Read Karbi JON 5 Bible Online

JON 5 - Karbi bible

JON 5

¹Labangso aphi Jisu Jihudi atum achojun Ameipi along kedunjisi Jerusalem arludamlo.

²Jerusalem arongsopi along Biresak Ajakan adung isi alangbi dolo. Ibri alam penke labangso alangbi aphan Bethesda pusi pulo. Labangso alangbi akung mandu humpho dolo.

³Halabangso amandu along keso kepangji ake-ongpi atum, atheke amek kave, akeng ketekok lapen thi-klak akeso atum tiruisi dolo.

⁴Pima ahut pen ahut Arnam apherangke inut halabangso alangbi along nangsunsi lang pavuivai titilo. Lang kepavuivai aphijong langbi along kesun paphrangcheng abang ke ajat akeso setta medet titilo.

⁵Hadak ningkan thomkep ra nerkep keso kepangji amonit dolo.

⁶Jisu alangliphan hadak ijoi thek-long-lo. Labangso amonit keso kepangji lapu-an aningkan dolo pu Jisu chinilo. Lasi alangli labangso amonit aphan arjulo, “Nangli kemedetji nangning hangma?”

⁷Keso kepangji abang alangliphan thakdunsi pulo, “Hemphu, lang kepavuivai ahut neliphan langbi along nekepasunji abang inutta ave. Neli kesunji kebor-i ahut anut kaprek atum hadak sun paphrang munak titi.”

⁸Jisu alangliphan pulo, “Thurnon, nangli tarthui cheponra kengkam chejornon.”

⁹Halabangso amonit akeso hala mamat medet-lo. Lapen alangli atarthui cheponsi kengkam chejorlo. Halabangso arni ke Sabbath arnilo.

¹⁰Lasi Jihudi atum angbong keja atum hala keso kemedet abang aphan pulo. “Pini ke Sabbath arni, tarthui kepon ke kertang-lo.”

¹¹Alangli thakdunsi pulo, “Neliphan keso kepame amonitsi neliphan, tarthui cheponra kengkam chejornon, pu nepulo.”

¹²Halatum alangliphan arjulo, “Komat amonitsi nangliphan, Tarthui cheponra kengkam chejornon, pu nangkepulo?”

¹³Bonta keso kemedet abang ke Jisu aphan chinine. Pima halabangso adim monit do-olo, lapen Jisu armu anglum damjuilo.

¹⁴Aphi Jisu alangliphan Kardom-hemthepi along longdamsi alangliphan pulo, “Mathanon, nonke nangli metang-lo. Lasi nangli aphrang apar kopine akehingnomuchot kephophedetjile non pen apara pap klemrinon.”

¹⁵Ansi halabangso amonit damsi alangliphan keso kepame abang ke Jisu helo pusi Jihudi atum angbong keja atum aphan thandamlo.

¹⁶Lasi halatum Jisu aphan kepasungji pang-cheng-lo, pima alangli kesang arnisi keso pamelo.

¹⁷Jisu halatum aphan thakdunsi pulo, “Ne-Po ke kaiketa kam klemver, lapen nelita klemvek nangji.”

¹⁸Labangso alam apotsi Jihudi atum Jisu aphan kepathiji ansose chesik-lo. Pima alangli Sabbath arni kekroikre anchot kali, Arnam ke alangli methang a-Polo pusi pulo, lapen lasonsi alangli methangsi Arnam pen chepachingbar-lo.

¹⁹Lasi Jisu thakdunsi pulo, “Neli nanglitum aphan ahokpetsi nangpulang, Sopo amethang ke thangta klem un-e; alangli kethekdunlong Po keklembom akamsi alangli klemchot.

²⁰Pima Po ke Sopo aphan chinghon, lapen alangli keklembom akam an Sopo aphan paklang, lapen nanglitum kadokave aphan kepamanghuphrongji aphan alangli la apar akethemu akam hei heita alangliphan paklangjilang.

²¹Po-le kethitang aphan pathursi chethe kepi asonthotsi Sopota amethang aning kehang aling aphansi chethe pi.

²²Lapen Po amethang amat ke badu aphanta ingsaise. Atheke kadokave atum Po aphan aman kepi asonthotsi Sopo aphanta aman kepithekji aphan alangli amethang a-Sopo aphansi kangsai akam an pektang-lo.

