Read Karbi JON 3 Bible Online

JON 3 - Karbi bible

JON 3

¹Nikodemas pu inut Pharisi amonit dolo. Alangli ke Jihudi atum angbong inut keja abang-lo.

²Ningve isi alangli Jisu along damsi alangliphan pulo, “Rabbi, nanglike Arnam nangketoi akuru inut-lo pu netum chinilo, pima badutame, Arnamle dodundete la nangli keklembom, kemanghumeme akam hei hei klemthekthe.”

³Jisu alangliphan thakdunsi pulo, “Neli nangliphan ahokpetsi nangpulang, mahang thekmimete baduta Arnam a-Rat thek-longle.”

⁴Nikodemas alangliphan arjulo, “Inut arta kedotang amonit-le kopusi amahang thekthu unjilangma? Alangli jonghe setta apei apok arlo chelutdamsi batai hini aphong amahang thekthu un-elo.”

⁵Jisu thakdunsi pulo, “Neli ahokpetsi nangpulang, lang lapen Karjong pen amahang thekthete baduta Arnam a-Rat lutdun longle.

⁶Ok pen amahang kethek aling ke ok, lapen Karjong pen amahang kethek aling ke Karjong-lo.

⁷Kadokave amonitta amahang thekmi nangji pu neli nangliphan kepu apot nangli manghuhak nangne.

⁸Tomonke amethang aning kehang alingsi jap; nangli labangso arki arjulong, bonta la konat pensi kevang, mate konatsi kedamma, lake nangli chinine. Karjong pen amahang kethek atumta lasonthot-lo.”

⁹Nikodemas arjuthulo, “La kopu-sonsi plang unjima?”

¹⁰Jisu thakdunsi pulo, “Nanglike Israel angbong inut thekser akurulo setta labangso alam chininema?

¹¹Neli nangliphan ahokpetsi nangpulang, nelitum ke nelitum kechini alamsi ningje, lapen nelitum kethek-long asonsi nanglitum aphan than. Bonta nanglitum angbong inutnatta nelitum keningje alam kroikre.

¹²Neli nang-litum aphan labangso apirthe athak keplangbom alam nangthan setta nanglitum kroikre tangte, neli nanglitum aphan sining athak alamle nangthan setta nanglitum kopusi kekroijima?

¹³Lapen sining pen nangkehir abang, Monit a-Sopo apar ke baduta sining athak arludamde-pinlang.”

¹⁴Kejejangtang ajo Mosesle chin athak bitoi apherui kerung asonthotsi,

¹⁵Monit a-Sopo aphan kekroi atum an kejut un-e achethe kelongji aphan Monit a-Sopo aphanta rungvek nangji.

¹⁶Pima Arnam pirthe aphan lapu-an kanghon, Sopo aphan kekroi atum an baduta kevirvedetji, bonta kejut un-e achethe kelongji aphan alangli amethang a-Sopo po epumpetta chepidet-lo.

¹⁷Pima pirthe aphan ingsaisi ado kepadoji aphansi Arnam amethang a-Sopo aphan nangtoilo, lapu kali; bonta Sopo pen ajok pirthe kejok kelongji aphansi alangli amethang a-Sopo aphan nangtoilo.

¹⁸Sopo aphan kekroi abang aling aphan ado padode, bonta kekroikre abang aling aphan ke ado padotang-lo, pima alangli Arnam a-Sopo po epumpet aphan kroikrelo.

¹⁹Kangsai athe lahelo, kethe-ang binong pirthe athak vang-lo, bonta monit atum labangso akethe-ang aning dokdesi kangting aning dok-rong-lo. Pima halatum akam hei hei hingno.

²⁰Kehingno akam hei hei keklem abang ke kethe-ang aphan hijim, lapen alangli kethe-ang adung vangvedetji, pima alangli keklem akehingno akam hei hei keklangdakji aphan alangli aning hanghe.

²¹Bonta ahok keklem abang aling ke Arnam aphan kroisi klemlo pu keklangdakji aphan alangli akethe-ang adung vang.

²²Labangso aphi Jisu lapen asangho atum Judia adet damsi hadak halatum along penang arni dodunlo, lapen baptisom pilo.

²³Jonta Salim adung Aenon pu adim baptisom pibomlo, pima halabangso adim lang do-olo. Monit atum alangli long dambomlo, lapen alangli halatum aphan baptisom pibomlo.

²⁴Pima halabangso ahut Jon aphan phatek bengbelang.

²⁵Jon asangho atum angbong manene atum Jihudi amonit inut pen aron atang pen kechecham alam chehiliseilo.

²⁶Lasi halatum Jon along damsi pulo, “Kuru, Jordan hapu parai nang long kedo abang, atheke nangli kepudam abang nonke baptisom pibomlo, lapen kadokave atum alangli long dambomlo.”

²⁷Jon thakdunsi pulo, “Arnamle pipete baduta thangta long un-e.

²⁸‘Neke Khristo kali, bonta alangli phrang phrang nangketoitang abang-lo,’ pu ne kepu alam nangtum methangsi arjulong-lo.

²⁹Piso kechepangri apinso abang helo piso kechepangri arloso ahemphulo, bonta ladak karjapther lapen ase karjuton abang, atheke piso kechepangri apinso ajirpo ke piso kechepangri arloso ase arjulongsi aning arongparlo. Lasonthotsi non neli ning arong plengset tang-lo.

³⁰Alangli thebom nangji, bonta neli ke bibom nangji.”

³¹Sining pen kevang abang ke kadokave apar themu. Pirthe pen kevang abang ke pirthe amonit-lo, lapen alangli pirthe alam hei heisi ningje, bonta sining pen kevang abang ke kadokave apar themulo.

³²Alangli kethek-longtang lapen karjulongtang alamsi than, bonta baduta alangli kethan alam dengde.

³³Bonta alangli kethan alam kedeng abang ke labangso pen ajok sap ketheng asonthak thaksi Arnam ke ahokpet abang-lo pu paklang-lo.

³⁴Arnam nangketoi abang ke Arnam alam hei heisi ningje, pima Arnam alangliphan amethang akarjong pi paplengset-lo.

³⁵Po Arnam ke amethang a-Sopo aphan chinghon, lapen kadokave amarta alangli ridengsi pitang-lo.

³⁶Sopo aphan kekroi abang aling ke kejut un-e achethe do; Sopo aphan kekroikre abang aling ke chethe thek-longledetji, bonta Arnam aning kethi alangli phuthak dobomji.