Read Karbi AKAM 13 Bible Online

AKAM 13 - Karbi bible

AKAM 13

¹Antiok amondoli mate kroi-asong along Arnam amontri lapen kuru penang atum dolo, atheke Barnabas, Simeon (abang ke-ik pu abang), Sairen adet a-Lusias, bihek pen Herod recho pen kethe-keding rap rap abang Manaen, lapen Sol hadak dolo.

²Alanglitum Hemphu aphan kangduk kardom lapen an kehum un ahut Karjong Kangthir halatum aphan pulo, “Ne kam kepaklemji aphansi Barnabas lapen Sol aphan phatang-lo. Halabangso akam kepaklemjile nangtum Barnabas lapen Sol aphan papreknon.”

³Lasi halatum an humsi Arnam ardomlo, lapen alanglitum aphuthak ari batsi toilo.

⁴Karjong Kangthir Sol lapen Barnabas aphan toisi, latum bang hini Seleusia arongsopi damlo, lapen hadak pen latum telongpi pensi Saipras alanglompi damlo.

⁵Ansi halatum Salamais arongsopi lesi sinagog along Arnam alam than-pachethang-lo. Mark pu a-Jon alanglitum aphan kam rapdunlo.

⁶Alanglitum halabangso alanglom soding damsi Paphos arongsopi nanglelo. Hadak alanglitum Bar-Jisu pu inut maja kanghoithek a-Jihudi amonit pen chetong-lo. Alangli ke inut kechobei amontrilo.

⁷Labangso amonit ke halabangso alanglom a-Govornor, Sergias Paulas alongsi dolo. Sergias ke inut abidi dopik amonit-lo, lapen Sol aphan phalo, pima alangli Arnam alam karjuji aning hang-lo.

⁸Bonta hala Elimas (lake Grik alam pen alangliphan kehang amenlo) pu inut maja kanghoithek abang alanglitum aphan khang-lo, lapen halabangso alanglom a-Govornor aphan kekroi anat pen kepasuijuiji aphan bor-ilo.

⁹Tebonta Sol (alangliphan Pol puta pu) Karjong Kangthir pen plengsetsi alangliphan langdingsi pulo,

¹⁰“Soitan aso! Nang ke kam keme an ahoturlo. Nang ke kepacherei alam lapen kehingnodak akam pen plengset-lo. La Hemphu ahok alam aphanta chobei alam pu kepaklangjisi nangke kaiketa bor-ilo.

¹¹Mathanon, non Hemphu ari nang phuthaksi dolo; nang penang arni ahut anta nang mek checharchedetsi arni akethe-ang thek-longledetpo.” Hala mamat men men kangtingkuk anghun alangli mek kebinkuk alangli chethek-long-lo, lapen alangli ri ke-ot-ra keriponji aphan alangli monit risi artingrok-lo.

¹²Halabangso alanglom a-Govornor la keplangtang alam thek-longsi kroilo; pima Hemphu alamjir kethan alam alangli arjulongsi manghuhak-lo.

¹³Pol lapen ari asangho atum telongpi chethapsi Paphos pen ha Pamphilia adet, Perga arongsopi damlo. Hadak Mark pu a-Jon alanglitum aphan otekangsi Jerusalem chevoilo.

¹⁴Halatum Perga arongsopi pen damthusi Pisidia adet Antiok arong-sopi nanglelo. Hadak Sabbath Arni Sinagog arlo dunsi ingnidunlo.

¹⁵Moses aron lapen Arnam amontri atum ketok alam porhedet aphi Sinagog kechepahemphu atum alanglitum aphan phasi pulo, “Kortemarli atum, nanglitum jongsi rat atum aphan ning kepatheji alam do tangte, punon.”

¹⁶Pol thursi ari pen asin paklang si pulo, “Israel akorte marli atum, lapen Arnam aphan kangduk, Jihudi kalidet atum; nanglitum arjutha!

