Read Karbi AKAM 2 Bible Online

AKAM 2 - Karbi bible

AKAM 2

¹Pentakost Arni nanglesi kekroitang atum an elong adim chingrumpet-lo.

²Ansi tongsekot pen tomonpi kevang arki asonthak thak arki sining pen vangsi halatum kangniphrong ahem arlo plengset-lo.

³Anke me ade nangnak amar halatum thek-long-lo. Labangso amar ingdaksi abangphutin aphanta rodampet-lo.

⁴Halatum do-an Karjong Kangthir pen plengset-lo, lapen Karjong halatum aphan kepaningjetoi asonthotsi halatum kaprek kaprek adet alam pen keningjeji pangcheng-lo.

⁵Halabangso ahut Jerusalem arongsopi along pirthe adang akheitin pen kevang dhoromi a-Jihudi atum dolo.

⁶Labangso ase arjulongsi armu ake-ongpi atum chingrumlo. Halatum kematha abidi jutdet-lo, pima la armu atum amethang methang adet alam pensi hala kekroitang atum keningje halatum arjulong-lo.

⁷Halatum manghuphrong-lo, lapen kematha abidi jutdetsi pulo, “Langtha! La keningje atum an Galili amonit-lo, kalima?

⁸Tangte kopusonsi halatum ilitum methang methang adet alam pen keningje ilitum arjulong-loma?

⁹Pima ilitum Parthia, Media lapen Elam adet pen, Mesopotamia, Judia lapen Kappadosia adet pen; Pontas lapen Asia adet pen,

¹⁰Phrigia lapen Pamphilia adet pen, Ijip lapen Sairen adung kedo Libia alongri pensi vang-lo. Ilitum angbong manene atum ke Rom pen kevang a-Jihudi lapen Jihudi adhorom ke-endun Jihudi kalidet atumlo.

¹¹Lapen manene atum ke Krit alanglompi, lapen Arob adet pen kevang atumlo. Tebonta halatum ilitum methang methang adet alam pensi Arnam thedung keklem akam alamjir keningje ilitum arjulong-lo!”

¹²Halatum manghuphrong-lo lapen kematha abidi jutdetsi lahin lahin charjulo, “Labangso kecheplang athe kopima?”

¹³Bonta akaprek atum ke halatum aphan ingnekchoisi pulo, “Labangso amonit atum drakha ahorlang kemi junsi ingritang-lo!”

¹⁴Ansi Pitor hala ketoitang bang kre isi atum pen pen arjapthersi armu atum aphan ase kethe pen kepuji pang-cheng-lo, “Jihudi akortemarli atum, lapen Jerusalem arongsopi kedo atum an, nanglitum nelilam arjutha. Neli nanglitum aphan labangso kecheplang athe than pajirmipo.

¹⁵Labangso amonit atum ke hor kangrilo pusi nanglitum mathalo. Bonta latum ke hor kangri kali; pima nonke adap baji sirkep anvet-lang.

¹⁶Lake Arnam amontri, Joel kepu asonthot-lo. Atheke alangli pulo,

¹⁷‘Arnam pulo, mo kejut arnihei-hei ahut ne lapuson klemji: Halabangso ahut ne kadokave amonit atum aphuthak nemethang a-Karjong dungji. Nangtum asopo lapen asopi atum montriji; nangtum arisomar atum ning arjan thek-longji, lapen nangtum akesar atum mang hemanji.

¹⁸Lapen halabangso arni hei hei ahut ne nemethang abanpi lapen abanpo atum aphuthak nemethang a-Karjong dungji, lapen halatum montriji.

¹⁹Lapen sining angsong ne kemanghumeme akam hei hei, lapen pirthe athak angthek hei hei paklangji. Atheke, vi, me lapen karthatklui amehi hei hei angthek ne paklangji;

²⁰arni ingtingkuk cheplangji, lapen chiklota vi ason erhang cheplangji. Hemphu kethedung lapen adak-atur keplengset a-arni vangve ako la kadokave plangji.

²¹Anke Hemphu amen kehang abang alingsi jokji.’

²²“Israel akortemarli atum, nang-litum labangso alam arjutha! La Najareth a-Jisu pen ajok Arnam kemanghumeme akam lapen angthek hei hei paklangsi alangli ke Arnam pen ajakong kelong amonit-lo pu nanglitum aphan paklangdak-lo. Lake nanglitum methangsi chinilo, pima lake nanglitum angbongsi plang-lo.

