Read Karbi AKAM 12 Bible Online

AKAM 12 - Karbi bible

AKAM 12

¹Halabangso ahut Herod recho mondoli amonit manene atum aphan kechenekji pangcheng-lo.

²Alangli Jon akorte, Jems aphan nokjir pen pathilot-lo.

³Jihudi atum labangso akam aning dok-lo, la thek-longsi alangli Pitor aphanta nep-lo. (Halabangso ahut ke thap kave ahim Achojun a-Meipi ahut-lo)

⁴Pitor aphan nepsi phatek beng-lo. Hadak alang-liphan chedanbang bang krethrok atum arideng hodaisi alangliphan patonlo. Halatum bangphli bangphli chelarsi honverlo.

⁵Kejok achojun a-Meipi aphisi Pitor aphan rat atum angno kangsaiji aphan Herod mathalo. Lasi Pitor aphan phatek arlo bilo, bonta mondoli amonit atum alangliphan jasemet Arnam ardom pilo.

⁶Herod Pitor aphan rat angbong keponji aphan kepathik a-arni aphrang ajo Pitorke chedanbang banghini adaksi amek jang-lo. Alangliphan ingchin ari rini pen kok-het-lo, lapen phatek anghap along chedanbang atum tonding-lo.

⁷Ansi hadak men men Hemphu apherangke vangsi arjaptherlo, lapen phatek angdeng kethe-ang turdang-lo. Alangli Pitor aphangkor along otsi alangliphan hijuk-lo, lapen alangliphan ingthursi pulo, “Thurseraknon.” Halamamat ingchin ari alangli ri pen kloruilo.

⁸Ansi Hemphu apherangke alangliphan pulo, “Nang vam chekoknon, lapen nang keng-opta chethonnon!” Pitor lason si klemlo, lapen pherangke alangliphan pulo, “Nang choi chingchoira ne phi phi nangdunnon.”

⁹Pitor phatek pen nangbarsi pherangke aphi phi dunlo, bonta pherangke keklem akam ahok puke alangli chininedet-lo; pima alangli ning arjansi thek-long-lo pusi mathalo.

¹⁰Halatum vangsi aphrang keton aron-aso aphan lit-lo lapen adun keton aron-aso aphanta lit-lo, lapen aphisi ke rongsopi anat kedam ingchin anghap along nanglelo. Inghap amethangsi chingpudang-lo, lapen halatum ingtan nangbarlo. Halatum tovar penangbak kedam aphi pherangke alangliphan men men otekangbup-lo.

¹¹Ansi Pitor amethang aphan keplangtang alam chemathasi pulo, “Lake ahok-lo pu nonke ne chinipame lo. Herod arideng pen lapen Jihudi atum keklemjisi kechesik an pen neli-phan kepajokjisi Hemphu amethang apherangke nangtoilo.”

¹²Halabangso alam chinipamesi alangli Mark pu a-Jon apei, Meri ahem damjuilo. Hadak penang amonit atum chingrumsi Arnam ardombomlo.

¹³Pitor ingtan anat kedo anghap pacheng-lo, lapen Rodha pu inut abanpi la kechinijisi vang-lo.

¹⁴Alangli Pitor ase chinisi aning arong parpik-lo. Lasi alangli inghap ingpupedetsi hem arlo katvirsi halatum along damthujuilo, lapen Pitor inghap angtan alongsi do pu halatum aphan thanlo.

¹⁵Halatum alangliphan pulo, “Nanglike kepangchamlo!” Bonta lake ahok-lo pusi labangpi pubomlo. Lasi halatum pulo, “Lake alangliphan kerai apherangkelo.”

¹⁶Halabangso ahut Pitorta inghap pachengbomlo. Aphisi halatum inghap ingpulo, lapen alangliphan thek-longsi halatum manghuphrong-lo.

¹⁷Ansi halatum kedoklipji aphan alangli ari pen asin paklang-lo, lapen Hemphu kopusonsi alangliphan phatek arlo pen ingtan vanloma, labangso alam alangli halatum aphan than parjirmilo. Alangli halatum aphan pulo, “Jems lapen kekroitang atum an aphan labangso alam thandamnon.” Ansi alangli ingtan barsi akaprek adim damjuilo.

¹⁸Adap kethe-ang pen mamat Pitor kopi cheplangdet-loma pusi chedanbang atum huriseilo.

¹⁹Herod Pitor aphan kepariji ahukum pilo, bonta halatum alangliphan longthekthedet-lo. Lasi alangli hala keton aron-aso atum aphan alam hutsi halatum aphan kepathiji ahukum pilo. Labangso aphi Herod Judia adet otekangsi Sijeria arongsopi penang arni an dodamlo.

²⁰Herod Tair lapen Sidon arongsopi amonit atum aphan jasemet aning thilo. Lasi halatum aning isipet pen alangli ingno damlo. Aphrangsi halatum Blastas pu inut recho asirkut ahemphu aphan abe cheponsi halatum aphan keparapji aphan choningrilo. Ansi halatum Herod adung damsi alangli halatum pen kejelangthuji aphan choningrilo, pima halatum adet kecho-kejun ahormu labangso arecho adet pensi longverlo.

²¹Kepathiktang arni, Herod recho achoi chingchoisi recho anghoi athak chingnilo, lapen monit atum aphan lam thanlo.

²²Lapen rat atum alangliphan rosi pulo, “Lake arnam aselo, monit ase kali.”

²³Hala mamat Hemphu apherangke Herod aphan theng-lo, pima alangli Arnam aphan aman pipedet-lo. Ansi ingthan atum alangliphan chobomsi alangli thilot-lo.

²⁴Bonta Arnam alam chethangbomsi chanponbomlo.

²⁵Barnabas lapen Sol kam keklem patangdetsi Jerusalem pen nang-chevoilo. Alanglitum Mark pu a-Jon aphanta chevanlo.