Read Karbi AKAM 20 Bible Online

AKAM 20 - Karbi bible

AKAM 20

¹Halabangso akehurisei hamdet aphi Pol kekroitang atum aphan hangpetsi halatum aphan ning kepathe alam pulo, lapen halatum pen chepadisi Masedonia adet kedamji aphan barlo.

²Alangli halabangso alongri bithe bitha adim damsi monit atum aphan penang alam pen aning pathelo. Ansi alangli Grik adet vang-lo.

³Hadak alangli chiklo jonthom an dolo. Ansi hadak pen Siria adet telongpi pen kedamji dok dok ahut, Jihudi atum alangliphan kepathiji abidi rilo pu alangli chinilo. Lasi alangli Masedonia adet vurponsi kechevoiji pathik-lo.

⁴Berea arongsopi asor, Pirhas asopo Sopater, Thessalonika asor Aristar-khas lapen Sekundas, Derbe asor Gaias, Asia adet amonit, Taikikas lapen Trophimas lapen Timothi alangli long dunlo.

⁵Alanglitum dam patenosi Troas arongsopi along nelitum aphan inghongphrong-lo.

⁶Thap kave ahim Achojun a-Meipi aphi nelitum te-longpi chethapsi Philipi arongsopi pen barlo, lapen nipho aphi nelitum Troas arongsopi lesi alanglitum pen chetong-lo. Hadak nelitum ni throksi an dokok-lo.

⁷Hithi arui aphrangsi arni nelitum him kebengji aphansi chingrumpet-lo. Pol monit atum aphan lam thanlo, lapen alangli puthot arni adapprang kedamji aphan pathiktang-lo apotsi alangli ajo achitim ahut anta lam thanlo.

⁸Angsong angdeng, nelitum kechingrum along melur do-olo;

⁹Pol lam kethan un ahut Eutikhas pu inut ariso hem anghapso along ingnisi mek-ilo. Aphisi alangli amek jang-lotsi, hem angsong kethom angdeng pen longle athak nangklolo. Halatum alangliphan kerungdam ahut ke alangli thi-ettang-lo.

¹⁰Bonta Pol angsong pen nanghirsi lapen abang arbaksi pulo, “Nanglitum mathari, pima alangli chethe dolang!”

¹¹Ansi alangli angsong angdeng che-damthulo lapen him bengsi halatum la cholo. Alangli halatum pen adap arni kevang ahut anta lam chethanlo. Ansi alangli hadak pen damlo.

¹²Halatum halabangso ariso aphan akerengsi ahem ponlo, lapen halatum aning rengme-olo.

¹³Nelitum telong along dam patenosi telongpi pen arongsopi damlo. Hadak nelitum Pol aphan telongpi kepachethapjisi mathalo, pima alangli hadak anke akeng pen kevangjisi pathik-lo.

¹⁴Alangli Asos arongsopi along nelitum pen chetongsi nelitum alangliphan telongpi pachethap-lo, lapen Mitailen arongsopi damlo.

¹⁵Ansi nelitum telongpi chethapsi hadak pen barlo lapen puthot arni Kaios alanglom akung nanglelo. Puthot arni nelitum Samos alanglom akung lelo, lapen halabangso pen puthot arnithu nelitum Miletas arongsopi nanglelo.

¹⁶Pol Asia adet apor kepadamdedetji aphansi Ephesas arongsopi kevur ponpedetjisi pathik-lo. Pima alangli unte pentakost Arni Jerusalem kepaleji aphansi kedam pachingkhanlo.

¹⁷Miletas pen Pol Ephesas arongsopi amondoli mate kroi-asong akesar atum aphan pahangdamlo.

¹⁸Alanglitum nanglesi Pol alanglitum aphan pulo, “Neli Asia adet neli kengpak kebicheng arni penta neli nanglitum angbong kopusonsi dobomloma, lake nanglitum chinilo.

