Read Karbi AKAM 19 Bible Online

AKAM 19 - Karbi bible

AKAM 19

¹Apollos Korinth arongsopi kedo un ahut Pol heloving adet vurdamsi Ephesas arongsopi vang-lo. Hadak alangli sangho penang atum pen chetong-lo,

²lapen alangli halatum aphan arjulo, “Nanglitum kekroi ahut Karjong Kangthir long-loma?” Halatum thakdunsi pulo, “Longlelang, Karjong Kangthir do puke nelitum arjuta arjulonglelang!”

³Pol halatum aphan arjulo, “Tangte nanglitum kopi abaptisomsi enlo?” Halatum thakdunsi pulo, “Jon abaptisom.”

⁴Pol Pulo, “Jon ke pap pen ning kecherui abaptisomsi pilo; lapen alangli phi kevangji abang aphansi kroi masi pusi Jon Baptist Israel amonit atum aphan thanlo. Halabangso abang ke Jisu helo.”

⁵Labangso alam arjulongsi halatum aphan Hemphu Jisu amen pen baptisom pilo.

⁶Pol halatum aphuthak ari batsi halatum aphuthak Karjong Kangthir hirlo. Ansi halatum adet kaprek kaprek alam pen keningjeji pangcheng-lo, lapen Arnam alam pachethang-lo.

⁷Halatum kadokave pinso amonit bang krehini anbak dolo.

⁸Pol sinagog along dunsi chiklo jonthom anta phereredet pen lam thanlo, lapen monit atum pen lam chedansi halatum aphan Arnam a-Rat alamjir kepakroiji bor-ilo.

⁹Bonta halatum angbong manene atum aning chepangtangsi kroikredet-lo; lapen rat angnosi Hemphu a-Tovar aphan pinremlo. Lasi Pol halatum aphan otekangsi kekroitang atum cheponlo, lapen Tirannas pu lam kethan ahem along arnivangta lam thanlo.

¹⁰Lasonsi alangli ningkan hini anta klemverlo. Labangso pen ajok Asia adet kedo atum an, Jihudi lapen Jihudi kalidet atumta Hemphu alam arjulong-lo.

¹¹Arnam Pol pen ajok akemang-humemepik akam hei hei klembomlo.

¹²Lasi Pol ke-en apoho lapen apevenso hei hei anchot setta keso atum along ponsi halatum akeso melo, lapen karjong langno atum halatum pen barlo.

¹³Bithe bitha adim damsi karjong langno kephlungbom a-Jihudi penang atumta Hemphu Jisu amen pen karjong langno atum aphan kephlungji bor-ilo. Halatum karjong langno atum aphan pulo, “Pol kethanbom a-Jisu amen pen ne nangtum aphan hukum pilo.”

¹⁴Seba pu Jihudi atum akurusar Kethenei asopo bangthroksi atumsi lason klembomlo.

¹⁵Bonta hala karjong langno halatum aphan pulo, “Ne Jisu aphan chini, lapen ne Pol aphanta chini; bonta nangtum ke komat-lo?”

¹⁶Ansi hala karjong langno kepho abang halatum athak chonkrap-lo, lapen halatum kadokave aphan haidet-lo. Lasi halatum areng solo lapen areng angsesi halabangso ahem pen kat-lo.

¹⁷Ephesas arongsopi kedo a-Jihudi atum lapen Jihudi kalidet atum anta labangso alam arju longsi pherehurlo, lapen Hemphu Jisu anong pathemuchot-lo.

¹⁸Ansi kekroi-tang penang atum rat angno vangsi amethang methang keklemtang, akehingno akam an chethanlo.

¹⁹Maya Kanghoithek ake-ongpi atumta aloh athui an pangrumpetsi kadokave amonit angno me phrinlo. Halatum aloh an anam lakhapetsi rup atangka suri phokep an pleng-lo.

²⁰Lasonsi Hemphu alam chethang ponbomlo, lapen ajakongta theponbomlo.

²¹Lahei hei plangdet aphi Pol Masedonia lapen Grik adet angbong vurponsi Jerusalem arongsopi kedamji mathalo. Alangli pulo, “Hadak damdet aphi ne Rom arongsopita langdamvek nangji.”

