Read Karbi JON 6 Bible Online

JON 6 - Karbi bible

JON 6

¹Labangso aphi Jisu Galili atalo, atheke Taiberia atalo kapsi hapu parai damlo.

²Armu ake-ongpi atum alangli phi phi dunlo, pima alangli keso kepame akemanghumeme akam hei hei halatum thek dunlong-lo.

³Jisu inglong arludamsi asangho atum pen pen ingnilo.

⁴Halabangso ahut Kejok Achojun a-Meipi tebok-het-lo.

⁵Jisu aphu chingthursi talavir lang-lo. Armu ake-ongpi alangli long kevang thek-longsi alangli Philip aphan pulo, “La kadokave amonit aphan kepachoji aphan ili konatsi him nam-damlongpoma?”

⁶Philip aphan asat kelangjisi Jisu la pulo. Pima alangli kopisi klemji, lake alangli chinilo.

⁷Philip thakdunsi pulo, “Abangphutin aphan asap sap ahim kepachoji aphan anta him kenamji aphan rup atangka pharo hini sose an nangji.”

⁸Jisu asangho atum angbong pen Andriu pu Simon akorte abang alangliphan thakdunlo.

⁹“Ladak pinso a-oso inut along him plangpho lapen ok jonni do. Bonta la anvetke kopusi la kadokave amonit kechodorpoma?”

¹⁰Jisu halatum aphan pulo, “Halatum aphan papangninon.” (Hadak bapso do-o.) Ansi kadokave amonit hadak ingnilo. Hadak pinsomar bang suri pho anbak dolo.

¹¹Jisu him enpetsi Arnam aphan kero pilo, lapen hadak kangniphrong amonit atum aphan la paronlo. Lang a-ok penta alangli lasonsi klemlo. Halatum un-an cholo.

¹²Halatum ingkrangling aphi alangli asangho atum aphan pulo. “Hala ke-ik-un-e ahin an pangrumnon, ilitum la asapta pavir nangne.”

¹³Lasi halatum la kadokave pangrumlo. La monit atum hala plangpho ahim kecho ke-ik-un-e ahin pangrumsi ton krehini papleng-lo.

¹⁴Ansi halabangso amonit atum la alangli keklemtang akemanghumeme akam thek-longsi pulo, “Ahok-lo, pirthe athak kevang nangji abang, Arnam amontri alangli helo.”

¹⁵Ansi halatum alangliphan recho kebatjisi kebor-i kebor-a pen setta alangliphan kenepjisi vangji dokdok-lo pu Jisu chinilo. Lasi alangli inglong anat katthujuilo.

¹⁶Arni kangsam ahut Jisu asangho atum talo akung damlo.

¹⁷Halatum hadak telong ehum chethapsi Keparnaum arongsopi anat talo pen kekapjisi barlo. Arni nangningvebomlo. Halabangso ahut anta Jisu halatum along vangvelang.

¹⁸Halabangso ahut tomon kethe vangsi lang paplikplak-olo.

¹⁹Sangho atum mali kethom-phli anbak akehelo telong vekdet aphi Jisu lang athak akeng pen damsi telong anat kevangbom halatum thek-long-lo, lapen halatum pherelo.

²⁰Ansi Jisu halatum aphan pulo, “Phere nangne, ne lema!”

²¹Lasi halatum aning arong pen Jisu aphan telong pachethap-lo, lapen hala mamat halatum kepaleji adim telong pen nanglelo.

²²Puthot arni talo hapu parai kedo a-armu atum hadak telong kedo ehumnat pu chinilo. Ansi Jisu ke asangho atum along chethapdunde, asangho atumdetsi damchot-lo pu halatum chinilo.

²³Ansi Taiberias pen kevang akaprek atelong hei hei talo akung nanglelo. Hala Hemphu Arnam aphan kero pidetsi keron ahim monit atum kecho adim pen labangso adim ke tebok-het-lo.

²⁴Jisu lapen asangho atum hadak ave thek-longsi armu atum Jisu aphan ridunsi halabangso atelong hei hei chethap-lo lapen Kapernaum arongsopi anat damjuilo.

²⁵Monit atum Jisu aphan talo hapu parai longdamsi alangliphan pulo, “Kuru, nangli ladak komantusi nangkelerok-loma?”

