Read Karbi AKAM 14 Bible Online

AKAM 14 - Karbi bible

AKAM 14

¹Ikoniam arongsopi alongta lasonthotsi plang-lo. Pol lapen Barnabas Jihudi atum a-Sinagog along dunsi lam than pajume-olo. Lasi Jihudi atum lapen Jihudi kalidet ake-ongpi atum kroilo.

²Bonta kekroikre a-Jihudi atum hala Jihudi kalidet atum aphan chorung chojarsi kekroitang atum aphan palangselet-lo.

³Pol lapen Barnabas hadak penang arni keding dosi phererepin pen Hemphu alamjir thanbomlo, lapen Hemphu alanglitum aphan kemanghumeme akam lapen kematha thekthedet akam keklemji ajakong pisi, alanglitum Hemphu akangjinso alamjir kethan alam ke ahok-lo pu aporman paklang-lo.

⁴Rongsopi amonit atum angbong abe hini dokok-lo. Penang atum ke Jihudi atum abe dunlo, lapen akaprek atum ke Pol lapen Barnabas abe dunlo.

⁵Ansi Jihudi atum lapen Jihudi kalidet atum hala keja atum pen pen la ketoitang atum aphan kepatherakjisi lapen arlong pen karbujisi chepathik-lo.

⁶Bonta ketoitang atum labangso alam chinisi Likonia adet Listra lapen Derbe arongsopi lapen tebok terai alongri katjuilo.

⁷Haladak alanglitum Birta Keme than-pachethang-lo.

⁸Listra arongsopi inut akeng ketekok amonit dolo. Alangli amahang kethek ahut penta akeng tekokjoksi kengkam chejor thekthepinlo.

⁹Alangli hadak ingnilunsi Pol kethan alam arju dun lo. Pol alangliphan langding-lo, lapen alangli kroilo lapen me unpo thek-longsi,

¹⁰Pol alangliphan ase kethe pen pulo, “Thurra arjapthernon!” Ansi alangli chonkang kangsi akengkam kechejorji pangcheng-lo.

¹¹Armu atum Pol keklem akam thek-longsi Likonia alam pen hangjo si pulo, “Arnam atum monit arje cheparjansi etum angbong nanghirtang lo.”

¹²Halatum Barnabas aphan Zeus pusi amen irlo, lapen Pol aphan ke Harmes pusi irlo, pima alangli ke lam kethan ahut keja abang-lo.

¹³La Zeus pu arnam aphan kardom ahem ke rongsopi angtan si dolo. Halabangso akurusar abang ke chainong alo, lapen mir alek hei hei inghap an vanlo, pima alangli lapen armu atum la ketoitang atum aphan athok kethokjisi aning hang-lo.

¹⁴Pol lapen Barnabas labangso alam arjulongsi amethang methang ape chingsek-lo, lapen armu atum angbong katvirsi, hangsi pulo,

¹⁵“Nanglitum kopichonghoisi lapuson keklemloma? Nelitumta nanglitum asonthak thak monitchot-lo! Nanglitum la thangta kalidet a-arnam hei hei aphan o-ra hala sining, pirthe, talo lapen lahei hei angbong kedo amar an kepinchong abang, kerengver Arnam anatthu kechetevarji aphansi nelitum nanglitum aphan Birta Keme kethan-jisi ladak vang-lo.

¹⁶Hako ahut ke alangli kadokave amonit aphanta amethang methang aning kehang aling paklem long-lo.

¹⁷Bonta alangli keme akam hei hei klem si amethang kerengver angthek paklangbomlo: atheke alangli nanglitum aphan sining pen arve pajang-lo lapen abotor ahut sok sang nangpi olo, lapen kecho ahormu padorphlupsi nanglitum aning parong-lo.”

¹⁸Lapu-an alam pudet aphita armu atum latum aphan athok kethokji aning hang-lo. Lasi ketoitang atum la armu atum aphan khang chetorok-lo.

¹⁹Antiok lapen Ikoniam arongsopi pen penang a-Jihudi atum vangsi armu atum aphan amethang abe cheponlo. Halatum Pol aphan arlong pen arbulo, lapen alangli thilot-lo pu mathasi alangliphan rongsopi angtan chethurponlo.

²⁰Bonta kekroitang atum alangliphan kekomjai ahut alangli thursi rongsopi lutdamthulo. Puthot arni alangli Barnabas pen Derbe arongsopi damlo.

²¹Pol lapen Barnabas Derbe arongsopi Birta Keme than-pache-thangsi sangho ake-ongpi paplang-lo. Ansi alanglitum Listra, Ikonia, lapen Pisidia adet Antiok arongsopi chevoilo.

²²Alanglitum kekroitang atum aning pathirbomlo, lapen halatum kekroi angkang kedobomji aphan aning pathelo. Alanglitum thansi pulo, “Arnam a-Rat angbong kelutdunji aphan ilitum jasemet kesung pho nangji.”

²³Alanglitum mondoli alongtinta mondoli akesar atum battekang-lo, lapen alanglitum Arnam ardomsi lapen an humsi halatum aphan halatum kekroi a-Hemphu arideng hodai tekang-lo.

²⁴Alanglitum Pisidia adet dongpon-putsi Pamphilia adet damlo.

²⁵Hadak Perga arongsopi along alanglitum than-pachethang-lo, lapen labangso aphi Atalia arongsopi damlo.

²⁶Hadak pen alanglitum telongpi pen Antiok arongsopi damlo. Hadaksi aphrangke non alanglitum keklem akam kepaklemji aphan alanglitum aphan Arnam akangjinso angkang hodailo.

²⁷Alangli Antiok arongsopi nanglesi mondoli amonit atum aphan pangrumpet-lo, lapen Arnam alangli-tum pen ajok keklemtang akam, lapen alangli kopusonsi Jihudi kalidet atum aphan kekroi atovar ingpupitang-loma, la kadokave alam halatum aphan thanlo.

²⁸Lapen hadak alanglitum sangho atum along penang arni keding dodunlo.