam lapen Jisu kepu alamta kroilo.

²³Jihudi atum Kejok Achojun a-Meipi ahut Jerusalem arongsopi along Jisu keklem, akemanghumeme akam hei hei thek-longsi ake-ongpi atum alangliphan kroilo.

²⁴Bonta Jisu amethang ke halatum aphan aning thethedet-lo, pima alangli halatum kadokave aphan chinilo.

²⁵Komane abang halatum alamjir alangliphan than nangji, lapu kali; pima alangli methangsi halatum aning arlo kematha alam an chinipet-lo.