²³Arnam aphrang pen kemang lapen kepathiktang asonthotsi Jisu aphan nanglitum arideng hodaidet-lo, lapen nanglitum alangliphan papi atum pen ajok thengparpan athak pasaksi pathilo.

²⁴Bonta Arnam alangliphan kethi ajakong pen pajoksi pathurlo. Pima kethi alangli phuthak thangnat ajakong avedet-lo.

²⁵Pima David alangli lamjir pulo, ‘Hemphu aphan ne kaike ahutta ne ingnosi thek-long-lo; ne jakong kekomkedetji aphan alang ne ar-e anatsi dolo.

²⁶La apotsi ne ning arong plengset-lo, lapen ne lam hei heita kechehok alam saidelo. Lapen nebang arpumta ning kethe pen dopo.

²⁷Pima nang nephan kethi atum kedo adim otekangkedetji, lapen nangmethang kekroi thirklong aban aphan nang tipit along pathulongledetji.

²⁸Nang nephan chethe atovar akrong hei hei nepachinitang-lo, nang nelong kedo pen ajok ne ning arong plengsetji.’

²⁹“Kortemarli atum, ephusar David thilot-lo lapen alangliphan pipdet-lo, lapen pini arni anta atipit ilitum along dolo. Labangso alam neli puthip un.

³⁰Alangli ke Arnam amontrilo, lapen David aso-asu atum angbong pen inut aphan David adim recho pachoji pu Arnam seme tangsi kechak alam alangli chinilo.

³¹Arnam keklemji alam David aphrang pen chinilo; lasi alangli Khristo kethi pen kethurji alam pulo, ‘Alangliphan kethitang atum kedo adim otekangkedet-lo; lapen alangli bang arpum pavirlongledet-lo.’

³²Arnam labangso a-Jisu aphan kethi pen pathurtang-lo lapen nelitum kadokave labangso ahakilo.

³³Alang-liphan Arnam ar-esi pangnitang-lo lapen a-Po Arnam pen hala kechaktang a-Karjong Kangthir longsi la nelitum aphuthak dungtang-lo. Lake non nanglitum thek-longtang-lo lapen arjulongtang-lo.

³⁴Pima Davidle sining angsong kedam kali, tebonta alangli pulo, ‘Hemphu ne Hemphu aphan pulo:

³⁵Ne nang hotur atum aphan nangkeng anghoi paplangpletik ke, nang ladak ne ar-ele ingninon.’

³⁶“Tangte Israel atum an, nanglitum labangso alam chinihurnon: nanglitum thengparpan athak kepathi a-Jisu helo Arnamsi Hemphu lapen Khristo kepaplangtang abang-lo!”

³⁷Labangso alam arjulongsi halatum aning lutchok-lo. Lasi halatum Pitor lapen ketoitang akaprek atum aphan pulo, “Kortemarli atum, nelitum kopi klem nangjima?”

³⁸Pitor halatum aphan pulo, “Nang-litum abangphutinta nangmethang methang apap hei hei diya kelongji aphan ning chiruihurnon. Anke Arnam adan, Karjong Kangthir nanglitum longpo.

³⁹Pima nanglitum, nanglitum aso asu atum aphan lapen heloving kedo atum an aphan, atheke Hemphu, e-Arnam kepha atum an aphan Arnam labangso alam chak-lo.”

⁴⁰Pitor halatum aphan akaprek kaprek alam pen thansi pacheretoilo, lapen choningrisi pulo, “La kehingno amonit atum aphuthak kevangji akesung pen nanglitum chepajoknon!”

⁴¹Ake-ongpi amonit atum alangli kethan alam kroisi baptisom enlo, lapen halabangso arni bang suri kethom anbak amonit atum halabangso asong along chelangdunlo.

⁴²Halatum ketoitang atum along charlidunbom, chingrumdunbom, kechingrum a-an chodunbom lapen Arnam kardom o-edetsi dobomlo.

⁴³Ketoitang atum pen ajok kemang-humeme akam lapen angthek hei hei paklangbomlo, lapen abangphutinta pherehurlo.

⁴⁴Kekroitang atum an elongpetsi chingrumbomlo, lapen kedo an amarta enrap rap-lo.

⁴⁵Halatum amethang arit, aberi lapen amar atar hei hei chejorsi abangphutin aphan akenang kedo atengsi atangka ronlo.

⁴⁶Halatum adon adon chingrumsi aning arong pen lapen aning keme pen Arnam aphan kero pisi him beng-lo, lapen an chorap rap-lo.

⁴⁷Lapen kadokave amonit atum halatum aphan aning dok-hurlo. Hemphu arnivangta halatum along kejok atum aphai batdunbomlo.