¹⁹Jihudi atum abidi langno pen neliphan pasung pik-lo setta neli ning chepabihek pen lapen mekri-mek-lang pen Hemphu akam klempibomlo.

²⁰Neli nanglitum aphan rat angno lapen nanglitum ahem adon adon damsi kethan ahut, nanglitum aphan ale kedoji alam esonnatta khangkhedetsi than-pet-lo, lake nanglitum chinilo.

²¹Amethang methang apap pen aning chiruisi Arnam adung kevangji lapen e-Hemphu Jisu aphan kepakroiji aphansi neli Jihudi atum lapen Jihudi kalidet atum aphanta than pachinibomlo.

²²Lapen nonke, mathanon, neli Karjong Kangthir ahukum longsi, Jeru-salem dampo. Hadak neliphan kopi pi plangpone, lake neli chininedet-lo.

²³Neli eson alamsi chinichot-lo, atheke phatek lapen kesung hei hei neliphan inghongphrong-lo pusi rongsopitin alongta Karjong Kangthir neliphan pachinilo.

²⁴Bonta neli jongsi neli keklem nangji akam klem patang-lote, lapen Hemphu Jisu neliphan kepek akam, atheke Arnam akangjinso a-Birta Keme kepachethang akam klem papleng unlote, la neli methang apran ke neliphan thangta kali pusi neli mathalo.

²⁵“Neli nanglitum kadokave angbong damsi Arnam a-Rat alam than pachethangtang-lo. Lapen nonke neli chinilo, non pen apara nanglitum baduta neliphan nethek-longledetpo.

²⁶Lasi pini neli nanglitum aphan thandak-lo: nanglitum angbong mane abang jongsi virdet-lo tangte, lake neli dai avelo.

²⁷Pima Arnam aning kehang alam an neli esonnat alamta khangkhedetsi nanglitum aphan than-pet-lo.

²⁸Nanglitum methang methang lapen mondoli amonit atum an aphan langpamenon. Halatum aphan kepalangji aphansi Karjong Kangthir nanglitum aphan nangbattang-lo. La Arnam amethang avi pen kenamtang amondoli mate kroi-asong aphan japamenon.

²⁹Neli chinilo, neli damjui aphi ajat kelangno amahar atum nanglitum angbong vangsi labangso asong aphan un an phangnoji.

³⁰Nanglitum methang angbong penta penang amonit atum thursi halatum amethang methang aphi kepadunji aphan kekroitang atum aphan chobei alam thanji.

³¹Tangte nanglitum cherenon! Nanglitum chemathanon, neli ningkan kethom anta arnivang ajo-anerlota mekri mek-lang pen nanglitum aphan than pacheretoilo.

³²“Lapen nonke neli nanglitum aphan Hemphu arideng lapen alangli akangjinso alam angbongsi hodailo. Lake nanglitum a-ot adur kepameji lapen Arnam amonit atum an kechepahemphuji ahirjume nanglitum aphanta kechepahemphuji ajakong do.

³³Neli badu amonit arup kalite aser, kalite ape-ari konkedet-lo.

³⁴Neli nelimethang ari pen kam klemsi neli lapen neli ri asangho atum akenangji amar anta long-lo, lake nanglitum chinihurlo.

³⁵Neli keklem akam hei hei pen ajok, ilitum kam klem chepaduksi jakong kekom atum aphan rapdun nangji pu alam nanglitum aphan paklang-lo. Lapen Hemphu Jisu amethang kepu alam nanglitum chematha nangji, atheke alangli pulo, ‘Kelong apar kepi ahirjume domu.’ ”

³⁶Pol labangso alam pudetsi hala kadokave atum pen akengphu patongruisi Arnam ardomlo.

³⁷Hala-tum Pol achethok bamsi lapen kechinghonpik pen alangliphan ingjupsi kadokaveta chirulo.

³⁸Pima halatum alangliphan puthot thek-longledetpo pu Pol kepu alam apot halatum aning aduk dopik-lo. Ansi halatum alangliphan telongpi along anta thondunlo.