Read Karbi JON 8 Bible Online

JON 8 - Karbi bible

JON 8

¹Ansi halatum kadokaveta amethang methang ahem chedamlo. Bonta Jisu ke Oliv anglong alongsi damlo.

²Puthot adap Jisu Kardomhemthepi arlo damthulo. Kadokave amonit atum alangli dung vangsi alangliphan komsarlo. Ansi alangli ingnilunsi lam kethanji pangcheng-lo.

³Bonta aron thekser atum lapen Pharisi atum alangli dung inut abeisapi vansi halatum angno paparjaptherlo. Beisa kechoklem ahutsi labangpi aphan nepdunlongchek-lo.

⁴Halatum Jisu aphan pulo, “Kuru, labangso arloso beisa kechoklem phodunloksi nepchek-lo.

⁵Moses kepi Aron ateng ke lason arloso aphan ke arlong pen arbubop nangji. Tangte nangli kopi pujima?”

⁶Jisu aphan papholasi alangliphan adai kenep longji aphansi halatum labangso alam pulo. Bonta Jisu ingkupdisi ari chimun pen longle athak tok-lo.

⁷Halatum alangliphan lam karjubom apot alangli arjapthersi halatum aphan pulo, “Nanglitum angbong apap kavepin abangle labangpi aphan arlong pen paparbu paphrangnang.”

⁸Ansi alangli puthot ingkupdisi longle athak tokthulo.

⁹Halatum labangso alam arjulongsi hadak pen inut pen aphi inut damsi kadokaveta dam-et-lo. Akesar atum dam paphrangneilo. Ansi hadak kedo paduke Jisu lapen alangli ingno karjapther arloso anchot-lo.

¹⁰Jisu arjapthersi labangpi aphan pulo, “Halatum ke konat nat-lo? Halatum baduta nangliphan adai nangpadodema?”

¹¹Labangpi thakdunsi pulo, “Inutta avelo, Hemphu!” Jisu pulo, “Nelita nangliphan adai nangpadodelo. Damnon da, bonta non pen apara pap klemrinon.”

¹²Jisu Pharisi atum aphan puthulo, “Ne helo pirthe akethe-ang. Ne long nangkedunkri abang ke chethe akethe-ang longji, lapen alangli kangting angbong jonghe setta damdedetji.”

¹³Pharisi atum alangliphan pulo, “Nanglisi nangli methang ahaki chepilo. Nangli kepi ahaki ke ahok kali.”

¹⁴Jisu thakdunsi pulo, “Nelisi neli methang ahaki chepilo setta neli kethan alam ke ahok, pima neli konat pensi kevang, lapen konatsi kedamjima, lake nanglitum chinine.

¹⁵Nanglitum ke monit aron ateng pensi ingsaichot, bonta neli ke badu aphanta ingsaise.

¹⁶Nelile ingsai nangji setta neli akangsai ke chokpameji. Pima neli inutpet-le kangsaiji kali, neliphan neketoi abang, Po penpensi neli la ingsaiji.

¹⁷Banghini ahaki atum ethepet ahaki pilote halatum kepi ahaki ke ahok ahakilo pusi nanglitum aron along ketok do.

¹⁸Nelita nelimethang ahaki chepilo, lapen neliphan neketoi abang, ne-Pota neliphan haki nangchodunlo.”

¹⁹Halatum alangliphan pulo, “Nanglipo komat-lo?” Jisu thakdunsi pulo, “Nanglitum neli-phan lapen Neli Po aphanta chinine. Nanglitum neliphanle chini asonte neli-Po aphanta chiniji apot-lo.”

²⁰Kardomhemthepi arlo dan atangka kethap Asinduk kebi angdeng along lam kethan ahutsi Jisu labangso alam pulo. Lapen alangliphan baduta nepnedet-lo. Pima alangliphan kenepji ahut nanglelelang.

