Read Karbi AKAM 11 Bible Online

AKAM 11 - Karbi bible

AKAM 11

¹Jihudi kalidet atumta Arnam alam dengtang-lo pu alam ketoitang atum lapen Judia adet adang kedo kekroitang atum arjulong-lo.

²Pitor Jerusalem arongsopi kedam ahut, Jihudi kalidet atumta reng-rot ennangji pu kepu atum alangliphan sorsarsi pulo,

³“Nangli kopi apot si hala reng-rot ke-en-e, Jihudi kalidet ahem alohi do damlo, lapen halatum pen chorap rap-lo!”

⁴Lasi Pitor kecheng pen keplangtang alam an halatum aphan than pamesi pulo:

⁵“Neli Joppa arongsopi along Arnam kardom un ahut neli mek rengjengsi ning arjan thek-long-lo. Sining pen pe akethepi ano phli pen nangkepahir ason kopine ahormu nang kesun neli thek-long-lo, lapen la nelidung bikok-lo.

⁶Neli la lang pamesi thek-long-lo, labangso arlo pirthe athak kedo akeng hongphli api, nampi api, keklim api, lapen angsong kangjar avo hei hei dolo.

⁷Ansi neliphan kepu ase neli arjulong-lo, ‘Thurnon, Pitor, nang la pathira chonon!’

⁸Bonta neli pulo, ‘Jonghe setta lapu kali, Hemphu! Chokertang, kalite kangthirthe ahormu ne ingho lut-lepinlang.’

⁹Bonta sining pen ase neliphan puthot batai hini aphong pulo, ‘Arnam kepangthirtang ahormu ingthirthe puri.’

¹⁰Lason batai kethom plang-lo. Aphisi ke la kadokave ahormu sining angsong chirungponthudet-lo.

¹¹Halabangso ahut mamat bang kethom amonit neli kedo ahem along nanglelo. Halatum aphan Sijeria pensi neli long nangtoilo.

¹²Ansi nang dunmomepin pen halatum along dunnon pusi Karjong neliphan pulo. Joppa pen la bang throk atumta neli long Sijeria nangdunlo, lapen nelitum kadokave Kornelias ahem damlo.

¹³Alangli nelitum aphan thanlo: Sining apherangke inut alangli hem along arjapthersi alangliphan pulo, ‘Komane aphan Joppa arongsopi toira Pitor pu a-Simon aphan pavannon.

¹⁴Alangli nangliphan lam thanji, lapen labangso alam pen ajok nangli lapen nangli hem asor atum an jokpetji.’

¹⁵Lapen neli lam kethan kepangcheng ahut, halatum aphuthak Karjong Kangthir hirlo, lapen lake kechengsi ahut nelitum aphuthak Karjong Kangthir nangkehir asonthot-lo.

¹⁶Ansi neli Hemphu kepu alam chematha damlo, atheke alangli pulo, ‘Jon ke lang pensi baptisom pilo, bonta nangtum aphan ke Karjong Kangthir pensi baptisom pipo.

¹⁷Lasi etum Hemphu Jisu Khristo aphan kekroicheng ahut Arnam ekepi adan asonthot adan hala Jihudi kalidet atum aphanta pitang-lo, lake klangdak-lo. Arnam aphan kekhangji, neli komatma!”

¹⁸Halatum labangso alam arjulongsi hala pen apar alangliphan sorsarse-det-lo, lapen Arnam aphan anong pathesi puhurlo: “Tangte Jihudi kalidet atumta aning chiruisi kejut-un-e achethe kelongji aphan Arnam halatum aphanta ahut keme pitang-lo!”

¹⁹Stephan aphan kepathi ahut, kekroitang atum aphan kechenek pen ajok kekroitang penang atum ke pratseisi Phonisia adet, Saipras alanglompi lapen Antiok arongsopi anta damsi than-pachethang-lo; bonta Jihudi atum aphan apar ke halatum badu aphanta birta keme thanthedet-lo.

²⁰Tebonta akaprek atum, atheke Saipras alanglom along lapen Sairen adet kedo kekroitang atum Antiok arongsopi damsi Jihudi kalidet atum aphanta thansi Hemphu Jisu alamjir a-Birta Keme thanlo.

²¹Hemphu halatum aphan rapdunlo lapen ake-ongpi amonit atum kroisi Hemphu anat chetevarlo.

²²Jerusalem arongsopi amondoli mate kroi-asongta labangso abirta arjulong-lo. Lasi halatum Barnabas aphan Antiok arongsopi toilo.

²³Alangli hadak nanglelo, lapen Arnam halatum aphan kepi akangjinso thek-longsi aning arong-lo; lapen ning aklong pen Hemphu aphan kekroi thirklong non pusi alangli halatum aphan choningrilo.

²⁴Barnabas ke inut mesen, Karjong Kangthir pen keplengset lapen kekroi thirklong abang-lo, lapen ake-ongpi amonit atum Hemphu aphan kroilo.

²⁵Ansi Sol aphan keridunjisi Barnabas Tarsas arongsopi damjuilo.

²⁶Alangli Sol aphan longsi alangliphan Antiok vandet-lo, lapen alanglitum banghini ningkan kangthim hadak amondoli mate kroi-asong amonit atum pen chingrumbomsi ake-ongpi amonit atum aphan thanlo. Ladak Antiok helo kekroitang atum aphan Khristian pu kepu paphrangcheng adimlo.

²⁷Halabangso ahut Jerusalem pen Arnam amontri penang atum Antiok vang-lo.

²⁸Halatum angbong pen Agabas pu inut abang thursi Karjong ajakong pen ajok mo aphi keplangji alam paklangsi pulo, “Pirthe adang akhim thurji.” (Anke Klodias recho ahut si labangso alam chekok-lo.)

²⁹Ansi Judia adet kedo kekroitang atum aphan kerapjisi sangho atum abangphutinta un an dan kelojisi pathik-lo.

³⁰Halatum lapusonsi klemlo, lapen labangso atangka Barnabas lapen Sol arideng pisi mondoli akesar atum aphan lolo.