Read Karbi AKAM 15 Bible Online

AKAM 15 - Karbi bible

AKAM 15

¹Bonta penang amonit atum Judia adet pen Antiok arongsopi vangsi kekroitang atum aphan thansi pulo, “Moses Aron ateng pen reng-rot en-ete nanglitum jok un-e.”

²Labangso alam pen apot Barnabas lapen Pol halatum pen jasemet lam chedanlo. Lasi Pol, Barnabas lapen Antiok arongsopi kedo kekroitang penang atum Jerusalem damsi hadak ketoitang atum lapen mondoli akesar atum pen labangso alam kechingvaiji aphan pathik-lo.

³Halabangso amondoli mate kroi-asong alanglitum aphan tovar thondunlo. Alanglitum Phonisia lapen Samaria adet angbong kedam ahut Jihudi kalidet atum aning kecherui alam thanponlo. Labangso abirta kekroitang atum an aning arongparpik-lo.

⁴Ansi alanglitum Jerusalem nanglesi, mondoli, ketoitang atum lapen mondoli akesar atum alanglitum aphan chak-lo, lapen alanglitum pen ajok Arnam keklem alam an alanglitum latum aphan thanlo.

⁵Bonta Pharisi abe atum angbong pen kekroitang penang atum thursi pulo, “Jihudi kalidet atum aphan reng-rot pivek nangji, lapen halatum Moses Aron kroinangji pura hukum pi nangji.”

⁶Kekroitang atum lapen mondoli akesar atum labangso alam keching-vaijisi chingrumlo.

⁷Lam penang chedandet aphi Pitor thursi pulo, “Korte marli atum, Jihudi kalidet atum Birta Keme arjulongsi kekroiji aphan, neli Birta Keme than kepachethangji aphansi Arnam nanglitum angbong pen neliphan ingvailo, lake nanglitum chinilo.

⁸Abangphutin aning kechini abang, Arnam ilitum aphan asonthak thaksi Jihudi kalidet atum aphanta Karjong Kangthir pisi alangli halatum aphan dengtang-lo pu angthek paklang-lo.

⁹Alangli halatum lapen ilitum angbong thang akeprekta bibelo. Bonta halatum kroilo apotsi alangli halatum apap hei hei diyalo.

¹⁰Tangte non nanglitum kopi apotsi ephusar atum lapen ilitumta keparphang un-epinlang ajuali hala kekroitang atum achethok athak kebatra, Arnam aphan asat kelangji mathaloma?

¹¹Bonta Hemphu Jisu Khristo pen ajoksi halatum kejok long-lo asonthot, lasonthotsi etumta kejok long-lo pusi ilitum kroilo.”

¹²Pol lapen Barnabas pen ajok Arnam Jihudi kalidet atum angbong keklem akemanghumeme akam lapen kematha abidi kejutdet akam an alamjir kethan arjulongsi mei along kedo atum an doklip-lo.

¹³Alanglitum lam thandet aphi Jems thakdunsi pulo, “Kortemarli atum, neli lam arjutha!

¹⁴Arnam Jihudi kalidet atum aphanta amethang amonit kepaplangjisi alangli kopu sonsi aphrangke Jihudi kalidet atum angbong pen penang amonit ensi halatum aphan mathaloma, la kadokave alam Simon nanglitum aphan thanjirlo.

¹⁵Lake Arnam amontri atum kepu alam asonthot-lo, atheke halatum lasonsi pulo,

¹⁶‘Hemphu pulo, labangso aphi ne vangthuji, lapen David akeruhup ape ahem ne kimthuji. La kerutang hei hei ne kimthuji, lapen la ne paparjapthuji.

¹⁷Ansi labangso pen ajok ahin kedolang amonit atum an, lapen nemethang amonit kepaplangjisi ne kephatang, Jihudi kalidet atum an nephan roji.

¹⁸Hako ahut pen labangso alam kepaklang abang, Hemphusi lapuson pulo.’

¹⁹“La apotsi neli ning keparai alam lahelo, la Arnam anat kepangnobom, Jihudi kalidet atum aphan pasungbom nangnelo.

²⁰Bonsetta ilitum halatum aphan lo tok-ra, halatum kumlin aphan kethok amar hei hei cho nangne, beisa klem nangne, kokthat api a-ok chonangne lapen avi cho nangne pule halatum aphan thanlonang.

