Read Karbi JON 4 Bible Online

JON 4 - Karbi bible

JON 4

¹Jon apar Jisu sangho kepaplang lapen baptisom kepi aphai ongmuchotbomlo pu alam Pharisi atum arjulong-lo pu Jisu chinilo.

²(Tebonta Jisu amethang amat ke badu aphanta baptisom pipelo, asangho atumsi baptisom pilo.)

³Lasi Jisu Judia adet otekangsi Galili adet damthujuilo.

⁴Kedam ahut alangli Samaria alongri angbongsi damnangkok-lo.

⁵Ansi Jisu Samaria alongri Saikar pu arongsopi nanglelo. Labangso arong-sopi ke Jakob amethang asopo aphan, atheke Joseph aphan kepitekang arit pen tebok-het-lo.

⁶Hadak Jakob alangtuk do. Tovar kevang apot lak-huisi Jisu halabangso alangtuk adung ingnilunlo. Halabangso ahut nerlo chitim anbak dolo.

⁷Inut a-Samariapi lang kesokjisi hadak vang-lo, lapen Jisu alangliphan pulo, “Neliphan kejun alang nepi-iktha.”

⁸Pima Jisu asangho atum ke kecho ahormu kenamdamjisi rongsopi dam-et-lo.

⁹Halabangso a-Samariapi alangli-phan thakdunsi pulo, “Nanglike Jihudi amonit, lapen neli ke inut a-Samariapilo. Tangte nangli kopusi neli pen kejun alang chohang-loma?” Pima Jihudi lapen Samaria atum angbong thangta che-un-e.

¹⁰Jisu thakdunsi pulo, “Nangli Arnam adan lapen nangli long pen lang kechohang abang aphan chini asonte nangli alangli long pen chohangji apot-lo, lapen alangli nangliphan chethe kepi alang nangpiji apot-lo.”

¹¹Labangpi alangliphan pulo, “Akehai, nangli long lang kesok-i ajoton ave, lapen labangso alangtuk ke arnukkrung. Nangli hala chethe kepi alang konatsi longdampoma?

¹²Nelitum aphusar Jakobsi labangso alangtuk nelitum aphan pitekang-lo. Alangli sopo atum lapen achainong ahurta labangso alangtuk alangsi junlo. Jakob mute nangli themu kali, kalima?”

¹³Jisu thakdunsi pulo, “Labangso alang kejun abang aling ke ingitthu-jilang,

¹⁴bonta neli kepiji alang kejun abang aling ke kaita ingitthuthepinji. Neli alangliphan kepiji alang ke alangli bang arlo lang amek cheplangji lapen la alangliphan chethe kepi alang pisi kejut un-e achethe piji.”

¹⁵Labangpi alangliphan pulo, “Akehai, halabangso alang neliphan nepitha. Anke neli kaita ingitthuthepinpo, lapen neli ladak lang nangsokjokphlotpo.”

¹⁶Jisu alangliphan pulo, “Nangli penan chehangdamra ladak vangthunon.”

¹⁷Labangpi thakdunsi pulo, “Neli penan ave.” Jisu thakdunsi pulo, “Nangli penan ave pu nangli kepu alam ahok.

¹⁸Nangli bangpho apinso pen chepangritang-lo, lapen non nangli pen kedorap rap abangta nangli penan binong kali. Nangli ahokpet alamsi nethanlo.”

¹⁹Labangpi pulo, “Neli chinilo, Hemphu! Nanglike Arnam amontrilo.

²⁰Nelitum Samaria aphusar atum ke labangso anglong athaksi Arnam aphan archolo. Bonta Jerusalem arongsopi alongsi monit atum Arnam aphan ingduk-ardom nangji pusi nanglitum Jihudi atum ke pulo.”

²¹Jisu alangliphan pulo, “Neli lam kroitha, pei! Monit atum Po aphan labangso anglong athak lapen Jerusalem arongsopi alongta ingduk-ardomdedetji, lason ahut vangji.

²²Nanglitum Samaria atum ke komat aphansi karchoma, lake nanglitum chinine. Bonta nelitum Jihudi atum ke komat aphansi karchoma, lake nelitum chinilo. Pima kejok ke Jihudi atum angbong pensi kevang.

²³Bonta kangduk-kardom binong atum ke Arnam a-Karjong ajakong pen lapen ahokpet pensi Po Arnam aphan archoji, lason ahut nangleji; lapen nonta la nangletang-lo. Pima Po ke lason akarcho si keri.

²⁴Arnam ke Karjong, lapen alangphan karcho atum anke Karjong lapen ahokpet pensi archo nangji.”

²⁵Labangpi thakdunsi pulo, “Khristo vangji puke neli chini, lapen alangli vang-lote alangli ilitum aphan kadokave alam ethanji.”

²⁶Jisu alangliphan pulo, “Halabang-so abang ke neli helo; alangli ke la nangli pen kechingkibom abang helo.”

²⁷Halabangso ahut Jisu asangho atum nangchiruilo, lapen Jisu inut arloso pen kechingki thek-longsi manghuphrong-lo. Bonta halatum baduta labangpi aphan, “Nangli kopisi kenangji,” pu mate Jisu aphan, “Nangli labangpi pen kopi athesi kechingkima,” puta arjujedet-lo.