²⁶Jisu halatum aphan pulo, “Neli nanglitum aphan ahokpetsi nang-pulang, la neli keklem kemanghumeme akam hei hei alam athe nanglitum kechini apot-le nanglitum neliphan keri kali, bonta nanglitum halabangso ahim cholo, lapen nangning hang an cholo apotsi nanglitum neliphan rilo.

²⁷Kevirdetji a-an kelongji aphan klem chepadukri bonta kejut un-e achethe kelongji aphan kevir un-epin a-an kelongji aphanle klem chepaduknon. Monit a-Sopo nanglitum aphan labangso a-ansi nangpipo. Pima labangso akam kepaklemji aphan Po Arnam alanglithak sap thengtang-lo.”

²⁸Lasi halatum alangliphan arjulo, “Arnam aning kehang akam keklemji aphan nelitum kopisi klem nangjima?”

²⁹Jisu thakdunsi pulo, “Arnam aning kehang akam ke alangli nangketoitang abang aphan kekroi helo.”

³⁰Halatum thakdunsi pulo, “Tangte nangli keklem akemanghumeme akam nelitum thek-longsi nangliphan kekroithekji aphan nangli kopi kemanghumeme akam klemjima? Nangli kopisi klemjima?

³¹Hastro along ketok, ‘Halatum kechoji aphan alangli sining angsong pen him pilo,’ pu alam asonthotsi nelitum aphusar atum kejejangtang ajo mana a-an cholo.”

³²Jisu halatum aphan pulo, “Neli nanglitum aphan ahokpetsi nang-pulang, Mosesle nanglitum aphan sining pen kevang ahim nangkepi kali, ne-Posi nanglitum aphan sining pen kevang ahim binong nangpilo.

³³Pima sining angsong pen vangsi pirthe amonit atum aphan chethe kepibom abang helo Arnam kepi ahimlo.”

³⁴Ansi halatum alangliphan arjulo, “Nelitum aphan labangso ahim nepivertha, Hemphu.”

³⁵Jisu halatum aphan pulo, “Chethe ahim neli helo, neli long kevang abang aling kaita ingchirchedetji; neliphan kekroi abang aling kaita ingit-edetji.

³⁶Bonta neli nanglitum aphan kepu asonthotsi nanglitum neliphan thek-long-lo setta kroikrelo.

³⁷Neli-Po neliphan neli kepi atum an neli long vangji, lapen neli long kevang abang aling aphan neli phlungphledetji.

³⁸Pima neli nelimethang aning kehang akam keklemji aphanle sining pen nangkehir kali, bonta neliphan neketoi abang aning kehang akam keklemji aphansi neli sining angsong pen nanghirlo.

³⁹Neliphan neketoi abang aning kehangke la helo, neliphan nekepitang atum an angbong pen inutnat aphanta neli pangbobedet nangji, bonta mo kejut arni neli halatum kadokave aphan pathursi pareng nangji.

⁴⁰Pima ne-Po aning kehangke lahelo, Sopo aphan kethek-long lapen kekroi atum an kejut un-e achethe long nangji. Lapen mo kejut arni neli halatum aphan pa-rengsi pathurji.”

⁴¹Ansi monit atum alangli bethursi pasimutur tarlo. Pima, “Sining pen kevang ahim ke neli helo,” pusi alangli pulo.

⁴²Lasi halatum pulo, “Labangso amonit ke Joseph asopo, Jisulo, kalima? Nelitum labangso amonit api-apo aphan chinilo. Tangte non alangli kopusi sining pen nanghirtang-lo pu keputhekma?”

⁴³Jisu thakdunsi pulo, “Nanglitum hijan angbong chepasimuri.

⁴⁴Neliphan neketoi abang, Po-le nangtum aphan nelong nang-pateboktoitete baduta nelong vang un-e. Lapen mo kejut arni neli alangliphan parengsi pathurji.

⁴⁵‘Arnam abangphutin aphan thanji,’ pusi Arnam amontri atum tok-lo. Po alam karju lapen alangli pen kecharli abang aling neli long vangji.

⁴⁶Tebonta komane abang Po Arnam aphan thek-long tang-lo pule neli kepudam kali. Arnam pen kevang abang inutsi Po aphan thek-longchot.

⁴⁷Neli nanglitum aphan ahokpetsi nangpulang, Kekroi abang kejut-un-e achethe do.