¹⁷Israel atum a-Arnamsi ephusar atum aphan ingvailo, lapen Israel atum Ijip adet kedo un ahut Arnam halatum aphan isi thedung akhei paplang-lo, lapen Arnam methang ajakong pensi halatum aphan halabangso adet pen vanlo.

¹⁸Lapen kejejangtang ajo alangli halatum aphan ningkan phlikep anta lanalo.

¹⁹Alangli Kanaan adet kedo khei throksi aphan pavirsi halatum adet Israel atum aphan pachepahemphu long-lo.

²⁰Lahei kadokave kepaplengji aphan ningkan pharo phli ra phokep an nang-lo. “Labangso aphi Arnam amontri, Samuel arni nangleletik ke Arnam halatum aphan kangsai atum pilo.

²¹Ansi halatum recho nangji pusi choningri lo, lapen Arnam Benjamin akur Kush asopo Sol aphan recho bat-lo. Alangli ningkan phlikep an recho cholo.

²²Alangliphan recho pen pasuntuk aphi David aphan halatum arecho bat-lo. Arnam alangli lamjir pulo: ‘Ne nening amonit long-lo, lake Jesse asopo David helo. Ne kepaklemji ning kehang akam an alangli klempo.’

²³Arnam amethang kechaktang asonthotsi David aso-asu angbong pen Jisu aphan Israel atum aphan kepajok abang paplangtang-lo.

²⁴Israel atum amethang methang apap pen aning chiruisi baptisom en nangji pusi Jon Israel atum an aphan thanlo. Jisu kam keklem kepangchengche akosi Jon labangso alam than pachethang-lo.

²⁵Jon kam keklem kepajutji dok dok ahut alangli rat atum aphan pulo, ‘Nanglitum neliphan komat pusi kemathama? Neli ke hala nanglitum kanghongphrong abang kali. Bonta mathanon, halabangso abang neliphi vangpo. Neli ke alangli keng-op ari kephriji aphan anta neli ot ave’.

²⁶“Israel akortemarli atum, Abraham aso-asu atum, lapen Arnam aphan kangduk Jihudi kalidet atum! Ilitum aphansi la kejok alam epilo!

²⁷Pima Jerusalem arongsopi kedo amonit atum, lapen halatum aphan keja atumta alangli helo kepajok abang-lo puke chininedet-lo, lapen Sabbath Arnini keporhihi, hala Arnam amontri atum alam hei heita halatum chininedet-lo. Tebonta halatum alangliphan ado padosi Arnam amontri atum kethan alam pachekok-lo.

²⁸Alangli kethinangji, lason ado halatum longthekthedet-lo setta, alangliphan kepathilongjisi halatum Pilat aphan choningrilo.

²⁹Hastro along alangli lamjir ketok ason an halatum klemdet aphi alangliphan thengparpan pen pasunsi thiri along bidamlo.

³⁰Bonta Arnam alangliphan kethi pen pathurlo,

³¹lapen alangli Galili adet pen Jerusalem kedam ahut alangli long kedun atum aphan alangli penang arni an cheklang-lo. Alanglitum nonke Israel atum angno haki plang-lo.

³²Nelitum nanglitum aphan Birta Keme kethanjisi ladak vang-lo, atheke

³³Jisu aphan kethi pen kepathur pen ajok, Arnam klemji pu ephusar atum aphan kechak alam non ephusar aso-asu atum aphan, atheke ilitum aphan eklempitang-lo. Lake hini ajir alun along ketok asonthot-lo, atheke hadak tok-lo: ‘Nang ke ne Sopolo; pini ne nang-Po plangtang-lo.’

³⁴Alangliphan kethi pen pathurji lapen abang arpum kaiketa thuthedetji pu alamjir Arnam kepu lapuson helo: ‘Ne David aphan kechaktang, Kangthir lapen kelongvekji ahirjume hei hei ne nangtum aphan nangpiji.’