²¹Pima hako ahut penta Sabbath Arnitin sinagog along Moses Aron porhesi paparjubomlo, lapen Moses kepu alam hei hei rongsopitin alongta than pachethangbomlo.”

²²Ansi ketoitang atum, lapen mondoli akesar atum hala mondoli amonit atum pen pen chingvaisi halatum angbong pen manene atum aphan ingvaisi Pol lapen Barnabas atum along Antiok arongsopi ketoidunji aphan pathik-lo. Halatum Barnabas pu a-Judas lapen Silas aphan ingvailo. Alanglitumke kekroitang atum angbong keja atumlo.

²³Halatum alangtum along la aber ketok aloh lodunlo: “Nelitum, atheke ketoitang atum lapen mondoli akesar atum, atheke nanglitum akorte atum nanglitum aphan, atheke Siria lapen Silisia adet kedo, Jihudi kalidet atum an aphan kardom pilo.

²⁴Nelitum angbong pen manene atum nelitum pen thang ahukum longlepin pensi nanglitum along vang-lo, lapen halatum kethan alam pen ajok nanglitum aning pasiksak-lo lapen nanglitum aning aduk pilo pusi nelitum arjulong-lo.

²⁵Lasi nelitum chingvailo, lapen nelitum manene atum aphan ingvaisi nanglitum along ketoiji aphan alam chekroilo. Ilitum kechinghon ajirpo, Pol lapen Barnabas atum along alanglitum nangdunpo.

²⁶La Pol lapen Barnabas ke e-Hemphu Jisu Khristo akam aphan amethang methang akai kechepanong atumlo.

²⁷Lasi nelitum Judas lapen Silas aphan nanglitum along nangtoilo. Alanglitum amethangta la ketok alam an nangthanpo.

²⁸La aber ketok, kenangsot aron apar ke nanglitum aphan akaprek anghor pinangnelo pusi Karjong Kangthir lapen nelitumta alam chekroilo.

²⁹Atheke lahelo, nanglitum sekarkli amar, vi, lapen kokthat api a-ok chonangnelo, lapen beisa klem nangnelo. Nanglitum lahei hei klemkledet-lote mesenpo. Kardom.”

³⁰Ansi alanglitum aphan toilo, lapen alanglitum Antiok damsi mondoli amonit atum an aphan pangrumlo, lapen halatum arideng labangso aloh pilo.

³¹Halatum labangso aloh porhelo, lapen labangso aloh along ning kepathe alam longsi halatum aning arongparpik-lo.

³²Judas lapen Silas penang lam thansi hala korte atum aning pathelo, lapen aning pathirlo, atheke alanglitum methang amatsi Arnam amontri atumlo.

³³Penang arni aphi kekroitang akorte atum alanglitum aphan ning kangsam pen nangtoilo. Ansi alanglitum aphan nangketoi atum along alanglitum nangchevoilo.

³⁴Bonta Silas ke hadak dokok-lo.

³⁵Bonta Pol lapen Barnabas ke Antiok arongsopisi dokok-lo. Hadak alanglitum hala akaprek penang atum pen pen Hemphu alam than-pachethangbomlo.

³⁶Penang arni aphi Pol Barnabas aphan pulo, “Etum Hemphu alam kepachethangtang arongsopi an chedamthura, korte atum kopusonsi dobomloma, lale langdamlonang.”

³⁷Barnabas ke Mark pu a-Jon aphanta ari kecheponji aning hang-lo.

³⁸Bonta Pol ke alangliphan ari kechepon ke mesen kali pusi mathalo; pima alangli halatum aphan Pamphilia adet otekangsi alanglitum along kam keklem pajutdundedet-lo.

³⁹Ansi alanglitum alam chetontedetsi jasemet lam chedanlo, lapen alanglitum chekakdak-lo. Barnabas ke Mark aphan ari cheponsi telongpi pen Saipras alanglom damlo.

⁴⁰Bonta Pol ke Silas aphan ingvailo, lapen kekroitang atum alanglitum aphan Hemphu ahirjume hangpidunsi alanglitum damlo.

⁴¹Alangli Siria lapen Silisia adet angbong vurdamsi mondoli pathirponbomlo.