²¹Jisu halatum aphan puthulo, “Neli damjuiji, lapen nanglitum neliphan neriji. Bonta nanglitum nangmethang methang apap pen apot thiji. Neli kedamji adim nanglitum nangdun un-e.”

²²Lasi Jihudi atum angbong keja atum chepulo, “Alangli kedamji adim ilitum dun un-e pusi alangli pulo. Alangli amethang chepathilotji putong kepudamma?”

²³Jisu thakdunsi pulo, “Nanglitumke ladak aber amonit-lo, bonta neli ke angsong pensi kevang. Nanglitumke labangso apirthe amonit-lo, bonta neli ke kali.

²⁴Lasi neli nanglitum aphan nangpulo, nanglitum nangmethang methang apap pen apot thiji. ‘Neli helo alanglilo,’ pu nanglitum neliphan kroikrete nanglitum nangmethang methang apap pen apot thiji.”

²⁵Halatum alangliphan arjulo, “Nangli komat-lo?” Jisu thakdunsi pulo, “Neli komatma, lake neli kecheng ahut penta nanglitum aphan nangthanlo. Neli ke halabangso abang-lo.

²⁶Neli nanglitum alamjir kepujilang do-olang, lapen neli nanglitum aphan nangkangsaijilang do-olang. Tebonta neliphan neketoi abang ke ahokpet abang-lo, lapen alangli long pen karjulongtang alamsi neli pirthe aso aphan thanchot.”

²⁷Jisu halatum aphan Po alamjirsi kethanlo puke halatum chininedet-lo.

²⁸Lasi alangli halatum aphan pulo, “Nanglitum Monit a-Sopo aphan kerung ahutsi ‘Neli helo alanglilo,’ pu nanglitum neliphan chiniji. Ansi neli ke nelimethang abidi pen thangta klemkle, bonta Po neliphan nekethan alingsi neli ke ningjechot pu nanglitum chiniji.

²⁹Lapen neliphan neketoi abang neli long dover, pima neli ke alangli ning kehang alingsi klemver.”

³⁰Jisu lahei hei keningje karju-dunlong ake-ongpi atum alangliphan kroilo.

³¹Lasi alangliphan kekroi atum aphan Jisu pulo, “Nanglitum jongsi neli kethan alam kroibom tangte nanglitum ke neli sangho binong atumlo.

³²Nanglitum ahok aphan chiniji, lapen ahok nanglitum aphan pajok-phlotji.”

³³Halatum thakdunsi pulo, “Nelitumke Abraham asumarlo, lapen nelitum ke badu amonit aban plangple-pinlang. Tangte, ‘Nanglitum jokphlotji,’ pu nangli nelitum aphan kopisi kepudamma?”

³⁴Jisu halatum aphan pulo, “Neli nanglitum aphan ahokpetsi nangpulang, pap keklembom abang ke pap abanlo.

³⁵Ban ke ahemphu ahem amonit plangverve, bonta asopo ke apo ahem amonit plangver.

³⁶Sopole nanglitum aphan nangpajokphlot lote nanglitum jokphlot binongji.

³⁷Nanglitumke Abraham asumarlo puke neli chini. Bonta nanglitum neliphan kepathiji abidi ribomlo, pima neli kethan alam nanglitum kroikre.

³⁸Ne-Po nephan nekepaklangtang alamjirsi neli thanlo, bonta nanglitum ke nanglitum apo nangkethan atengsi klemlo.”

³⁹Halatum thakdunsi pulo, “Nelitum apo ke Abraham helo.” Jisu pulo, “Nanglitumle Abraham asomar binong-lo asonte nanglitum alangli keklem asonthotsi klemji apot-lo.

⁴⁰Ne Arnam along pen ahok alam karjulongtang ason an nangkethanjisi la kadokave klemlo, bonta nanglitum ke neliphan kepathijisi abidi ribomlo. Abraham ke lason ke thangta klemkle.

⁴¹Nanglitumke nanglitum apo keklem asonthotsi klembomlo.” Halatum thakdunsi pulo, “Nelitumke sorongro aso kali. Nelitum apo ke inutnat. Lake Arnam helo.”

