Read Karbi JON 20 Bible Online

JON 20 - Karbi bible

JON 20

¹Sabbath Arni pen puthot arni adap the-ang prinprele apor ahut Megdala a-Meri halabangso atipit along damlo. Ansi halabangso atipit amangho pen arlong keterektang alangli thek-long-lo.

²Alangli katponsi Simon Pitor lapen Jisu kechinghon anut kaprek asangho along damlo. Alangli halatum aphan pulo, “Halatum alangliphan tipit pen pontang-lo, lapen alangliphan konattong kebidamlone, nelitum chinine!”

³Ansi Pitor lapen anut kaprek asangho abang tipit along damlo.

⁴Halatum banghinita katponsi damlo, bonta anut kaprek asangho abang Pitor apar kat paprapmuchotsi tipit along le paphrangmuchot-lo.

⁵Alangli tipit arlo ardiksi hadak linen ape ketirok thek-long-lo, bonta alangli tipit arlo ke lutdamdedet-lo.

⁶Simon Pitorta alangli phi ledunlo. Alangli nangkele pen mamat tipit arlo lutdamphit-lo. Hadak linen ape ketirok,

⁷lapen Jisu aphu kephung ape alangli thek-long-lo. La aphu kephung ape ke linen ape along ave, akaprek adimsi dolo lapen lake thuivet-lo.

⁸Ansi tipit along nangkele paphrang abang, atheke hala anut kaprek asangho abangta tipit arlo lutdunlo, lapen alanglita la thek-longsi kroilo.

⁹Pima Jisu kethi pen thurvek nangji pu hastro kepu alam halatum halabangso ahut anta chininelang.

¹⁰Ansi latum ahem chevoilo.

¹¹Meri ke tipit angtan arjapthersi chirubomlo. Ansi alangli chirubomsi tipit arlo ardik-lo,

¹²lapen hadak sining apherangke banghini aphan thek-long-lo. Halatum pe kelok chepindengsi Jisu abang arpum kebi adim ingniphrong-lo. Inut abang ke aphutang anat ingnilo, lapen anut kaprek abang ke akengtir anatsi ingnilo.

¹³Halatum alangliphan arjulo, “Nangli kopi athesi kechiruma, pei?” Labangpi halatum aphan thakdunsi pulo, “Halatum neli Hemphu aphan pondet-lo, lapen alangliphan kebidam adimta neli chinine!”

¹⁴La pudet aphi alangli chetevarsi hadak Jisu karjapther thek-long-lo. Bonta lake Jisulo puke alangli chininedet-lo.

¹⁵Jisu alangliphan arjulo, “Nangli kopi athesi kechiruma, pei? Nangli komat aphansi kerima?” Labangpi alangliphan paiberi arlo ketiki abangsi tinkok-lo. Lasi labangpi alangliphan pulo, “Jongsi nanglisi alangliphan terek ponlo tangte nangli alangliphan konatsi kebidamma, ne-thantha. Neli alangliphan endampo.”

¹⁶Jisu alangliphan pulo, “Meri!” Labangpi alanglinat chetevarsi Ibri alam pen pulo, “Rabboni!” (Labangso alam atheke “Kuru” pu helo.)

¹⁷Jisu alangliphan pulo, “Neliphan ne ot-ri, pima neli non anta Po along damdelang. Bonta nangli neli korte atum along damra neli ke alangli long dampo pu thandamnon. Alangli ke ne-Po lapen halatum a-Po, ne Arnam lapen halatum a-Arnamlo.”

¹⁸Lasi Meri Megdala damlo. Alangli Hemphu aphan thek-long-lo pusi sangho atum aphan thandamlo, lapen Jisu alangliphan kethan alam alangli halatum aphan than pajirmilo.

¹⁹Sabbath Arni arnikangsam apor ahut sangho atum chingrumsi inghap chingkirhet-lo. Pima halatum Jihudi atum angbong keja atum aphan pherelo. Ansi Jisu vangsi halatum angbong arjaptherlo, lapen alangli halatum aphan pulo, “Nangtum along ning kangsam padonang.”

²⁰La pudet aphi alangli halatum aphan ari lapen arep chepaklang-lo. Hemphu aphan thek-longsi sangho atum aning arongpik-lo.

²¹Jisu halatum aphan puthulo, “Nangtum along ning kangsam padonang. Po nephan neketoi asonthotsi neta nangtum aphan nangtoilo.”

²²Ansi alangli halatum aphuthak achethepi vangphunsi pulo, “Karjong Kangthir dengnon.

²³Nangtumle komane aphan apap hei hei diya lote alangliphan ke diyadettang-lo; nangtumle komane abang apap hei hei diyajedette, halabangso abang aphan ke diyajedettang-lo.”

²⁴Jisu halatum aphan kecheklang ahut sangho bangkrehini angbong pen Thomas pu abang ke (Alangliphan ke kecherop abang puta pu) halatum angbong ave.

²⁵Lasi sangho atum Thomas aphan pulo, “Netum Hemphu aphan thek-long-lo.” Thomas halatum aphan pulo, “Ari along asak kesak aban thek-longlete, lapen hala abang along neri chimun pen chut longlete, lapen arep along neri chephu longlete neke jonghe setta kroikre.”

²⁶Ni nerkep aphi sangho atum puthot hem arlo chingrumlo, lapen Thomasta halatum angbong dolo. Inghap hei hei ingkirhet-lo. Bonta Jisu halatum angbong vangsi arjaptherlo, lapen pulo, “Nangtum along ning kangsam padonang.”

²⁷Ansi alangli Thomas aphan pulo, “Nangri chimun dak nangchut-ra neri nanglangtha; lapen nangri pen ladak nerep along nangchephutha. Kroikrebomri, bonta kroinon.”

²⁸Thomas thakdunsi pulo, “O ne Hemphu, lapen ne Arnam!”

²⁹Jisu alangliphan pulo, “Nephan nekethek-long apotsi nang nephan nekekroima? Bonta kethek-longlepin pen kekroi abangsi rengme!”

³⁰Sangho atum angno Jisu keklemtang akemanghumeme akam hei hei labangso aloh along ketokte do-olang.

³¹Bonta Jisu ke Khristolo, lapen Arnam a-Sopolo pu nanglitum kekroithekji, lapen alangliphan kekroi pen ajok nanglitum chethe kelongji aphansi lahei hei tok-lo.