²²Lasi alangli amethang ari asangho atum angbong pen Timothi lapen Erastas aphan Masedonia adet toilo, lapen alangli methang ke Asia adetsi penang arni dobomlo.

²³Labangso ahutsi Hemphu a-Tovar alam pen apot Ephesas arongsopi angbong huripik-lo.

²⁴Pima Demetrias pu inut Abeni rup pensi Artemis pu arnampi akardom ahemthepi a-arjan selamlo, lapen labangso pen ajok beni atum aphan ale palong-olo.

²⁵Lasi alangli halatum lapen lason keklem atum aphan pangrumpetsi pulo, “Komarli atum! Labangso akam pen ilitum ale long-olo, lake nanglitum chinihurlo.

²⁶Nonke nanglitum la Pol keklembom akam thek-longhurlo, lapen arjulonghurlo. Monit atum keselamchot a-arnam hei hei ke arnam kali binong pusi alangli pulo. Lapusonsi alangli Ephesas asor atum aphanchot kali, bonta Asia adet ongdung amonit atum aphanta pakroisi ilitum angbong pen terek ponlo.

²⁷Lake kepherememe alamlo, atheke, monit atum ilitum akam hingno pusi pupo. La anchotta kali, la thepik arnampi, Artemis akardom ahemthepita thangta kalidet cheplangpo, lapen la Asia adet lapen pirthe adang amonit an kangdukhur arnampi anong ketheta avedetpo.”

²⁸Armu atum labangso alam arjulongsi jasemet aning thi-lo, lapen hangjo josi pulo, “Ephesas a-Artemis ke thepik binong!”

²⁹Rongsopi adang an huripik-lo. Ansi monit atum Gaias lapen Aristarkhas pu Masedonia adet amonit banghini aphan nepsi mei ahem along ponserak rak-lo. La Gaias lapen Aristarkhas ke Pol bithe bitha kedam ahut kejalang dun atumlo.

³⁰Pol amethangsi rat angno kedamji aning hang-lo; bonta kekroitang atum alangliphan khang-lo.

³¹Halabangso alongri keja atum angbong penang atum ke Pol ajirpolo. Halatum Pol along monit toisi mei ahem along cheklangdunri pusi choningrilo.

³²Ansi mei along kechingrum amonit atum alam chetontedetsi huriseilo. Manene atum ke eson alam pulo lapen akaprek atum ke ason kaprek alam pusi hangjolo, pima halatum angbong ake-ongpi atum ke, hadak kopi apotsi chingrumloma, lata chininelo.

³³Jihudi atum Alekjendar aphan rat angno paparjap-lo apotsi manene atum ke Alekjendar aphansi adai kedo abang tinkok-lo. Ansi Alekjendar monit atum aphan kepadoklipjisi ari pen asin paklang-lo, lapen kechethakdunji pangcheng-lo.

³⁴Bonta alangli ke Jihudi amonit-lo pu chinisi monit atum aphrang asonthak thaksi porphai hini anbak hangjo josi pulo, “Ephesas a-Artemis ke thepik binong!”

³⁵Aphisi rongsopi amei aloh ketok abang halatum aphan padoklipsi pulo, “Ephesas kedo akortemarli atum! Ephesas arongsopi helo Artemis thepi akardom ahemthepi lapen sining pen nangkeklo a-arlong kangthir aphan kerai abang-lo, lake kechinine abang matsi dolangma?

³⁶Lahei hei alam ahok-he puke baduta pu-un-e. Lasi nanglitum doklip nangji lapen kematha pameme penke klem nangnelo.

³⁷Labangso amonit atum kardomhemthepi amar thangta inghuhe lapen ilitum a-arnampi aphanta thangta pinremre setta nanglitum alanglitum aphan ladak vantang-lo.

³⁸Demetrias lapen alangliphan keklempi atum jongsi komane abang aphan adai ketinji alam do tangte, lake kangsai atum do lapen det ahemphu atumta do. Alanglitum hadak-le pachingsainang.

³⁹Bonta nanglitum jongsi la aparta kopine kechoningriji alam do tangte, lake kai ateng, rat atum ameisi parai unji.

⁴⁰Pima pini kehurisei apot ilitum aphan adai ketinmeme alam do: Labangso akehurisei athe thangta avedet apotsi ilitum chethak dun atovar avedetji.”

⁴¹La pudetsi alangli mei pachekak-lo.