⁴²Jisu halatum aphan pulo, “Arnamle nanglitum a-Po binong-lo asonte nanglitum neliphan ne inghonji apot-lo, pima neli ke Arnam along pensi vang-lo, lapen nonke neli daksi dolo. Neli ke neli methang aning kehang penle kevang kali, alanglisi neliphan netoilo.

⁴³Nanglitum kopi apotsi neli keningje alam chininedetma? Atheke la helo, neli kepu alam nanglitum arjuthekthe.

⁴⁴Nanglitumke nanglitum apo, Hi-i Sarpo asomarlo, lapen nanglitum apo aning kehang akam keklemjisi nanglitum ning hang-lo, kechengsi ahut penta alangli ke pran ke-en abang-lo, lapen ahok penke alangli thangta klemkle, pima alangli ning arlo ahok ave. Alangli kechobei alam keningje ke amethang a-ot binong pensi keningjelo, pima alangli ke kechobei abang-lo. Lapen alangli ke kechobei an apolo.

⁴⁵Bonta neli ke ahok alamsi thanlo. Lasi nanglitum neliphan kroikrelo.

⁴⁶Nanglitum komatsi neli do paklangthekma? Neli ke ahok alamsi nangkethanle nang-litum kopisi nekroikredetma?

⁴⁷Arnam pen kevang abang ke Arnam alam hei hei arju. Nanglitumke Arnam along penle kevang kalidet apotsi Arnam alam arjuje.”

⁴⁸Jihudi atum Jisu aphan thakdunsi pulo, “Nanglike Samaria asor lapen hi-i kepho abang-lo pu nangkepu ke chokpamelo, kalima?”

⁴⁹Jisu thakdunsi pulo, “Neli ke hi-ile kepho kali. Neli ke ne-Po anong pathebomlo, bonta nanglitum ke neli nong jobomlo.

⁵⁰Neli ke nelimethang anong rire. Bonta neli nong the nangji pu aning kehang abang do. Kangsai abang alangli helo.

⁵¹Neli ahokpetsi nangpulang, neli kethan alam karju abang ke kaita thithepinji.”

⁵²Halatum alangliphan pulo, “Nangli hi-i pholok-lo pu nonke nelitum chinipamelo. Abraham lapen Arnam amontri atumta thilo. Bonta nangli kethan alam kekroi abang ke kaita thithedetji pusi nangli pulo.

⁵³Nelitum apo Abrahamta thi-lo. Abraham mute nangli themu, lapu kali, kalima? Arnam amontri atumta thikoilo. Nanglike komat pusi kechemathama?”

⁵⁴Jisu thakdunsi pulo, “Nelisi neli methang anong chepathelo asonte labangso anong ke thang kalidetji apot-lo. Neli Posi neli nong pathelo. Alang ke nanglitum a-Arnamlo pusi nanglitum chepulo.

⁵⁵Nanglitumke alangliphan chinine, bonta neli ke chini. Nelile alangliphan chininedet asonte nelita nanglitum asonthak thaksi kechobei abangchotji apot-lo. Bonta neli ke alangliphan chini lapen alangli lam kroi.

⁵⁶Neli kevangji arni thek-longji pu chinisi nanglitum apo, Abraham ke aning arongpik-lo. Alangli la non thek-long-lo, lapen lasi alangli chehokpik-lo.”

⁵⁷Halatum alangliphan pulo, “Nangli arta ningke ningkan phokep anta kavedetlangle kopusi Abraham aphan thek-long-lo pu nangli kepu-thekma?”

⁵⁸Jisu thakdunsi pulo, “Neli nang-litum aphan ahokpetsi nangpulang, Abraham amahang thekthe ako penta neli ke dolo.”

⁵⁹Ansi halatum alangliphan karbujisi arlong rungrep-lo. Bonta Jisu chepatulo, lapen Kardomhemthepi pen damjuilo.