Read Karbi AKAM 10 Bible Online

AKAM 10 - Karbi bible

AKAM 10

¹Sijeria arongsopi along Kornelias pu inut amonit dolo. Alangli ke, “Itali a-Ron-aso” pu kepu Roman aron-aso bang pharo ahemphulo.

²Alangli inut dhoromi amonit-lo, lapen alangli lapen alangli hem ehum amonitta Arnam aphan kephere atumlo. Alangli keduk-keboi atum aphan dan pi olo, lapen kaiketa Arnam ardomverlo.

³Arnisi arni kangsam baji kethom apor ahut alangli ning arjan thek-long-lo: Arnam apherangke inut vangsi alangphan pulo, “Kornelias!”

⁴Alangli kephere pen pherangke aphan langdingsi pulo “Kopima, Hemphu?” Arnam apherangke alangliphan thakdunsi pulo, “Nangli kardom an lapen nangli kepi adan an Arnam aningdok-lo, lapen alangli lahei hei alam mathalo.

⁵Nonke nang Joppa arongsopi along monit toira Pitor pu a-Simon aphan pavannon.

⁶Alangli ha talo akung kedo, Simon pu inut ok-reng akam keklem abang ahemsi alohi dodamlo.”

⁷Halabangso aphi pherangke damjuilo, lapen Kornelias amethang aban banghini, lapen alangli-tor kedo atum angbong pen inut dhoromi aron-aso aphan hang-lo.

⁸Alangli halatum aphan la keplangtang alam an thanpetsi Joppa arongsopi toilo.

⁹Puthot arni, halatum dambom dambomsi Joppa arongsopi leji dok dok ahut, nerlo chitim anbak apor ahut Pitorke kardomdamjisi hem asarnung athak arludamlo.

¹⁰Alangli an ingchirsi an kechoji aning hang-lo; lapen an ketun un ahut alangli mek rengjengsi ning arjan thek-long-lo:

¹¹Alangli sining kangpudang lapen pe akethepi ano phli pen longle athak nangkepahir, lason kopine ahormu nangkesun thek-long-lo.

¹²Labangso arlo akeng hongphli api an, longle athak keklim api ajat do-an, lapen angsong kangjar avo ajat do-an ta dolo.

¹³Ansi isi ase vangsi alangliphan pulo, “Thurnon, Pitor! pathira chonon!”

¹⁴Bonta Pitor thakdunsi pulo, “Jonghe setta lapu kali, Hemphu! Pima chokertang ahormu, kalite kangthirthe ahormu ke ne chochepinlang.”

¹⁵Ako batai hini aphong halabangso ase alangliphan pulo, “Arnam kepangthirtang amar aphan ingthirthe puri.”

¹⁶Lason batai kethom plang-lo, lapen hala mamat halabangso ahormu sining athak chirungpon-thudet-lo.

¹⁷Labangso aning arjan alam athe kopima pusi Pitor kematha un ahut Kornelias nangketoi amonit atum, arju arjusi Simon kedo ahem anghap angno an nanglelo.

¹⁸Halatum monit hangsi arjulo, “Simon Pitor pu inut alohi ladaksi do maho?”

¹⁹Pitor hala ning arjan alam athe kechiniji aphan kebor-i un ahut Karjong alangliphan pulo, “Langnon! Bang kethom amonit atum nangphan risi vang-lo.

²⁰Nang thurra, hirnon, lapen nang halatum along dunmori. Pima nesi halatum aphan nangtoilo.”

²¹Lasi Pitor nanghirlo, lapen halabangso amonit atum aphan pulo, “Nanglitum keri amonit neli helo. Nanglitum ladak kevang athe kopima?”

²²Halatum thakdunsi pulo, “Kornelias pu inut chedanbang bang pharo ahemphusi netum aphan ladak netoilo. Alangli inut dhoromipet lapen Arnam aphan kephere amonit-lo. Jihudi amonit atum an alangliphan aman pi olo. Nangli kepu nangji alam an alangli karjulongjisi, nangliphan amethang ahem along kephaji aphan pherangke kangthir hukum pilo.”

²³Pitor halatum aphan hem arlo hangponlo, lapen halabangso aningve halatum aphan hadaksi padokok-lo. Puthot arni Pitor halatum along dunlo, lapen Joppa arongsopi along kedo kekroitang manene atumta alangli long dunlo.

²⁴Puthot arnithu alangli Sijeria arongsopi lelo. Hadak Kornelias amethang adon arap amonit atum, lapen alangli kepha tang, kechinghon ajirpo atum pen pen chingrumsi alangliphan inghong-phrong-lo.

²⁵Pitor hem arlo kelut ahut Kornelias alangli pen chetongsi alangli Pitor akeng-ri dombaksi alangliphan ardomkhrup-lo.

