Read Karbi JON 7 Bible Online

JON 7 - Karbi bible

JON 7

¹Labangso aphi Jisu Galili adet dodamlo. Pima alangli Judia adet kedo-kedam aning hanghedet-lo. Atheke hadak Jihudi atum angbong keja atum alangliphan kepathiji abidi ribomlo.

²Halabangso ahut pharla ahem arong-aje tebok-het-lo.

³Lasi Jisu amumar atum alangliphan pulo, “Nanglong nangkedun atum nang keklembom akam hei hei kethek-longjile labangso adim ora Judia adet damnon.

⁴Badutame, kecheklangdakji aning kehang abang ke alangli keklembom akam patute. Nang lahei hei akam klembomlo apotsi pirthe adangta nanglamjir pachininang.”

⁵Pima alangli mumar atumta alangliphan kroikrelo.

⁶Jisu halatum aphan pulo, “Nephan ahut nanglelelang, bonta nangtum aphan ke kaita ahutverlo.

⁷Nangtum aphan ke pirthe nanglang selet-le, bonta nephan ke la nelangselet-lo. Pima pirthe keklembom akam hei hei hingno pusi neke thanbomlo.

⁸Nangtumle rong aje amei along dunnon. Neke dundelo. Pima nephan ke non anta ahut nanglelelang.”

⁹Labangso alam pusi alangli Galili adet dokok-lo.

¹⁰Bonta amumar atum rong aje amei along dundet aphi alanglita hadak dunlo. Bonta rat angno kecheklangdak penke alangli dundedet-lo, kechepatu pensi alangli dunlo.

¹¹Jihudi angbong keja atum alangliphan rong aje along rilo. Halatum arju-arjusi pulo, “Alangli konat-lo?”

¹²Armu atum angbong alangli lamjir chethan palamsohurlo. Manene atum pulo, “Alangli ke inut mesen amonit-lo” Anut kaprek atum pulo, “Kali, alangli ke monit atum aphan kehingno atovarsi japonbomlo.”

¹³Bonta alangli lamjir baduta ningjedak haihedet-lo, pima Jihudi angbong keja atum aphan halatum pherelo.

¹⁴Rong aje amei achitim anbak damdet aphi Jisu Kardomhemthepi arlo damsi monit atum aphan kethanji pangcheng-lo.

¹⁵Ansi Jihudi angbong keja atum manghupiksi pulo, “Labangso abang charlidundepinle kopusi lapu-an alam kechiniloma?”

¹⁶Jisu thakdunsi pulo, “Neli kethan alam ke neli methang aning kehang pen kethan alam kali, bonta labangso alam ke neliphan neketoi abang, Arnam pensi vang-lo.

¹⁷Arnam aning kehang aling keklemji aning kehang abang ke la neli kethan alam Arnam pensi kevangma, mate neli methang abidi pensi neli ningjeloma, lake alangli chiniji.

¹⁸Amethang abidi pen keningje abang ke amethang anongsi keri, bonta alangliphan nangketoi abang aphan anong kepatheji aning kehang abang ke ahokpet abang-lo, lapen alangli ning arlo thang ahok-he ave.

¹⁹Moses nanglitum aphan Aron nangpilo, kalima? Bonta nanglitum angbong baduta labangso Aron kroikrelo. Nanglitum kopi athesi neliphan kepathiji abidi ribomloma?”

²⁰Armu atum thakdunsi pulo, “Nangli hi-i pholok-lo. Komatsi nangli-phan kepathiji abidi ribomloma?”

²¹Jisu thakdunsi pulo, “Neli eson akemanghumeme akam klemlo, lapen nanglitum kadokave manghuhurlo.

²²Nanglitum asopo atum aphan nanglitum reng-rot kepiji aphan Moses Aron nangpilo. (Bonta Mosesle la keklem kepangchengtekang kali, nanglitum aphusar atumsi la klem pangcheng tekang-lo.) Lasi nanglitum Sabbath Arnita pinso a-oso aphan reng-rot pilo.

²³Moses kepitekang Aron kangdidedetji aphan Sabbath Arni setta pinso a-oso aphan reng-rot pilo tangte kopi apotsi Sabbath Arni neli inut amonit aphan keso kepame apot-le nanglitum neliphan ningthiloma?

²⁴Athak langphruichot pen ingsairi, bonta ahokpet penle ingsainon.”

²⁵Jerusalem asor manene atum pulo, “Labangso amonit aphansi keja atum kepathiji abidi ribomlo, kalima?

²⁶Langtha, alangli rat angbong lam ningjebomlo, lapen halatum alangliphan thangta pupelo! Khristo ke alangli helo pu halatum chinilorloma?

²⁷Khristo kevangji ahut ke, alangli konat pensi vangjima, lake baduta chininedetji. Labangso abang ke konat pensi kevangma, lake ilitum chinilo.”