²⁸Ansi labangso arloso lang atebuk che-o-tekangsi rongsopi chedamlo, lapen hadak kedo amonit atum aphan pulo,

²⁹“Neli keklemtang akam an nekethanpet abang aphan nang-langdunhurtha. Alangli ke Khristo tahailo.”

³⁰Lasi halatum rongsopi pen nangbarsi Jisu adung vang-lo.

³¹Halabangso ahut asangho atum Jisu aphan choningrisi pulo, “Kuru, nangli kopine chotha!”

³²Bonta Jisu thakdunsi pulo, “Ne kechoji aphan ke nangtum kechini-nedet a-an do.”

³³Lasi sangho atum lahin lahin charjuseroisi pulo, “Komane abang alangliphan kecho ahormu vanpitang-lobo?”

³⁴Jisu latum aphan pulo, “Nephan neketoi abang aphan aning kehang akam keklempi lapen nephan nekepaklemtoi akam keklem kepatang helo ne anlo.

³⁵‘Chiklo jonphli aphisi sok rotji,’ pusi nangtum pupu, kalima? Bonta ne nangtum aphan nangpulang, nangtum aphu chingthurra rit anat langtha: Sokke mentang-lo, rotme pametang-lo.

³⁶Sok kerot abang anam long, lapen kejut un-e achethe aphan sok athe pangrum. Lasi sok kerik abang lapen kerot abang aning arong rap-rapji.

³⁷Pima ‘Inut amonit ke chili kerik, anut kaprek amonit ke kerot,’ pu kepu alam ahok.

³⁸Nangtum ketiki kalidet arit ajo nangtum sok kerotjisi ne nangtum aphan nangtoitang-lo. Anut kaprek atumsi hadak sai tikilo, lapen nangtum ke halatum keklem akam pen ale long-lo.”

³⁹“Neli keklemtang akam an alangli nethanpet-lo,” pu halabangso arloso kepu alam pen apotsi halabangso arongsopi ake-ongpi a-Samaria atum Jisu aphan kroilo.

⁴⁰Lasi Samaria amonit atum Jisu along vangsi halatum along kedoji aphan choningrilo, lapen Jisu hadak nini dokok-lo.

⁴¹Jisu kethan alam pen apot kekroi atum aphrang apar ongthumuchot-lo.

⁴²Halatum labangpi aphan pulo, “Nangli kethan alam pen apot kali, bonta nelitum methang mamat alangli kethan alam arjulong-lo apotsi non nelitum kroilo. Lapen nelitum chinilo, alangli ke pirthe aphan kepajok abang binong-lo.”

⁴³Nini aphi Jisu hadak pen barsi Galili adet damlo.

⁴⁴Pima Jisu amethangsi pulo, “Arnam amontri ke amethang ahavar angbong ke aman longle.”

⁴⁵Alangli Galili adet nangkele ahut Galili adet amonit atum alangli-phan chak-lo, pima kejok acho jun a-Meipi ahut halatum Jerusalem dunlo, lapen halabangso Ameipi ahut Jisu keklem akam an halatum thek dunlong-lo.

⁴⁶Ansi Jisu Galili adet Kana arongsopi chedamthulo. Alangli lang pen drakha ahorlang kepaplang adim hadak helo. Hadak inut saikhihemphu dolo. Alangli sopo Kapernaum arong-sopi along sodet-lo.

⁴⁷Jisu Judia adet pen Galili adet vangtang-lo pu arjulongsi alangli Jisu adung damlo, lapen Jisu alangli long Kapernaum arongsopi dunsi alangli sopo aphan keso kepameji aphan alangli Jisu aphan choningrilo. Pima alangli sopo thijidokdok-lo.

⁴⁸Ansi Jisu alangliphan pulo, “Kemanghumeme akam hei hei lapen kemathadam un-edet akam kethe hei hei thek-longlete nanglitum kaita kroikre.”

⁴⁹Saikhihemphu abang alangliphan pulo, “Hemphu, neli sopo thithe ako nangli neli long nangduntha.”

⁵⁰Jisu alangliphan pulo, “Damnon, nangli sopo rengpo.” Halabangso saikhihemphu Jisu alam kroilo. Lasi alang hem chedamlo.

⁵¹Alangli tovar kedam ahut aban atum alangliphan chetongsi birta thanlo, “Nangli sopo reng-lo.”

⁵²Alangli sopo ko-an apor ahut pensi keso keme pangcheng-loma pusi alangli halatum aphan arjulo. Halatum alangliphan thakdunsi pulo, “Patumi arni kangsam baji isi apor ahut pensi aphu keso hamlo.”

⁵³Ansi halabangso aporchit ahutsi Jisu alangliphan, “Nang sopo rengpo,” pu pulo pu hala-bangso a-oso apo chemathadamlo. Lasi alangli lapen ahem ehum amonit Jisu aphan kroilo.

⁵⁴Jisu Judia adet pen Galili adet vangdet aphi alangli batai hini aphong keklem kemanghumeme akam la helo.