²⁶Bonta Pitor alangliphan parjapsi pulo, “Arjapnon, nelita monitchot-lo.”

²⁷Ansi alangli pen lam chethanponbomsi Pitor hem arlo lutdamlo. Hadak alangli monit kechingrum dopik thek-long-lo.

²⁸Alangli halatum aphan pulo, “Jihudi amonit atum ke Jihudi kalidet atum pen dorap rap longle, lapen halatum ahem lut dun kertang pu alam nanglitum chinipamelo. Bonta badu amonit aphan setta kopine akertang do pu, kalite, ingthirthe pu punangne pusi Arnam neliphan paklang-lo.

²⁹Lasi neliphan nepahang ahut neli thangta kroimomedetsi ladak vang-lo. Tangte neli nanglitum aphan arjulang, nanglitum kopi athesi neliphan nephaloma?”

³⁰Kornelias pulo, “Nithom aphrang, non labangso-asonthot apor ahut, atheke arni kangsam baji kethom apor ahut, neli neli hem arlo Arnam kardom un ahut inut klarbong ape kechepingdeng amonit, men men neli ingno arjapthersi,

³¹neliphan pulo, ‘Kornelias! Arnam nang kardom alam arjutang-lo, lapen nang keduk-keboi atum aphan dan kepi alam an Arnam chinilo.

³²Joppa arongsopi along monit toira Pitor pu Simon aphan pahangdamnon. Talo akung kedo Simon pu inut ok-reng akam keklem amonit ahemsi alangli alohi dodamlo.’

³³Hala mamat neli nangli long monit nangtoilo. Lapen nangli ingjinso si vangtang-lo. Arnam nangliphan kepaputoi alam an nelitum karjulongjisi ladak Arnam angno chingrumsi nelitum inghongphrong-lo.”

³⁴Ansi Pitor kepuji pangcheng-lo. “Non neli chinilo, Arnam ke abangphutin aphanta kelang pachingbarpet-lo.

³⁵Ajat akhei setta me, Arnam aphan kangduk, lapen dhoromi akam keklem atum an aphan ke Arnam deng-lo.

³⁶Arnam Israel amonit atum aphan kepi alam, kadokave a-Hemphu, Jisu Khristo pen ajok ningkangsam Abirta Keme kepachethang alam nanglitum chinilo.

³⁷Jon baptisom alamjir than-pachethang-det aphi Galili adet pen pangchengsi Judia adet bithe bitha adim keplangtang alam nanglitum chinihurlo.

³⁸Najareth a-Jisu alamjir, lapen Arnam alangli phuthak Karjong Kangthir lapen jakong kepi alam nanglitum chinilo. Jisu kadokave adim damsi keme akam klem lo, lapen soitan kechenek atum aphan pamebom lo, pima Arnam alangli long dolo.

³⁹Neli ke Judia adet lapen Jerusalem arongsopi along Jisu keklem akam an ahakilo. Halatum alangliphan thengparpan athak saksi pathilot-lo.

⁴⁰Bonta nithom aphi Arnam alangliphan kethi pen pathurlo, lapen monit atum angno pacheklang-lo.

⁴¹Alangli kadokave atum aphan cheklang-lo, lapu kali, bonta Arnam aphrang pen kangvaitang ahaki atum, atheke alangli kethi pen thurdet aphi, alangli pen kecho rap rap, kejun rap rap, la nelitum aphansi cheklangchot-lo.

⁴²Monit atum aphan birta keme kepachethangji aphan, lapen kerenglang lapen kethitang amonit atum aphan kangsaiji aphan Arnam Jisu aphansi kangsai abang bat-lo pu alam haki kepiji aphansi Arnam nelitum aphan hukum pilo.

⁴³Arnam amontri atum an alangli lamjirsi pulo, atheke alangliphan kekroi atum an alangli men ajakong pen ajok apap hei hei diya longji pusi halatum pulo.”

⁴⁴Pitor lam keningje un ahut karjudun atum an aphuthak Karjong Kangthir hirlo.

⁴⁵Arnam Jihudi kalidet atum aphuthakta Karjong Kangthir adan dung-lo, la thek-longsi Joppa pen Pitor along nangkedun kekroitang Jihudi atum manghuhurlo.

⁴⁶Pima halatum ajat kaprek kaprek alam pen kepu lapen Arnam anong kepathe halatum arjulong-lo.

⁴⁷Ansi Pitor pulo, “Netum asonthak thaksi labangso amonit atumta Karjong Kangthir longtang-lo. Tangte latum baptisom ke-en longledetji athe kopima?”

⁴⁸Lasi halatum Jisu Khristo amen pen baptisom ke-enji aphan alangli hukum pilo. Ansi latum halatum along penang arni kedoji aphan halatum latum aphan choningrilo.