²⁸Kardomhemthepi arlo Jisu lam kethan ahut alangli ase kethe pen pulo, “Nanglitum neliphan chini binongma? Neli konat pensi kevangma, la nanglitum chinibinongma? Neli ke nelimethang aning kehang penle kevang kali. Tebonta neliphan neketoi abang ke ahokpet abang-lo. Nanglitum alangliphan chinine.

²⁹Bonta neli ke alangliphan chini, pima neli ke alangli pensi vang-lo, lapen alanglisi neliphan netoilo.”

³⁰Ansi halatum alangliphan kenepji mathalo, bonta baduta alangliphan papho haihedet-lo, pima alangli ahut nanglelelang.

³¹Bonta armu angbong pen ake-ongpi atum alangliphan kroilo, lapen pulo, “Mo Khristo vang-lote alangli ke labangso amonit keklem akemanghumeme akam hei hei apar keklem ongmujima?”

³²Armu atum Jisu alamjir lapuson kechethan palamso alam Pharisi atum arjudun long-lo. Lasi halatum lapen kurusar kethe atum alangliphan kepanepjisi Kardomhemthepi along keton aron-aso atum aphan nangtoilo.

³³Ansi Jisu pulo, “Neli non malomso ahut an nanglitum angbong dojilang. Labangso aphi ke neli neliphan neketoi abang along damjuiji.

³⁴Nanglitum neliphan riji, bonta longledetji. Pima neli kedoji adim ke nanglitum nangdun un-e.”

³⁵Jihudi atum angbong keja atum lahin lahin chepulo, “Ilitum alangliphan kelongledetji aphan alangli konat kedamjisi chesik-loma? Alangli hala Grik atum angbong kepratsei a-Jihudi atum along damsi Grik atum aphan thandam poma?

³⁶Ili alangliphan riji, bonta longledetji lapen alangli kedoji adim ilitum dun un-e pusi alangli pulo. Alangli la kopisi kepudamma?”

³⁷Mei kechekak arni, atheke meipi arni Jisu arjapthersi ase kethe pen pulo, “Kang-it abang nelong pavang-ra pajunnang.

³⁸Atheke hastro pulo, ‘Neliphan kekroi abang aning arlo pen chethe kepi alang alangso liji.’ ”

³⁹Karjong alamjirsi Jisu labangso alam pudamlo, atheke alangliphan kekroi atum an labangso a-Karjong longji, pima halabangso ahut anta Karjong pipelang. Atheke Jisu aphan pathursi adak atur pipelang.

⁴⁰Armu angbong manene atum la alangli kepu alam arjulongsi pulo, “Ahok-lo, labangso amonit ke Arnam amontri binong-lo.”

⁴¹Akaprek atum pulo, “Alangli ke Khristolo.” Bonta anut kaprek atum pulo, “Khristo ke Galili adet pen vangve!

⁴²Khristo ke David akhei angbong pensi nangklangji, lapen David kedo adim, Bethlehem arongsopisi amahang thekji pusi hastro ke pulo, kalima?”

⁴³Lasi Jisu pen apot armu atum angbong abe abe dolo.

⁴⁴Halatum angbong manene atum ke alangliphan kenepji mathalo, bonta baduta alangliphan paphohaihedet-lo.

⁴⁵Lasi Kardomhemthepi keton aron-aso atum kurusar kethe lapen Pharisi atum along nangchevoilo. Halatum la keton aron-aso atum aphan arjulo, “Nanglitum kopi apotsi alangliphan vanvedet-loma?”

⁴⁶Keton aron-aso atum thakdunsi pulo, “Labangso amonit keningje asonthot ke baduta ningjejepinlang.”

⁴⁷Pharisi atum halatum aphan pulo, “Alangli nanglitum aphanta nangpamanghu-tang loma?

⁴⁸Kangsai Ameipi amonit atum inutbak, mate Pharisi amonit inutbak alangliphan kekroi pu alam nanglitum eboibak arjulong-loma?

⁴⁹Labangso a-armu atum ke Moses Aron chinine. La apotsi alanglitumke Arnam ahirjuno photang-lo!”

⁵⁰Nikodemas pu inut Pharisi amonit dolo. Alangli aphrangta Jisu along damlo.

⁵¹Hala akaprek amonit atum aphan alangli pulo, “Ilitum aron ateng ke, inut amonit amethang nang kechethakdun nangji alam an nang kechethakdunji aphan alam arjuje ako, lapen alangli kopisi keklemdet-loma, la chini pameme akoke alangliphan ado pado longle.”

⁵²Halatum alangliphan thakdunsi pulo, “O, nanglita Galili adet amo-nitma? Hastro porhera langtha: Galili adet penke Arnam amontri inutta nangklangkle, lake nangli thek-longji.”