Read Karbi JON 9 Bible Online

JON 9 - Karbi bible

JON 9

¹Jisu tovar kedam ahut amahang kethek pen amek kave amonit inut aphan thek-long-lo.

²Asangho atum alangliphan arjulo, “Labangso amonit amahang kethek penta amek kavedet ke komat apap apot-loma? Amethang apap apotma, mate api-apo atum apap apotma?”

³Jisu thakdunsi pulo, “Amethang apap apot, mate api-apo atum apap apot-le labangso amonit amek kavedet kali. Labangso amonit amek kavedet ke Arnam keklembom ajakong labangso amonit along keklang thekji aphanlo.

⁴Neli arni dotik an neliphan neketoi abang akam klempi nangji. Non ajo nangleji dokdok-lo, anke baduta kam klemthekthelo.

⁵Ne pirthe athak dotik ke neke pirthe akethe-ang-lo.”

⁶Labangso alam pudet aphi Jisu longle athak ingthe ingthoksi kangthok angthe pen inghan selamlo, lapen labangso anghan pen alangli hala-bangso amonit amek along hilo,

⁷lapen pulo, “Damra Siloam pu alangbi along mahang chingmurdamnon.” (La Siloam pu alam atheke “Ketoitang” pu helo.) Lasi labangso amonit hadak damsi mahang chingmurdamlo. Ansi alangli amek checharsi ahem chedamlo.

⁸Ansi tebok terei amonit atum lapen alangli monit atum along pen kechohang kechorek kethekdunlong atum puhurlo, “Labangso amonit ke hala kechohang kechorek abang-lo, kalima?”

⁹Manene atum pulo, “Kalang-lo, alangli helo.” Bonta akaprek atum pulo, “Kali, labangso amonit ke halabangso amonit pen kechinglitchot.” Lasi halabangso amonit chepudunlo, “Kalang-lo, halabangso amonit ke neli helo.”

¹⁰Halatum alangliphan arjulo, “Tangte nonke kopusi nangmek keche-charlo?”

¹¹Alangli thakdunsi pulo, “Jisu pu inut amonit inghan selamsi nelimek along nanghilo, lapen Siloam pu alangbi along damra mahang ching-murdamnon pusi neliphan nepulo. Lasi neli damlo, lapen lang kechingmur pen mamat neli mek checharlo.”

¹²Halatum alangliphan arjulo, “Alangli ke komat-lo?” Alangli thakdunsi pulo, “Neli chinine.”

¹³Ansi halatum hala aphrangke amek kavedet abang aphan Pharisi atum adung vanlo.

¹⁴Jisu inghan keselam lapen amek kave abang aphan amek kepachechar arni ke Sabbath Arnilo.

¹⁵Ansi hala amek kave abang kopusi amek kechecharloma pusi Pharisi atum alangliphan arjulo. Alangli halatum aphan pulo, “Alangli nelimek along inghan nanghilo, labangso aphi neli mahang chingmurdamlo, lapen nonke neli mek checharlo.”

¹⁶Lasi manene a-Pharisi atum pulo, “Labangso amonit ke Arnam penle kevang kali, pima alangli Sabbath Arni kroikrelo.” Bonta akaprek atum pulo, “Inut papi amonit-le kopusi lason akemanghumeme akam keklem unloma?” Ansi halatum angbong kepu prekjamlo.

¹⁷Lasi Pharisi atum hala aphrangke amek kave abang aphan arjulo, “Nangli pulo, alanglisi nanglimek nang-pachecharlo. Tangte nangli alangli lamjir pisi puji?” Alangli thakdunsi pulo, “Alangli ke Arnam amontrilo.”

¹⁸Tebonta api apo aphan hangdam-detik ke, labangso amonit aphrangke amek ave, bonta nonke checharlo puke Pharisi atum angbong keja atum kroi ingtungtedet-lo.

¹⁹Ansi halatum api apo aphan arjulo, “Labangso amonit ke nanglitum asopoma? Labangso amonit amahang kethek penta amek ave pusi nanglitum pulo. Tangte nonke alangli kopusi amek kechecharloma?”