²³Sopo aphan aman kepipe abang ke Sopo aphan nangketoi abang aphan, atheke Po aphanta aman pipe.

²⁴“Neli nanglitum aphan ahokpetsi nangpulang, neli lam karju lapen neliphan neketoi abang aphan kekroi abang ke kejut un-e achethe do. Alangliphan ingsaisedetji, bonta alangli ke kethi angbong pen damsi chethe angbong lutdamtang-lo.

²⁵Neli nanglitum aphan ahokpetsi nangpulang, kethitang atum Arnam a-Sopo ase arjulongji, lapen la karju atum rengji, lason ahut nangleji; lapen nonta la nangletang-lo.

²⁶Po amethang ke chethe atiri asonthotsi alangli Sopo aphanta chethe atiri paplang-lo.

²⁷Alangli Sopo aphan kangsai ajakong pitang-lo. Pima alangli ke Monit a-Sopolo.

²⁸Nanglitum labangso alam pen apot manghuri; pima kethitang atum an alangli se arjulongji,

²⁹lapen amethang atipit arlo pen nangbarji, lason ahut vangji. Akeme keklem atum ke thursi rengji, lapen akehingno keklem atum ke thursi kesung phoji.

³⁰“Nelimethang ajakong penke neli thangta klem un-e; Arnam neliphan nekethan atengsi neli ingsaichot. Lasi neli akangsai ke chokpamelo, pima neli ke nelimethang aning kehang aling keklemji bor-i-e. Neliphan neketoi abang aning kehang atengsi neli ke klemchot.

³¹“Nelisi nelimethang ahaki chepi asonte neli kethan alam ke ahok pu dengmememe.

³²Bonta komane abangsi neli lamjir haki pibomlo, lapen alangli neli lamjir kethan alam anke ahokpet alamlo, lake neli chini.

³³Nanglitum Jon adung monit toilo, lapen alangli ahok alamjir ahaki pilo.

³⁴Komane abang neli lamjir haki pinangji, lapu kali, bonta nanglitum kejok kelong thekji aphansi neli la pulo.

³⁵Jon ke kekar-ang, lapen keturbong amelur asonthak thak-lo, lapen nanglitum malomso ahut an alangli akethe-ang angbong kechehokjisi neli ning hang-lo.

³⁶neli nelimethang ahaki do. Lake Jon kepi ahaki apar themulo. Neli keklem akam, atheke Neli Po neliphan nekepaklemtoi akam hei heisi neli lamjir thanlo, lapen lake Po neliphan netoitang-lo pu paklangdak-lo.

³⁷Neliphan neketoi abang, Pota neli lamjir haki pilo. Nanglitum alangli se arju longlepinlang, mate arje thek-longlepinlang.

³⁸Nanglitum alangli kethan alam ning chebibe, pima nanglitum alangli nangketoitang abang aphan kroikre.

³⁹Nanglitum hastro porhebom, pima lahei hei pen ajok kejut un-e achethe longji pusi nanglitum mathalo. Lapen la hastrota neli lamjir thanlo.

⁴⁰Tebonta nanglitum chethe kelongji aphan neli long kevangji ning hanghe.

⁴¹“Neli monit pen kero kelongji aphanle keri kali.

⁴²Bonta nanglitum kopuson amonitma, lake neli chini, lapen nanglitum aning arlo Arnam aphan akanghon ave, lata neli chini.

⁴³Neli neli-Po amen pensi vang-lo, bonta nanglitum neliphan dengdedet-lo. Bonta komane abang amethang amen pen vang-lote nanglitum alangliphan chakji.

⁴⁴Nanglitum lahin lahin pen kero kelongji aphan ning hang, bonta inutpet Arnam nangkeparoji aphan ke nanglitum bor-i-e; tangte nanglitum kopusi neliphan kroithekjima.

⁴⁵Tebonta neli nanglitum aphan Po angno adai nangdinji puke nanglitum mathari. Nanglitum aphan adai nangkedinji abang ke nanglitum ning kechethedam abang, atheke Moses helo.

⁴⁶Nanglitum Moses aphan kroilo asonte neliphanta kroiji apot-lo, pima alangli neli lamjir tok-lo.

⁴⁷Bonta nanglitum jongsi alangli ketok alam kroikre tangte kopusi neli kepu alam kroithekjima?”