³⁵Lapen chenamsi ajir kaprek alun alongta Arnam puthulo, ‘Nang nangmethang Aban kangthir aphan atipit arlo pathu longledetji.’

³⁶Pima David amethang akai ahut Arnam aning kehang akam klemdet aphi thilot-lo, lapen alangli phusar atum along alangliphan pipdundet-lo, lapen alangli bang arpum thulo.

³⁷Bonta Arnam kethi pen kepathur tang abang arpum ke thuthedet-lo.

³⁸Lahelo Israel akortemarli atum, nanglitum la kechinijisi nelitum aning hang-lo: atheke Jisu Khristo pen ajoksi pap hei hei akediya longji pu nelitum nanglitum aphan thanlo.

³⁹Alangliphan kekroi atum anke, Moses Aron kepajok un-e apap an pen kejok long-lo.

⁴⁰Tangte Arnam amontri atum kepu alam nanglitum aphan keplangpledetjile nanglitum lang pamenon. Atheke Arnam amontri atum pulo:

⁴¹‘Nangtum, kangnekchoi amonit atum! Nangtum manghumangramra thilotnon! Pima mane abangle nangtum aphan than pachinipame setta, nangtum kroikre det ji, lason akamsi pini ne klembomlo!’ ”

⁴²Ansi Pol lapen Barnabas sinagog pen nang kebar ahut monit atum alanglitum aphan choningrisi pulo, “Puthot a-Sabbath Arnita vangthura labangso alamjir ansose thanthutha.”

⁴³Mei chekakdet aphi, Jihudi lapen Jihudi adhorom ke-endun a-Jihudi kalidet ake-ongpi atum Pol lapen Barnabas along dunlo. Alangli halatum pen chingkilo, lapen Arnam akangjinso angkangle kedo chepathir-klongnon pusi halatum aphan aning parung-lo.

⁴⁴Puthot a-Sabbath Arni Hemphu alam karjudunjisi rongsopi kedo an amonit thak thak amonit vang-lo.

⁴⁵Jihudi atum la armu ake-ongpi thek-long si jasemet lang un-elo, lapen pinrem pinremsi Pol keningje alam ke ahok kali pusi pulo.

⁴⁶Bonta Pol lapen Barnabas ke ansose phererepin pen pulo, “Nelitum nanglitum aphansi Arnam alam nangthan paphrang vek nangkok-lo. Bonta nanglitum methangsi la dengdelo, lapen nanglitum methang methangsi kejut un-e achethe kelongmeme a-ot kali pu chemathalo apotsi nonke nelitum nanglitum aphan osi, Jihudi kalidet atum angbong dampo.

⁴⁷Pima Hemphu nelitum aphan lasonsi hukum nepitang-lo: ‘Pirthe adangta kejok kelongji aphan, Jihudi kalidet atum aphan ajok, ne nangphan kethe-ang nangpaplang-tang-lo.’ ”

⁴⁸Jihudi kalidet atum labangso alam arjulongsi aning arong-lo, lapen Hemphu alam adak atur pathelo, lapen Kejut un-e achethe kelongji aphan kangvaitang atum an kroilo.

⁴⁹Halabangso alongri adang an hemphu alam chethangphlup-lo.

⁵⁰Bonta Jihudi atum hala rongsopi angbong aman kedo amonit atum aphan lapen Arnam aphan kangduk, Jihudi kalidet arloso aman kedo atum aphan hoisi Pol lapen Barnabas aphan pachenek-lo, lapen halabangso alongri pen paphlungphit-lo.

⁵¹Alanglitum halatum abe pathurjisi akengpak aduk cheho tekangsi Ikoniam arongsopi damjuilo.

⁵²Antiok arongsopi along kedo kekroitang atum aning arongpik-lo, lapen halatum Karjong Kangthir pen plengset-lo.