²⁰Ansi api apo atum thakdunsi pulo, “Labangso amonit ke nelitum asopolo. Alangli ke amahang kethek penta amek avelo, lake nelitum chinipamelo.

²¹Bonta nonke alangli kopusi amek kechecharlone, lake nelitum chinine. Lapen komatsi alangliphan amek kepachecharlone, lata nelitum chinine. La alangliphanle arjunon. Alanglita arta dolo. Amethang chethan thek-lo.”

²²Halabangso amonit api apo atum Jihudi atum angbong keja atum aphan phereduk apotsi lason alam pulo. Pima Khristo ke Jisu helo pu kekroi abang aling aphan sinagog pen amen than nangji pusi halatum cheparailo.

²³Lasi alangli arta dolo, alangliphanle arjunon pu halatum pulo.

²⁴Halatum hala amahang kethek penta amek kave abang aphan batai hini aphong hangthusi pulo, “Nangli ahok alamsi thanji pura Arnam amen pen seme tangtha. Nangliphan mek nang-kepachechar abang ke inut apapilo, lake nelitum chini.”

²⁵Alangli thakdunsi pulo, “Alangli ke inut apapi lone, mate kali lone, lake neli chinine. Bonta neli eson alam chinilo. Aphrangke nelimek checharchelo, bonta nonke checharlo.”

²⁶Halatum arjuthulo, “Alangli nangliphan kopisi klemloma? Alangli kopusi nanglimek nang-kepachechar loma?”

²⁷Alangli thakdunsi pulo, “Mo ta neli nanglitum aphan nangthanlo, bonta nanglitum arjujedet-lo. Nanglitum la kopisi karjuthuji ning kehanglangma? Nanglitumta alangli sangho keplangji tongke nangli ning kehangma?”

²⁸Halatum alangliphan pusitsi pulo, “Nanglisi halabangso abang asangholo, bonta nelitum ke Moses asangho.

²⁹Arnam Moses aphan pulo, lake nelitum chini, bonta labangso amonit konat pensi kevangma, lake nelitum chinine.”

³⁰Halabangso amonit thakdunsi pulo, “Mai! Lake kemanghumeme alam! Alangli konat pensi kevangma, lake nanglitum chinine setta alangli ke nelimek nepachecharlo.

³¹Arnam ke papi atum alam arjuje pu ilitum chini, bonta Arnam aphan kangduk lapen Arnam aning kehang ateng keklem atum alam ke Arnam arju.

³²Mahang kethek pen amek kave abang aphan amek kepachechar alam ke pirthe kangduk penta baduta arjulongle-pinlang.

³³Labangso amonit Arnam penle kevang kali asonte thangta klem thekthedetji apot-lo.”

³⁴Halatum thakdunsi pulo, “Nanglike nangmahang kethek penta papile kopusi nelitum aphan nekethanma?” Ansi halatum alangliphan phlungphit-lo.

³⁵Halabangso amonit aphan phlungtang-lo pu alam arjulongsi Jisu labangso amonit aphan ridamlo, lapen alangliphan longdamsi pulo, “Nangli Monit a-Sopo aphan kroima?”

³⁶Halabangso amonit thakdunsi pulo, “Neli alangliphan kekroithekji aphan alangli komatma, la neliphan nethantha, akehai!”

³⁷Jisu thakdunsi pulo, “Nangli alangliphan thek-longtang-lo. Alangli ke non nangli pen kechingkibom abang helo.”

³⁸Alangli pulo, “Neli kroilo Hemphu!” Ansi alangli Jisu aphan ardomkhrup-lo.

³⁹Jisu pulo, “Neke kangsaijisi pirthe athak kevang. Lasi amek kave atum checharji, lapen amek kedo atum checharchedetji.”

⁴⁰La hei hei alangli kepu alam hadak alangli long kedo manene a-Pharisi atum arjulongsi alangliphan pulo, “Tangte nelitumta amek kave atumloma?”

⁴¹Jisu thakdunsi pulo, “Nanglitum amek avedet asonte nanglitum ado avedetji apot-lo. Bonta nanglitum amek do pusi nanglitum chepulo. Lasi nanglitum ado do.”