⁴⁸Chethe ahim neli helo.

⁴⁹Nanglitum aphusar atum ke kejejangtang ajo mana a-an cholo setta thikoilo.

⁵⁰Bonta sining pen kevang ahim ke lapuson helo; la kecho abang aling thithedetji.

⁵¹La sining pen kevang chethe kepi ahim ke neli helo. Labangso ahim kecho abang aling ke kejut un-e akai anta rengji. Neli alangliphan kepiji ahim ke nelimethang abang a-ok helo. Pirthe kerengthekji aphan neli labangso ahim pi.”

⁵²Labangso alam pen apot halatum chebohongseisi lahin lahin chepulo, “Labangso amonit kopusi ilitum kechoji aphan amethang abang a-ok epithekpoma?”

⁵³Jisu halatum aphan pulo, “Neli nanglitum aphan ahokpetsi nangpulang, nanglitum jongsi Monit a-Sopo abang a-ok choche lapen avi junje tangte nanglitum chethe avedetji.

⁵⁴Neli bang a-ok kecho lapen neli vi kejun abang ke kejut un-e achethe do, lapen mo kejut arni neli alangliphan parengsi pathurji.

⁵⁵Pima neli bang a-ok ke an binong-lo, lapen neli vi ke kejun ahormu binong-lo.

⁵⁶Neli bang a-ok kecho lapen neli vi kejun abang ke neli pen chelangpetver, lapen neli alangli pen chelangpetver.

⁵⁷Kerengver abang Posi neliphan netoilo, lapen alangli pen ajoksi neli reng-lo. Lasonthotsi neliphan nekecho abangta ne pen ajok rengji.

⁵⁸Tangte sining pen kevang ahim lahelo; labangso ahim ke nanglitum aphusar atum kecho ahim ason kali. Pima nanglitum aphusar atum kecho ahim ke halatum cholo setta thikoilo. Bonta labangso ahim kecho abang ke kejut un-e akai anta rengji.”

⁵⁹Keparnaum arongsopi asinagog along Jisu lam kethan ahutsi alangli labangso alam pulo.

⁶⁰Jisu along kedun atum angbong pen ake-ongpi atum labangso alam arjulongsi pulo, “Labangso alam kedengji sungkrung. Komatsi la arju-thek-poma?”

⁶¹Alangliphan thanthepin setta, labangso alam apotsi halatum pasimu-turtarlo pu Jisu chinilo. Lasi alangli halatum aphan pulo, “Labangso alam pen apot nanglitum aning oilak-loma?

⁶²Tangte Monit a-Sopo aphrang kedo adim kecharludamthu thek-long lote nanglitum kopi pupoma?

⁶³Arnam a-Karjongsi chethe pi. Monit ajakong penke la thangta klem un-e. Neli nanglitum aphan nangkeputang alam hei hei ke chethe kepi a-Karjong vanlo.

⁶⁴Bonta nanglitum angbong manene atum ke kroikrelo.” Alangliphan komat mat atum kroikrejima, lapen komat abangsi alangliphan hotur arideng hodaijima, lake kecheng ahut penta Jisu chinilo.

⁶⁵Lapen alangli puthulo, “Lasi Po-le jakong pipete baduta nelong vangthekthe pu neli nanglitum aphan nangpulo.”

⁶⁶Labangso alam pen apotsi Jisu along kedun penang atum ke alang-liphan obupsi hala pen apara alangli long chelang dundedet-lo.

⁶⁷Lasi alangli asangho bangkrehini atum aphan arjulo, “Nangtumta nephan ne-orupjima?”

⁶⁸Simon Pitor alangliphan thakdunsi pulo, “Netum komat alongsi kedam-jilangma, Hemphu? Kejut un-e achethe alam hei hei ke nanglongsi do.

⁶⁹Lapen Kangthir, Arnam pen kevang abang ke nang helo pu nonke netum kroilo lapen chinilo.”

⁷⁰Jisu thakdunsi pulo, “Nesi nang-tum bangkrehini aphan nang-ingvailo, kalima? Bonta nangtum angbong inut abang ke hi-ilo.”

⁷¹Alangli Simon Iskariot asopo, Judas aphansi labangso alam pudamlo. Pima Judasta sangho bangkrehini angbong inut-lo setta alangli Jisu aphan hotur arideng hodaiji dokdok-lo.